Jeremias 23:1-40 RIPV1996 - Bible AI

¹Asi pay dagiti agtuturay a mangipalubos a mapapatay ken maiwarawara dagiti tattaok.

²Daytoy ti kuna ti Apo a DIOS ti Israel kadagiti agturay a rumbeng a mangaywan kadagiti tattaona, “Winarawara ken pinapanawyo dagiti tattaok. Diyo inaywanan ida. Ita, dusaenkayo gapu kadagiti dakes nga inaramidyo.

³Ayabakto dagiti natda a tattaok kadagiti daga a nangiwaraak kadakuada ket isublikto ida iti dagada. Adunto dagiti annakda, ket umadudanto.

⁴Mangisaadakto kadagiti agtuturay a mangaywan kadakuada. Saandanton a mabuteng wenno agamak dagiti tattaok ket saankonton a dusaen ida.[21] Siak, ni Yahweh, ti nagsao iti daytoy.”

⁵Kunaⓙ ti APO, “Umayen ti tiempo a panangpilik iti pagbalinek nga ari nga agtaud iti kaputotan ni David. Agturayto a sisisirib daytoy nga ari ket aramidennanto ti naimbag ken nalinteg iti entero a daga.

⁶Bayat ti panagturayna, natalgedto dagiti tattao ti Juda ket awanto ti pagpeggadan dagiti Israelita. Panaganandanto dayta nga ari iti ‘Ti APO a Nangisalakan Kadatayo.’

⁷“Umayen ti tiempo a saanton nga aramaten dagiti tattao ti naganko a sibibiag a Dios a pagsapata, siak a nangiruar kadagiti Israelita manipud Egipto.

⁸Pagsapatadanto ketdi ti naganko a sibibiag a Dios a nangiruar kadagiti Israelita manipud kadagiti pagilian iti amianan, ken manipud kadagiti amin a lugar a nangiwarawaraak kadakuada. Agnaeddanto iti bukodda a daga.”

⁹Nadagsen ti barukongko ket agpigergerak. Gapu iti APO, wen, gapu iti nasantoan a saona, kaslaak la nabartek a lalaki, kaslaak la nakainum iti adu nga arak.

¹⁰Napno ti daga iti tattao a nangtallikud iti APO. Dakes ti panagbiagda ket saan a nasayaat ti panangusarda iti bilegda. Agdung-aw ti daga gapu iti panangilunod ti APO ket magango dagiti ruot iti pagaraban.

¹¹Kuna ti APO, “Agpapada dagiti profeta ken dagiti papadi a di agbuteng iti Dios. Naduktalak ida nga agar-aramid iti dakes iti mismo nga uneg ti Templo.

¹²Nagalis ken nasipngetto ti dalanda; itublakkonto ida ket matuangda. Idissuorkonto ti didigra kadakuada; umadanin ti tiempo a pannakadusada. Siak, ni Yahweh, ti agsasao.

¹³Nakitak ti panagbasol dagiti profeta ti Samaria: nagsaoda iti nagan ni didiosen a Baal, ket inyaw-awanda dagiti tattaok nga Israelita.

¹⁴Ngemⓚ nakitak a nakarkaro ti aramid dagiti profeta ti Jerusalem: makikamalala ken agulbodda; tulonganda dagiti tattao nga agaramid iti dakes, isut' gapuna nga awan kadakuada ti agsardeng nga agaramid iti saan a rumbeng. Iti imatangko, dakesda a kas kadagiti tattao iti Sodoma ken Gomorra.

¹⁵“Iti kasta, siak, ni Yahweh a Mannakabalin-amin, ibagak daytoy a maibusor kadagiti profeta ti Jerusalem: ‘Pakanekto ida iti napait a mula, painumekto ida iti nasabidongan a danum. Ngamin, insaknapda ti saan a nadiosan nga aramid iti entero a daga.’”

¹⁶Kuna ti APO a Mannakabalin-amin kadagiti tattao ti Jerusalem, “Pasig nga ulbod ti ipanamnama kadakayo dagiti profeta. Diyo ipangag ida ta ibagada dagiti arapaapda. Saan a nagtaud kaniak ti sasawenda.

¹⁷Ibagbagada kadagiti tattao, dagiti tattao a saan a dumngeg iti saok, nga awanto ti pakaan-anoanda. Ibagada kadagiti nasukir nga awanto ti didigra a dumteng kadakuada.”

¹⁸Kinunak, “Awan kadagitoy a profeta ti nakaammo kadagiti palimed ti APO. Awan kadakuada ti nakangngeg wenno nakaawat iti mensahena. Awan kadakuada ti nangipangag ken nangtungpal iti saona.

¹⁹“Nadawel a bagio ti kayarigan ti pungtot ti APO. Kasla allawig a bumtak iti ulo dagiti managdakdakes.

²⁰Saan nga agsardeng no dina maibanag ti amin a panggepna nga aramiden. Iti masakbayan, nalawag a maawatanto daytoy dagiti tattaona.”

²¹Kinuna ti APO, “Diak imbaon dagitoy a profeta ngem napanda latta. Awan ti mensahe nga intedko kadakuada, ngem nagsaoda latta iti naganko.

²²No naammoanda ti palimedko, impakaammoda koma ti saok kadagiti tattaok tapno pagpanawanda ti dakes a biagda ken dagiti dakes nga aramidda.

²³“Siak ti Dios nga adda iti amin a lugar. Saan la a maymaysa a disso ti ayanko.

²⁴Awan ti makapaglemmeng iti disso a diak makita. Diyo kadi ammo nga addaak iti amin a lugar idiay langit ken ditoy daga?

²⁵Nangngegko ti kuna dagitoy a profeta nga agsao iti ulbod iti naganko. Ibagada nga impakaammok kadakuada dagiti mensahek iti tagtagainepda.

²⁶Kasano pay kabayag ti panangyaw-awan dagitoy a profeta kadagiti tattaok babaen kadagiti sao a pinarboda?

²⁷Ipagarupda a gapu kadagiti tagtagainepda, malipatandak dagiti tattaok a kas iti pananglipat kaniak dagidi kapuonanda ket simmurotda ken ni didiosen a Baal.

²⁸Ti profeta a nagtagtagainep, ibagana koma a tagainepna laeng, ket ti profeta a nakangngeg iti imbagak, ipakaammona koma a sipupudno ti mensahek. Ania aya ti arutang no maidilig iti trigo?

²⁹Kasla apuy ken martilio ti saok a mangburak iti bato.

³⁰Busorek dagiti profeta a mangibalikas iti sao ti padada a profeta sada ibaga a saok.

³¹Busorek pay dagiti profeta nga agsao iti saoda met laeng ket ibagada a naggapu kaniak.

³²Imdenganyo ti kunak. Siak ni Yahweh. Busorek dagiti profeta a mangibaga iti tagtagainepda a pasig nga ulbod. Saritaenda dagitoy a tagtagainep ket yaw-awanda dagiti tattaok babaen iti panagulbod ken panagpangasda. Diak imbaon wenno imbilin a mapanda. Saanda a makatulong kadagiti tattaok. Siak, ni Yahweh, ti nagsao iti daytoy.”

³³Kuna ti APO, “Jeremias, no saludsoden ti maysa kadagiti tattaok wenno profeta wenno padi no ania ti bilinko, kastoy ti ibagam, ‘Dakayo ti dadagsenna[22] ti APO ket ibellengnakayo.’

³⁴No adda maysa kadagiti tattaok wenno profeta wenno padi nga agkuna iti, ‘Dadagsen ti APO,’ dusaekto dayta a tao agraman ti familiana.

³⁵Kastoy koma ketdi ti sawen ti tunggal maysa iti gayyem wenno kabagianna, ‘Ania ti sungbat ti APO? Ania ti kinuna ti APO?’

³⁶Iti kasta, saandan a kunkuna a makapadagsen ti mensahek agsipud ta no adda mangibaga iti daytoy, pagbalinek ti mensahek a pudno a dadagsen kenkuana. Binallikug dagiti tattao ti sao ti Diosda, ti sibibiag a Dios, ni Yahweh a Mannakabalin-amin.

³⁷Jeremias, saludsodem kadagiti profeta, ‘Ania ti insungbat ti APO kadakayo? Ania ti imbaga ti APO?’

³⁸No kunada, ‘Makapadagsen ti mensahe ti APO,’ ibagam kadakuada a gapu ta kinunada a daytoy idinto nga imbagak a dida ibaga,

³⁹pidutekto ida[23] nga ipalladaw iti adayo kaniak, isuda ken ti siudad nga intedko kadakuada ken kadagidi kapuonanda.

⁴⁰Idissuorkonto kadakuada ti agnanayon a pannakaibabain ken pannakaumsi a dinto malipatan.”