Jeremias 48:1-47 RIPV1996 - Bible AI

¹Daytoyⓑ ti kinuna ni Yahweh a Mannakabalin-amin maipapan iti Moab: “Asi pay dagiti tattao ti Nebo— nadadaelen ti ilida! Naparmeken ti Kiriataim, narban ti nabileg a sarikedkedna. Naibabainen dagiti tattaona,

²awanen ti dayag ti Moab. Sinakup dagiti kabusor ti Hesbon, ket nagtutulagda a dadaelenda ti nasion ti Moab! Mapaulimekto ti ili a Dibon; rautento dagiti kabusor.

³Ipukkaw dagiti taga-Horonaim, ‘Anian a panagranggas! Anian a panagdadael!’

⁴“Nadadaelen ti Moab; denggenyo dagiti ubbing nga agsasangit.

⁵Denggenyo ti an-anug-ogda iti sang-atan nga agpa-Luhit. Denggenyo ti nasaem a sangsangit ti panagsagaba, iti salogan nga agpa-Horonaim.

⁶‘Agtaraykayo! Isalakanyo ti bagiyo!’ kunada. ‘Agtaraykayo a kasla atap nga asno iti let-ang!’

⁷“Moab, nagtalekka idi iti pigsa ken kinabaknangmo, ngem uray sika maipanawkanto. Maitalawto ni Kemos a didiosen, agraman dagiti prinsipe ken papadina.

⁸Awanto ti ili a makalisi iti pannakadadael; agpadpadanto a madadael ti tanap ken ti patad. Siak, ni Yahweh ti nagsao.

⁹Ikkanyo ti Moab iti payak tapno agtalaw. Aglangalangto dagiti il-ilina, ket awanton ti agnaed kadakuada.”

⁹(

¹⁰Mailunod ti tao a saan a mangipapuso nga agtrabaho iti aramid ni Yahweh. Mailunod ti tao a saan a mangaramat iti kampilanna nga agpapatay!)

¹¹Kuna ni Yahweh, “Kanayon a natalged idi ti panagbiag ti Moab. Pulos a saan a naitalaw a kas balud. Kasla arak a nagarinsaed ket saan a nagargaraw. Saan a nayal-alis kadagiti burnay. Saan a nagbaliw ti ingelna ken ti sigud a ramanna.

¹²“Ngem, dumtengen ti tiempo a panangibaonko kadagiti tattao a mangibukbok iti Moab a kasla arak. Ipakbodanto amin ti arak ket burakburakenda pay dagiti burnay a nagyananna.

¹³Maupayto dagiti Moabita ken ni Kemos a didiosenda a kas iti pannakaupay dagiti Israelita ken ni Betel a didiosen a nagtalkanda.

¹⁴Apay a kunayo a bannuarkayo, lallaki ti Moab, natutured a soldado a natenneb iti gubat?

¹⁵Nadadaelen ti Moab ken dagiti siudadna, narangrangkayen dagiti kalaingan nga agtutubona. Daytoy ti sao ti Ari, ni Yahweh a Mannakabalin-amin.

¹⁶Asidegen ti panungpalan ti Moab; dandanin ti pannakarbana.

¹⁷“Sangitanyo dayta a nasion, dakayo a kaarrubana, dakay amin a mangbigbig kenkuana. Kunayo, ‘Nagpatinggan ti mannakabalin a turayna; awanen ti dayag ken bilegna.’

¹⁸Dakayo nga agnanaed idiay Dibon, bumabakayo iti nadayag a saadyo, ket agdalupisakkayo iti tapok. Adda ditoyen ti mangdadael iti Moab, rinebbekna dagiti sarikedkedna.

¹⁹Dakayo nga agnanaed idiay Aroer, agtakderkayo iti igid ti kalsada ket aguraykayo; saludsodenyo iti siasinoman nga aglibas no ania ti napasamak.

²⁰‘Naparmeken ti Moab,’ kunadanto. ‘Sangitanyo ta naibabainen. Ipakaammoyo kadagiti lugar iti igid ti Karayan Arnon a nadadaelen ti Moab.’

²¹“Dimtengen ti pannakaukom dagiti siudad iti tanap: ti Holon, Jaza, Mefat,

²²Dibon, Nebo, Bet-diblataim,

²³Kiriataim, Bet-gamul, Bet-meon,

²⁴Keriot ken Bozra. Dimtengen ti pannakaukom dagiti amin a siudad ti Moab nga adda iti adayo wenno asideg.

²⁵Naparmeken ti bileg ti Moab. Nadadaelen ti pannakabalinna. Siak, ni Yahweh, ti nagsao iti daytoy.”

²⁶Kinuna ni Yahweh, “Bartekenyo ti Moab agsipud ta sinukirnak. Aglugnakto iti mismo a saruana ket katawaanto dagiti tattao.

²⁷Moab, malagipmo ti panangrabrabakmo idi kadagiti Israelita? Imbilangmo ida a kasla ketdin tiniliw ida ti bunggoy dagiti tulisan.

²⁸“Dakayo nga agnaed iti Moab, panawanyon dagiti il-iliyo! Inkay agnaed kadagiti rangrangkis! Tuladenyo ti kalapati nga agumok kadagiti rangrangkis.

²⁹Natangsit unay ti Moab! Nadamagko ti kinatangsit, kinapalangguad ken kinakuspag dagiti tattaona. Nangato ti pangipagpagarupanda iti bagida.

³⁰Siak, ni Yahweh, ammok ti kinapalangguadda. Awan serserbi ti kinapangasda ket saanto nga agbayag dagiti aramidda.

³¹Iti kasta, dung-awakto ti entero a Moab ken dagiti tattao ti Kirheres.

³²Ad-addanto a dung-awak dagiti taga-Sibma ngem dagiti taga-Jazer. Siudad a Sibma, kaska la lanut a bumallasiw ti sangana iti Natay a Baybay ket dumanon idiay Jazer. Ngem ita, nadadaelen dagiti bungbungam iti kalgaw ken dagiti ubasmo.

³³Awanen ti ragsak ken rag-o iti nadam-eg a daga ti Moab. Saanen nga agayus ti arak ti pagpespesan iti arak. Awanen ti agaramid iti arak ken umkis iti rag-o.

³⁴“Agsangit dagiti tattao ti Hesbon ken Eleale. Mangngeg ti sangsangitda agingga idiay Jaaz. Mangngeg met dagiti adda idiay Zoar, idiay Horonaim ken idiay Baro nga Eglat. Nagmaga payen ti Waig Nimrim.

³⁵Pasardengekto dagiti tattao ti Moab nga agidatag iti daton a mapuoran kadagiti nangato a lugar, ken agidaton iti sakrifisio kadagiti didiosenda. Siak, ni Yahweh, ti agsasao.

³⁶“Iti kasta, agladingit toy pusok gapu iti Moab ken kadagiti tattao ti Kirheres; arigko iti maysa nga agtuktokar iti kanta ti pumpon agsipud ta napukaw aminen a sanikuada.

³⁷Nagpakuskos ti tunggal maysa ket nagibarbasda. Sinugsugatda dagiti imada. Nagarruatda iti nakersang a lupot a mangipakita iti panagbabawida.

³⁸Pasig a dung-aw ti mangngeg iti tuktok dagiti balbalay ken kadagiti kalkalsada ta binurakko ti Moab a kasla burnay nga awan mangipateg.

³⁹Narpuogen ti Moab. Agdung-awkayo! Inlingednan ti rupana gapu iti bain. Nadadaelen ket pagang-angawanen dagiti kabangibangna a nasion. Siak, ni Yahweh, ti agsasao.”

⁴⁰Inkari ni Yahweh nga addanto nasion a kasla agila a mangsippayot iti Moab.

⁴¹Sakupennanto dagiti il-ili ken sarikedkedna. Iti dayta nga aldaw, agdanagto dagiti soldado ti Moab a kasla iti panagdanag ti agpasikal.

⁴²Madadaelto ti Moab ket saanton a nasion agsipud ta sinukirnak.

⁴³Pammutbuteng, abut ken palab-og ti naisagana kadagiti tattao ti Moab. Daytoy ti sao ni Yahweh.

⁴⁴Inkeddengkon ti pannakadadael ti Moab. Ti makalisi iti pammutbuteng matnagto iti abut. Ti makaruar iti abut, maipalab-ogto.

⁴⁵Agkamang idiay Hesbon dagiti nakakaasi a nagbakwit. Ngem uray ti siudad ti Hesbon nga inturayan idi ni Ari Sihon, maur-uramen. Napuoranen dagiti beddeng ken dagiti kabambantayan dagiti Moabita a naayat iti gubat.

⁴⁶Asi pay dagiti taga-Moab! Nadadaelen dagiti nagdaydayaw ken ni Kemos. Naitalaw dagiti annakda ket naipanda a kas balud iti sabali a daga.

⁴⁷Ngem iti masakbayan, parang-ayento manen ni Yahweh ti Moab. Amin dagitoy ket imbaga ni Yahweh a mapasamak iti Moab.