Jeremias 1:1-18 RIPV1996 - Bible AI

¹Nailanad iti daytoy a libro ti pakasaritaan ni Jeremias nga anak ni Hilkias. Maysa ni Jeremias kadagiti papadi iti ili ti Anatot iti daga ti Benjamin.

²Itiⓐ maika-13 a tawen a panagari ni Josias nga anak ni Ari Amon idiay Juda, kinasao ni Yahweh ni Jeremias.

³Kinasaonaⓑ manen idi tiempo ni Ari Jehoyakim nga anak ni Josias. Kalpasanna, namin-adu pay a kinasao ni Yahweh ni Jeremias agingga a naitalaw dagiti tattao ti Jerusalem iti maikalima a bulan iti maika-11 a tawen a panagari ni Zedekias nga anak ni Josias.

⁴Kinuna ti APO kaniak,

⁵“Pinilika sakbay nga inikkanka iti biag, ken sakbay a nayanakka, tinudinganka a profeta kadagiti pagilian.”

⁶“O Apo DIOS,” insungbatko, “diak ammo ti agsarita. Ubingak pay laeng.”

⁷Ngem kinuna ti APO kaniak, “Dimo kunaen nga ubingka unay; inka ketdi kadagiti tattao a pangibaonak kenka, ket ibagam ti amin nga ibilinko.

⁸Dimo kabuteng ida, ta addaakto a mangsalaknib kenka! Siak, ni Yahweh, ti nagsao iti daytoy.”

⁹Kalpasanna, sinagid ti APO dagiti bibigko, ket kinunana kaniak, “Adtoy, ibagak kenkan ti sawem.

¹⁰Ita nga aldaw, ikkanka iti pannakabalin a mangituray kadagiti pagilian ken pagarian, nga agparut ken agrakrak, agdadael ken agparmek, agbangon ken agmula.”

¹¹Sinaludsod ti APO, “Ania ti makitam, Jeremias?” “Maysa a sanga ti kayo ti almendras,” insungbatko.

¹²Kinuna ngarud ti APO kaniak, “Agpayso ta kunam, ket sisisiputak[1] no matungpal met laeng ti saok wenno saan.”

¹³Sinaludsod manen ti APO kaniak, “Ania pay ti makitam?” “Makitak iti amianan ti maysa a kaldero nga agburburek ti linaonna ken agtingtingigen a sumango ditoy,” insungbatko.

¹⁴Kinunana kaniak, “Adda didigra nga aggapu iti amianan nga agbettak kadagiti amin nga agnaed iti daytoy a daga.

¹⁵Denggem: Ayabak dagiti amin a tattao iti amianan. Umayto dagiti amin nga arida ket ipasdekto ti tunggal maysa ti tronona iti sangoanan ti ruangan ti Jerusalem, iti lawlaw ti bakudna ken iti pay lawlaw dagiti siudad ti Juda.

¹⁶Kastoyto ti panangdusak kadagiti nagbasol a tattao agsipud ta linaksiddak ket nagpuorda iti insenso kadagiti didiosen ken nagdaydayawda kadagiti imahen nga inaramidda.

¹⁷Tumuredka ket inka ibaga kadakuada ti aniaman nga ibilinko. Dimo kabuteng ida, ta no agbutengka, ad-addanto a pagbutngenka iti sangoda.

¹⁸Denggem, Jeremias: Busorendakanto dagiti amin a tattao ditoy daga, kasta met dagiti ari ti Juda, dagiti agtuturay, dagiti papadi ken dagiti tattao. Ngem parmekemto ida. Mayarigkanto iti nasarikedkedan a siudad. Kaskanto iti landok nga adigi ken bakud a bronse. Didakanto maparmek agsipud ta addaakto a mangsalaknib kenka. Daytoy ti sao ni Yahweh.”