Jeremias 17:1-27 RIPV1996 - Bible AI

¹Kuna ti APO, “Dakay a tattao ti Juda, naisurat ti basolyo babaen iti landok a pluma; naikitikit iti pusoyo ken kadagiti sara ti altaryo babaen iti natirad a diamante.

²Malagip dagiti annakyo dagiti altar ken adigi a naipasdek nga agpaay ken ni Asera a diosa iti abay ti tunggal nalangto a kayo, iti rabaw ti turod

³ken iti tapaw dagiti bambantay[15] nga adda iti tay-ak. Pasamsamkonto kadagiti kabusoryo dagiti sanikua ken gamengyo gapu kadagiti amin a basolyo[16] iti entero a daga.

⁴Kapilitan nga isukoyonto ti daga nga intedko kadakayo. Ipaadipenkayto kadagiti kabusoryo iti daga a diyo naam-ammoan agsipud ta kasla apuy ti pungtotko a sumged iti agnanayon.”

⁵Daytoy ti kuna ti APO, “Mailunod ti tao nga umadayo kaniak, agtalek iti padana a tao, ken yadayona ti pusona kaniak.

⁶Mayarig iti kayo iti let-ang, nga agtubo iti natikag a daga, iti naapaya a daga nga awan agtubo, ket awan naimbag a dumteng kenkuana.

⁷“Ngem bendisionak ti tao nga agtalek kaniak.

⁸Arignaⓧ iti kayo a naimula iti asideg ti danum; agturong dagiti ramutna iti waig. Saan nga agbuteng no dumteng ti napudot a tiempo agsipud ta nalangto latta dagiti bulongna. Saan nga agdanag no awan tudo, ket saan a sumardeng nga agbunga.

⁹“Siasino ti makaawat iti puso ti tao? Manangallilaw nga awan kaaspingna; nadagsen ti sakitna ket saan a maagasan.

¹⁰Siak,ⓨ ni Yahweh, ammok ti pampanunoten ti tao; sukimatek ti naguneg iti pusona. Supapakak ti siasinoman a tao, kas mayannurot iti panagbiagna, ket gunggonaak kas mayannurot iti aramidna.”

¹¹Ti tao a sinusuitik ti panagsapulna iti kuarta arigna iti tumatayab a mangukop iti itlog a dina kukua. Mapukaw ti kinabaknangna bayat ti kinaagtutubona, ket agbalin a maag iti kamaudiananna.

¹²Ti santuariotayo arigna iti nadayag a trono a naisaad iti nangato a bantay manipud idi punganay.

¹³Ni Yahweh ti namnama ti Israel; maibabainto ti amin a mangtallikud kenkuana. Agpukawdanto a kas iti nagan a naisurat iti tapok, agsipud ta binaybay-anda ni Yahweh nga ubbog ti danum a sibibiag.

¹⁴Agasannak, O APO, ket maimbaganakto a naan-anay. Isalakannak ket diakto maan-ano. Sika ti idaydayawko!

¹⁵Kuna dagiti tattao kaniak, “Ayandan dagiti pammutbuteng ti APO kadakami? Aramidenna man ngarud ita ta kitaenmi!”

¹⁶Ngem, O APO, diak dinawat a ranggasam ida;[17] diak tinarigagayan nga agrigatda. O APO, ammom daytoy; ammom ti sinaok.

¹⁷Saan koma a sika ti pakaigapuan ti pagbutngak. Sika ti pagkamangak no umay ti rigat.

¹⁸Ibabainmo dagiti mangidadanes kaniak, ngem dinak iramraman. Lapunosem ida iti buteng, ngem dinak butbutngen. Didigraem ken dadaelem ida a mamimpinsan.

¹⁹Kinuna ti APO kaniak, “Jeremias, inka agtakder iti Ruangan dagiti Tattao a serkan wenno ruaran dagiti ari ti Juda no panawanda ti siudad. Kalpasanna, inka kadagiti sabali a ruangan ti Jerusalem.

²⁰Ibagam a denggendak dagiti ari ken dagiti tattao ti Juda, kasta met dagiti amin nga agnaed iti Jerusalem ken dagiti sumrek kadagitoy a ruangan.

²¹Ibagamⓩ a no ilalaenda ti biagda, saanda nga agaw-awit iti aniaman iti Aldaw a Panaginana. Awan koma ti awitda a rummuar kadagiti ruangan ti Jerusalem.

²²Didaⓐ met mangiruar iti aniaman manipud kadagiti balayda iti Aldaw a Panaginana. Saanda nga agtrabaho iti Aldaw a Panaginana. Masapul a ngilinenda daytoy nga aldaw ta nasagradoan kas imbilinko kadagidi kapuonanda.

²³Saandak nga inkaskaso wenno dinengngeg dagiti kapuonanda. Nagbalinda ketdi a nasukir; saanda a nagtulnog kaniak ket dida kinayat ti nagsursuro kaniak.

²⁴“Ibagam kadagitoy a tattao a masapul a tungpalenda ti amin a bilinko. Awan koma ti awitenda nga iruar iti ruangan ti siudad iti Aldaw a Panaginana. Ngilinenda daytoy nga aldaw, ket masapul a dida agtrabaho.

²⁵Iti kasta, sumrekto dagiti ari ken dagiti prinsipe iti ruangan ti Jerusalem, ket agturaydanto a kas ken ni David. Agkukuyogdanto kadagiti tattao ti Juda ken Jerusalem a nakalugan kadagiti lugan a pakigubat ken nakasakay kadagiti kabalio ket kanayonto a mapno ti Jerusalem iti tao.

²⁶Umayto dagiti tattao nga agnaed kadagiti il-ili ti Juda, kadagiti luglugar iti kabangibang ti Jerusalem, iti sakup ni Benjamin, kadagiti turturod ken bambantay ken iti Negeb. Mangyegdanto kadagiti daton a mapuoran, sakrifisio, daton a makan, insenso ken daton a pagyaman iti Templok.

²⁷Ngem masapul nga agtulnogda kaniak, ket ngilinenda ti Aldaw a Panaginana a kas nasagradoan nga aldaw. Saanda nga agawit iti uray ania nga iruar kadagiti ruangan ti Jerusalem iti dayta nga aldaw. Ta no saanda a tungpalen dagitoy, puorakto dagiti ruangan ti Jerusalem. Mauramto dagiti palasio ti Jerusalem, ket awanto ti makaiddep iti apuy.”