Jeremias 22:1-30 RIPV1996 - Bible AI

¹Binilinnak ti APO a mapan iti palasio ti ari ti Juda, ti kaputotan ni David, ket ibagak iti ari, agraman ofisialesna ken tattao ti Jerusalem nga ipangagda ti sao ti APO. Daytoy ti paibagana:

³“Siak, ni Yahweh, ibagak nga aramidenyo ti nalinteg ken naimbag. Salaknibanyo ti tao nga idadanes ti padana a tao. Diyo ranggasan wenno parigaten dagiti ganggannaet, dagiti ulila wenno dagiti balo. Diyo patayen ditoy nasantoan a lugar dagiti awan basolna.

⁴No pudno nga aramidenyo dagiti imbilinko, agtultuloyto nga agari dagiti kaputotan ni David. Ket sumrekdanto iti daytoy a palasio a nakasakay kadagiti lugan a pakigubat ken kabalio a kaduada dagiti ofisiales ken dagiti tattaoda.

⁵Ngemⓕ no diyo tungpalen ti saok, isapatak a madadaelto daytoy a palasio. Siak, ni Yahweh, ti nagsao iti daytoy.

⁶“Ibilangko a napintas ti palasio ti Juda a kas iti Galaad ken iti Bantay Libano, ngem paglangalangekto agingga nga awan ti agnaed.

⁷Mangibaonakto kadagiti mangrebba iti palasio. Ikuyogdanto dagiti wasayda a pangpukan kadagiti napintas a kayo ti sedro ket puorandanto.

⁸“Kalpasanna, lumabasto ti adu a ganggannaet. Agsisinnaludsoddanto no apay a siak, ni Yahweh, inaramidko ti kasta iti daytoy dakkel a siudad.

⁹Wen, ta binaybay-anyo ti katulaganyo kaniak a Diosyo ket nagdaydayaw ken nagserbikayo kadagiti sabali a dios.”

¹⁰Tattao ti Juda, diyo sangitan ni Ari Josias, saanyo a dung-awan ti ipapatayna. Sangitanyo ketdi iti napait ni Sallum[19] nga anakna, ta ipanawdan ket saanton nga agsubli, saannanton a makita ti daga a nakayanakanna.

¹¹Kunaⓖ ti APO maipapan ken ni Sallum a nangsukat ken ni Josias nga amana nga ari ti Juda, “Awanen ditoy ket dinto agsublin.

¹²Matayto iti daga a nangipananda kenkuana ket dinanton makita daytoy a daga.”

¹³Asi pay ti tao a sinusuitik ti panagbalayna ken sinasaur ti panangpadakkelna iti taengna. Pagtrabahoenna dagiti kaarrubana ngem dina tangdanan ida.

¹⁴Asi pay ti tao nga agkuna nga agpatakder iti palasiona a nalawa dagiti akingngato a kuartona. Agpaaramid kadagiti tawa a sedro dagiti rikepna, ket papintaanna iti nalabaga.

¹⁵No sedro ti tarikayo ti balaymo ket napimpintas ngem ti balay dagiti kaarrubam, ipagarupmo kadi a maysakan nga ari? Nagpapas ni amam iti naragsak a panagbiag. Kanayon a nalinteg ti aramidna ken awan idumdumana ket rimmang-ay iti amin nga aramidna.

¹⁶Impaayna ti kalintegan dagiti napanglaw, ket awan nakaan-anoanna. Kastoy ti kaipapanan ti pannakaammo ken ni Yahweh.

¹⁷Ngem pagimbagam la ti pampanunotem; patayem dagiti awan basolna, ket parigatem dagiti tattaom. Daytoy ti sao ti APO.

¹⁸Isut'ⓗ gapuna a kuna ti APO maipapan iti ari ti Juda, ni Jehoyakim nga anak ni Josias, “Awanto ti mangdung-aw iti ipapatayna. Awanto met ti agkuna, ‘Ania ket ti gasatmon, gayyem! Ania ket ti gasatmon!’ Awanto ti agladingit wenno agsangit nga agkuna, ‘Ania ket ti gasatmon, apok ken arik!’

¹⁹Maitanemto a kasla natay nga asno, ulodendanto a yadayo sadanto ipurruak iti ruar dagiti ruangan ti Jerusalem.”

²⁰Tattao ti Jerusalem, sumang-atkayo idiay Bantay Libano ket agpukkawkayo. Inkay idiay Basan ket agsangitkayo. Inkay kadagiti bambantay ti Moab ket agpukkawkayo agsipud ta naparmek dagiti amin a kakaduayo.

²¹Nagsao ti APO kenka idi narang-ayka, ngem saanka a dimngeg. Kastoy ti inar-aramidmo iti unos ti panagbiagmo, pulos a dika nagtulnog iti APO.

²²Itayabto ti angin dagiti pangulom, agbalinto dagiti kakaduam a balud iti gubat. Maibabainto ti siudadmo, ket mariribukkanto gapu iti amin a kinadakesmo.

²³Nagtalgedka kadagiti sedro a naggapu idiay Libano. Ngem nakakaasikanto inton dumteng ti rigatmo, a kas iti rigat ti agpasikal.

²⁴Kinunaⓘ ti APO ken ni Jeconias[20] nga anak ni Jehoyakim nga ari ti Juda, “Uray sika ti singsing a tanda nga adda iti makannawan nga imak, siak a sibibiag a Dios, isapatak a lapsutenkanto,

²⁵ket yawatkanto kadagiti tattao a kabutbutengmo nga agtarigagay a pumatay kenka. Itedkanto ken ni Nebucadnesar nga ari ti Babilonia ken kadagiti soldadona.

²⁶Ibellengkayto nga agina iti sabali a daga a saanyo a nakayanakan, ket mataykayto sadiay.

²⁷Tarigagayanyo a makita manen daytoy a pagilian, ngem pulos a dikayton makasubli.”

²⁸Kinunak, “Nagbalin kadi ni Jeconias a kasla buong a karamba? Naibelleng ket awanen ti mangayat? Daytoy kadi ti gapu no apay a naipanaw agraman dagiti annakna ket naipanda iti daga a saanda pay a nadamdamag?”

²⁹O daga, daga, daga! Denggem ti kuna ti APO:

³⁰“Naikari nga awanto ti anak daytoy a lalaki, pulos a dinto agballigi. Awanto ti kaputotanna nga agari a kas ken ni David, ken agturay iti Juda. Siak ni Yahweh, ti nagsao iti daytoy.”