Jeremias 6:1-30 RIPV1996 - Bible AI

¹Tattao ti Benjamin, panawanyo ti Jerusalem! Isalakanyo dagiti bagbagiyo! Puyotenyo ti trumpeta idiay Tekoa! Mangikabilkay iti pagilasinan idiay Bet-hakerem! Adda didigra ken pannakadadael nga aggapu iti amianan.

²Napintas a siudad ti Sion, ngem madadaelto;

³agkamponto sadiay dagiti ar-ari ken dagiti armadada. Ipatakderdanto dagiti toldada iti lawlaw ti siudad ket agkamponto ti tunggal maysa iti disso a kaykayatna.

⁴Kunadanto, “Agsaganakay a manggubat iti Jerusalem! Darasenyo! Dumaruptay iti tengnga ti aldaw!” Ngem kunadanto, “Naladawen, ta dandani lumneken ti init ket umat-atiddogen dagiti anniniwan.

⁵Dumaruptayo ita a rabii; dadaelentayo dagiti sarikedked ti siudad.”

⁶Imbilin ti APO a Mannakabalin-amin kadagitoy nga ari nga agpukanda kadagiti kaykayo ket pagtutuonenda a panglakub iti Jerusalem. Kinunana, “Dusaek daytoy a siudad gapu ta bin-ig a panangidadanes ti adda kenkuana.

⁷Kas iti panagubbog ti bubon, kasta met ti panagubbog ti kinadakes iti Jerusalem. Iti siudad, mangngegko ti uni ti panagdadael ken panagranggas; pasig a masakit ken nasugatan ti makitkitak.

⁸Dakayo a taga-Jerusalem, pakaballaaganyo koma dagitoy a didigra amangan no panawankayo. Pagbalinek a disierto ti siudadyo, maysa a lugar nga awanto ti agnaed.”

⁹Kinuna kaniak ti APO a Mannakabalin-amin, “Awanto ti matda iti Israel. Maikisapto a kas iti kaubasan a naburas amin a bungana. Ngarud, ispalem ti tunggal maysa ita ta adda pay tiempo.”

¹⁰Insungbatko, “Siasino koma ti dumngeg kaniak no agsaoak kadakuada ket ballaagak ida? Nasubegda ket saanda a kayat ti dumngeg iti mensahem. Katawaanda ti kayatmo nga ibagak kadakuada.

¹¹O APO, mariknak met a gumil-ayab iti unegko ti pungtotmo kadakuada; saankon a maitured.”

¹¹Kinuna ngarud ti APO, “Idissuormo ti pungtotko kadagiti ubbing iti kalsada ken kadagiti ummong dagiti lallaki nga agtutubo. Maipanawto dagiti agassawa ken uray pay dagiti babbaket ken lallakay.

¹²Alaentoⓖ dagiti ganggannaet dagiti balbalayda, kasta met dagiti taltalon ken dagiti assawada. Dusaekto dagiti tattao iti daytoy a daga.

¹³Nanumo man wenno nangato a tao, kayatda ti bumaknang iti saan a nalinteg a pamuspusan. Uray dagiti profeta ken papadi saurenda dagiti tattao.

¹⁴Agtignaydaⓗ a kasla ketdin garadgad laeng dagiti sugat dagiti tattaok. Kunada nga awan pagdanagan idinto nga awan met talna.

¹⁵Nagbainda kadi idi inaramidda dagitoy makarimon a bambanag? Saan! Pulos a dida nagbain; dida pay ammo ti rikna ti mabainan. Iti kasta, mapasagdanto a kas kadagiti dadduma inton dusaek ida ket daytanton ti paggibusanda. Siak, ni Yahweh ti agsasao.”

¹⁶Kinunaⓘ ti APO kadagiti tattaona, “Agtakderkayo iti nagkurosan ti kalsada ket iwarasyo ti panagkitayo. Saludsodenyo no sadino ti ayan dagiti kadaanan a dalan ken ti kapintasan a pagnaan. Magnakayo iti daytoy ket agbiagkayto iti urnos ken talna.” Ngem kinunada, “Saankami a magna iti dayta a dalan.”

¹⁷Kalpasanna, nangdutok ni Yahweh kadagiti guardia a mangdengngeg iti ballaag ti trumpeta. Ngem kinunada, “Saanmi a kayat a denggen.”

¹⁸Kinuna ngarud ti APO, “Dumngegkayo, dakayo a nasion, ket ammoenyo no anianto ti mapasamak kadagiti tattaok.

¹⁹Dumngegka, daga! Kas dusa a maipatay kadakuada gapu kadagiti dakes nga aramidda, yegko ti pannakadadael kadagitoy a tattao. Ngamin ta dida tinungpal dagiti saok, ket linaksidda ti pannursurok.

²⁰Ania ti gapuna a yegda kaniak dagiti insenso a naggapu idiay Seba wenno bangbanglo a naggapu iti adayo a daga? Diak awaten dagiti datonda ket diak maay-ayo kadagiti sakrifisioda.

²¹Iti kasta, mangikabilakto iti pakaitibkolan dagitoy a tattao, ket maitublakdanto. Matayto dagiti amma ken dagiti annakda, kasta met dagiti aggagayyem ken agkakaarruba.”

²²Kuna ti APO, “Adda tattao nga aggapu iti pagilian iti amianan; adda nabileg a nasion nga agsagsagana a makigubat.

²³Nagtagipana ken nagtagikampilanda; naranggas ken awan asida. Kasla daranudor ti taaw ti dalagudog dagiti kabalio a nagsakayanda. Sisasaganada a manggubat iti Jerusalem.”

²⁴Kuna dagiti tattao ti Jerusalem, “Nangngegmi ti damag, ket nalpaykami. Kasta unay ti butengmi, mariknami ti ut-ot a kas iti ut-ot ti agpasikal.

²⁵Dimi maitured ti mapan kadagiti away wenno magna kadagiti kalkalsada. Ngamin, nakaarmas dagiti kabusor, ket nakabutbuteng ti aglawlaw.”

²⁶Kuna ti APO kadagiti tattaona, “Agarruatkayo iti nakersang a lupot, dakayo a tattaok, ket agtulidtulidkay iti dapu. Agdung-awkayo a kasla natay ti kakaisuna nga anakyo. Agsangitkayo iti napait, gapu ta kellaatto a rumaut ti mangdadael kadakayo.

²⁷Jeremias, inaramidka a manggugor ken mangsubok kadagiti tattaok tapno maammoan ken masuotmo dagiti kababalinda.

²⁸Napalalo ti kinasukirda; agpagnapagnada a mamarpardaya. Kasda la bronse ken landok; naigamerda amin iti kinadakes.

²⁹Napigsa ti panagpug-aw ti yubuyoban; rumubrob ti apuy a manglunag iti buli ngem saan a maisina ti rugit. Awan serserbi ti panaggugor, ta saan a maisina dagiti dakes a tattao.

³⁰Maawagandanto iti naibelleng a pirak ta siak, ni Yahweh, linaksidko ida.”