Job 1:1-22 RIPV1996 - Bible AI

¹Adda idi maysa a tao nga agnagan iti Job nga agnanaed idiay Uz.[1] Agdaydayaw iti Dios ket napudno kenkuana. Naimbag a tao ni Job ket saan nga agaramid iti dakes.

²Sangapulo ti annakna: pito a lallaki ken tallo a babbai.

³Adu ti animal a tarakenna: 7,000 a karnero, 3,000 a kamelio, 1,000 a baka ken 500 nga asno. Adu met ti adipenna ket isu ti kabaknangan iti deppaar ti Daya.

⁴Agsisinnublat nga agpadaya dagiti lallaki nga annak ni Job ket kanayon met nga awisenda a dumar-ay dagiti kakabsatda a babbai.

⁵Tunggal malpas ti padaya, bumangon a masapa ni Job ket agpuor kadagiti daton a maipaay iti pannakadalus dagiti annakna. Naipaugali nga aramidenna daytoy ta kunkunana iti bagina, “Amangan no nagbasol dagiti annakko babaen iti pananglaisda iti Dios iti unegda.”

⁶Idiⓐ dumteng ti aldaw a panagparang dagiti nailangitan a parsua[2] iti saklang ni Yahweh, kimmuyog met kadakuada ni Satanas.[3]

⁷Sinaludsod ni Yahweh kenkuana, “Sadino ti naggapuam?”

⁷“Sinursursorko ti entero a daga,” insungbat ni Satanas.

⁸“Napaliiwmo kadi ni adipenko a Job?” sinaludsod ni Yahweh. “Awan iti daga ti napudno ken awan pakapilawanna a kas kenkuana. Managbuteng kaniak ket saan nga agaramid iti dakes.”

⁹Kinunaⓑ ni Satanas, “Agdaydayaw ngata kenka ni Job no awan ti imbag a magun-odna?

¹⁰Sinalaknibam ni Job agraman ti familiana ken ti amin a sanikuana. Bendisionam ti amin nga aramidna ket inikkam iti adu unay nga animalna a mangsaknap iti entero a pagilian.

¹¹Ngem padasem man nga alaen ti amin a sanikuana ta kitaem no dinakanto ilunod!”

¹²Kinuna ni Yahweh ken ni Satanas, “Ala wen, aramidem ti aniaman a kayatmo kadagiti amin nga adda kenkuana, ngem saanmo a dangran ni Job.” Ket pimmanaw ni Satanas iti imatang ni Yahweh.

¹³Iti maysa nga aldaw, idi agrarambak dagiti annak ni Job iti balay ti inauna a kabsatda a lalaki,

¹⁴nagtartaray ti maysa a babaonen a napan ken ni Job. Kinunana, “Agar-aradokami iti talon ket agar-arab met dagiti asno iti asidegmi.

¹⁵Pagammoan, rimmaut dagiti taga-Sabe[4] ket intalawda dagiti amin nga animal. Pinatayda dagiti amin nga adipenmo! Siak laeng ti nakalibas a mangipakaammo kenka iti napasamak.”

¹⁶Agsasao pay laeng ti adipen idi dumteng ti sabali nga adipen ket kinunana, “Nakimat dagiti karnero ken dagiti agpaspastor ket natayda amin! Siak laeng ti nakalasat a mangipakaammo kenka iti napasamak.”

¹⁷Agsasao pay laeng ti adipen idi dumteng ti sabali pay nga adipen ket kinunana, “Adda tallo a grupo dagiti Caldeo[5] a nangdarup kadakami. Innalada amin a kamelio ket pinatayda amin nga adipenmo! Siak laeng ti nakalibas a mangibaga kenka iti napasamak.”

¹⁸Saan pay a nalpas a nagsao ti adipen idi dumteng ti sabali manen nga adipen ket kinunana, “Agrarambak dagiti annakmo iti balay ti inauna a kabsatda.

¹⁹Pagammoan, dimteng ti napigsa nga angin a naggapu iti let-ang. Rinebbana ti balay ket natay amin nga annakmo! Siak laeng ti nabati a mangibaga kenka iti napasamak.”

²⁰Timmakder ni Job ket rinay-abna ti pagan-anayna gapu iti ladingitna. Kinuskosanna ti ulona sa nagpakleb iti daga ket nagdaydayaw.

²¹Kinunana,ⓒ “Lamolamoak a nayanak ket matayakto met a lamolamo. Ti APO ti nangted ket ita, isu met laeng ti nangala. Madaydayaw koma ti naganna!”

²²Ngem uray kasta ti naaramid, saan a nagbasol ni Job. Dina pinabasol ti Dios gapu iti napasamak.