Jeremias 20:1-18 RIPV1996 - Bible AI

¹Maysa a padi ni Pasur nga anak ni Immer. Isu ti kangatoan nga agturay iti Templo. Idi mangngegna ti panangiwaragawagko kadagitoy,

²pinasaplit ken pinakawarannak sanak pinaipan iti akingngato a Ruangan ti Benjamin iti Templo.

³Iti sumuno a bigat, kalpasan a winayawayaannak ni Pasur, kinunak kenkuana, “Saan a Pasur ti impanagan ti APO kenka no di ket ‘Pagbutbutngan iti amin a Lugar.’

⁴Daytoy ti kinuna ti APO, ‘Aramidenka a pagbutbutngan, ket kabutengmonto ti bagim. Kabutengnakanto met dagiti gagayyemmo. Makitamto amin ida a matay iti kampilan dagiti kabusorda. Yawatkonto amin a tattao ti Juda iti pannakabalin ti ari ti Babilonia. Addanto dagiti italawna nga ipan a balud idiay Babilonia ket papatayennanto dagiti dadduma.

⁵Pasamsamkonto kadagiti kabusorda ti amin a kinabaknang daytoy a siudad. Pasamsamkonto met dagiti napateg a sanikuada ken uray pay dagiti napateg a gameng dagiti ari ti Juda. Ipandanto idiay Babilonia.

⁶Ket sika, Pasur, matiliwkanto ken ti familiam sakayto maipan idiay Babilonia. Sadiayto ti pakatayan ken pakaitanemanyo, agraman dagiti amin a gagayyemmo a nangibagbagaam iti adu a kinaulbod.’”

⁷O APO, inuyotannak, ket naallilawak. Napigpigsaka ngem siak ket pinarmeknak. Rabrabakendak dagiti tattao, agmalmalem a katkatawaandak.

⁸Tunggal agsaoak, ipukkawko ti panangbabalawko iti kinaranggas ken pannakadadael. O APO, kanayon nga uyawen ken rabrabakendak, agsipud ta ipakaammok ti saom.

⁹Ngem no kunak, “Lipatekon ti APO ket diakton agsao iti naganna,” isu metten a kasla apuy a gumil-ayab ti mensahem iti kaunggak. Diak magawidanen ti bagik, ket masapul nga ipakaammok.

¹⁰Mangngegko ti ibagbaga dagiti tattao, “Adda ti pagbutbutngan iti amin a disso. Ipulongtayo kadagiti agtuturay!” Uray dagiti nasinged a gagayyemko, ur-urayenda ti pannakatnagko. Kunada, “Nalabit a maallilawto, tiliwentayo ket makaibalestayo.”

¹¹Ngem sika ti kaduak, O APO, maingel ken nabilegka, ket dinto agballigi dagiti mangidadanes kaniak. Dinto agpatingga ti pannakaibabainda, agsipud ta saanda a makapagballigi. Saanto a malipatan ti pannakaibabainda.

¹²Ngem nalinteg ti panangsuotmo iti tao, O APO a Mannakabalin-amin, ammom ti adda iti puso ken panunotna. Ipakitam ti panangbalesmo kadagiti kabusorko, agsipud ta intalekko kenka ti parikutko.

¹³Kantaanyo ti APO! Idaydayawyo ti APO! Ispalenna dagiti maidadanes iti pannakabalin dagiti managdakdakes.

¹⁴Mailunodⓓ koma ti aldaw a pannakayanakko! Malipatan koma ti aldaw a pannakaipasngayko!

¹⁵Mailunod koma ti tao a nangipadamag iti amak, “Addan anakmo, maysa a lalaki!” Anian a ragsak idi ni amak a nakadamag.

¹⁶Mayarig koma dayta a tao kadagiti siudad a dinadael ken saan a pinakawan ni Yahweh. Mangngegna koma ti nasaem a sangit iti bigat ken ti daranudor ti gubat iti tengnga ti aldaw,

¹⁷gapu ta dinak pinatay sakbay a naipasngayak. Nagbalin koma a tanemko ti tian ni inak.

¹⁸Apay pay laeng a nayanakak? Tapno agrigat ken agladingitak? Tapno agpatingga ti biagko iti pannakaibabain?