Jeremias 21:1-14 RIPV1996 - Bible AI

¹Imbaon ni Ari Zedekias nga umay kaniak da Pasur nga anak ni Malkias ken Sofonias a padi nga anak ni Maaseyas tapno kiddawenda:

²“Ikararagannakamiⓔ koma iti APO, ta gubatennakami ni Nebucadnesar nga ari ti Babilonia. Agdawatka kenkuana bareng no agaramid iti milagro ket pilitenna nga agsanud ni Nebucadnesar.”

³Nagsao kaniak ti APO ket imbagak kadagiti lallaki a naibaon kaniak

⁴nga ibagada ken ni Zedekias ti kinuna ti Apo a DIOS ti Israel, “Zedekias, parmekek ti armadam a makigubgubat iti ari ti Babilonia ken ti armadana. Urnongekto dagiti armasda iti sentro ti siudad.

⁵Siak a mismo ti manggubat kadakayo iti amin a pigsak, amin a pungtotko, rungsot ken ungetko.

⁶Patayekto dagiti amin nga agnaed iti daytoy a siudad; matayto dagiti tattao ken animal iti nakaro a sakit.

⁷Patiliwkonto ni Zedekias nga ari ti Juda, dagiti ofisialesna ken dagiti tattao a makalasat iti gubat, bisin ken sakit. Tiliwento ida ni Ari Nebucadnesar ken dagiti kabusorda nga agtarigagay a mangpatay kadakuada. Papapataynanto ida ket awanto ti ispalen wenno kaasianna. Siak, ni Yahweh, ti nagsao iti daytoy.”

⁸Kalpasanna, kinuna ti APO nga ibagak daytoy kadagiti tattao, “Dumngegkayo! Siak ni Yahweh. Pagpilienkayo iti dalan nga agturong iti biag wenno dalan nga agturong iti patay.

⁹Siasinoman nga agbati iti siudad, matayto iti gubat wenno iti bisin, wenno iti sakit. Ngem ti rummuar ket sumuko kadagiti taga-Babilonia a madama ti panangdarupda iti siudad, maispalto ti biagna.

¹⁰Inkeddengko a diak ilalaen daytoy a siudad no di ket dadaelek. Mayawatto iti ari ti Babilonia ket puorannanto agingga a dumapu. Siak, ni Yahweh, ti nagsao iti daytoy.”

¹¹Imbaga kaniak ti APO nga ipakaammok daytoy a mensahe kadagiti puli dagiti ari ti Juda, dagiti kaputotan ni Ari David: “Dumngegkay iti ibagak. Siak ni Yahweh. Kitaenyo a maipakat ti hustisia iti inaldaw. Salaknibanyo ti tao nga idadanes ti padana a tao. No diyo isardeng daytoy dakes nga aramidyo, gumil-ayabto ti pungtotko, kas iti apuy a di maiddep.

¹³Sika, Jerusalem, agtugtugawka[18] iti ngatoen dagiti tanap, kas iti dakkel a bato iti patad. Ngem gubatenkanto. Kunam nga awan makabalin a dumarup kenka wenno makastrek kadagiti sarikedkedmo.

¹⁴Ngem dusaenkanto gapu iti aramidmo. Puorakto ti palasiom ket padapuekto ti amin nga adda iti lawlawna. Siak, ni Yahweh, ti nagsao iti daytoy.”