Jeremias 9:1-25 RIPV1996 - Bible AI

¹Kasla koma bubon ti ulok, ket dagiti matak ubbog ti lua, tapno aldaw ken rabii nga agsangitak gapu kadagiti napapatay a tattaok.

²Adda koma lugar a pagnaedak idiay let-ang tapno maadaywak dagiti tattaok. Agpapadada a managdakdakes, bunggoy ida dagiti mangliliput.

³Sisasaganada nga agulbod; agturay ditoy a daga ti kinaulbod a saan ketdi a ti kinapudno.

³Kuna ti APO, “Kanayon nga agbasol dagiti tattaok, ket saanda a bigbigen a siak ti Diosda.”

⁴Agannad ti tunggal maysa iti gayyemna; awan met makapagtalek iti kabsatna. Agsipud ta amin a kakabsat manangallilawda ket tunggal maysa padpadaksenna ti gayyemna.

⁵Allilawenda dagiti gagayyemda, ket awan ti agsao iti pudno. Nasursuroandan dagiti dilada nga agulbod, nagbasolda ket dida kayat ti agbabawi. Di agpatingga ti nadawel nga aramidda, kasta met dagiti kinasikapda.

⁵Kuna ti APO, “Didak awaten dagiti tattaok.”

⁷Daytoy ti gapuna a kuna ni Yahweh a Mannakabalin-amin, “Gugorakto dagiti tattaok ket suotekto ida. Nagbasol dagiti tattaok, ania pay ti mabalinko nga aramiden kadakuada?

⁸Kasla makapatay a pana dagiti dilada; kanayon nga ulbod ti sawenda. Nasayaat ti panagsao ti tunggal maysa iti kaarrubana, ngem iti pusona, dakes ti panggepna.

⁹Diakto kadi dusaen ida gapu kadagitoy? Saankonto aya a balsen dagitoy a tattao? Siak, ni Yahweh, ti nangibaga iti daytoy.”

¹⁰Kinunak, “Dung-awakto dagiti bantay, sangitakto met dagiti pagpaaraban idiay let-ang ngamin ta namagaandan, ket awanen ti magmagna kadakuada. Saanen a mangngeg ti uga dagiti baka; pimmanawen dagiti tumatayab ken dagiti atap nga animal.”

¹¹Kuna ti APO, “Pagbalinekto ti Jerusalem a nagrebbaan, a pagnaedan dagiti lobo iti let-ang. Aglangalangto dagiti siudad ti Juda, awanton ti agnaed kadakuada.”

¹²Sinaludsodko, “O APO, apay a nadadael ti daga ken namaga a kasla let-ang ket awan ti agdaliasat? Siasino ti masirib a makaawat iti daytoy? Siasino ti nangipalawagam iti daytoy tapno ibagana met iti sabali a tao?”

¹³Insungbat ti APO, “Napasamak daytoy, ta binaybay-an dagiti tattaok ti pannursuro nga impaalagadko kadakuada. Saanda a nagtulnog kaniak wenno agbiag a mayannurot iti imbagak.

¹⁴Ngem inaramidda ti kaykayatda ket nagdaydayawda kadagiti imahen ni Baal kas insuro dagidi ammada.

¹⁵Denggenyo ngarud ti aramidekto, siak, ni Yahweh a Mannakabalin-amin a Dios ti Israel: Pakanekto dagiti tattaok kadagiti napait a mulmula ken painumekto ida iti nasabidongan a danum.

¹⁶Iwaraskonto ida kadagiti nasion a saanda pay a nadamdamag, kadagiti nasion a di met nadamdamag dagidi ammada. Ibaonkonto dagiti armada a maibusor kadakuada agingga a maikisapko amin ida.”

¹⁷Kuna ti APO a Mannakabalin-amin, “Panunotenyo ti mapaspasamak! Ayabanyo dagiti para dung-aw, dagiti babbai nga agkanta kadagiti pamumpon a kansion.”

¹⁸Kuna dagiti tattao, “Ibagayo a darasenda ti umay, ket agdung-awda agingga nga agsasangitkami, ket agarubos dagiti luami.”

¹⁹Denggenyo ti dung-aw idiay Sion, “Nakabutbuteng ti pannakadadaelmi! Napalalo ti pannakaibabainmi! Masapul a panawanmi ti dagami, narakraken dagiti balbalaymi.”

²⁰Kinunak, “Dakayo a babbai, denggenyo ti kinuna ti APO, ket ipangagyo dagiti saona. Isuroyo nga agdung-aw dagiti annakyo a babbai isuroyo dagiti gagayyemyo nga agkanta iti kansion ti pumpon.

²¹Simrek ni patay kadagiti tawtawatayo, ket immuneg kadagiti palasiotayo. Pinatayna dagiti ubbing kadagiti kalsada ken dagiti agtutubo kadagiti tiendaan.

²²Agkaiwara dagiti bangkay, kasda la nabunton a rugit iti taltalon, kasda la nagapas a pagay a nabati dagiti agani, pagay nga awan ti mangurnong. Daytoy ti imbaga ti APO a sawek.”

²³Kuna ti APO, “Saan koma nga ipasindayag ti masirib ti kinasiribna, wenno ti napigsa ti kinapigsana, wenno ti nabaknang ti kinabaknangna.

²⁴Noⓠ adda siasinoman nga agpasindayag, ipasindayagna koma nga am-ammo ken maawatannak. Agsipud ta siak, ni Yahweh, manangngaasiak, aramidek ti nalinteg ken naimbag ditoy lubong. Dagitoy ti makaparagsak kaniak. Siak, ni Yahweh, ti nangibaga iti daytoy.”

²⁵Kuna ti APO, “Dumtengen ti tiempo a dusaek dagiti tattao ti Egipto, Juda, Edom, Ammon, Moab ken amin nga agnaed iti let-ang a mangputed kadagiti buokda.[8] Nakugit amin dagitoy ngem saanda a tinungpal ti katulagan nga iparangarangna. Awan kadagitoy a tattao ken awan kadagiti tattao ti Israel ti nangsalimetmet iti katulagak.”