Job 11:1-20 RIPV1996 - Bible AI

¹Awan kadi ti sumungbat kadagitoy a kinamaag? Mapalinteg kadi ti tao babaen iti adu a saona?

³Job, ipagarupmo aya a didaka masungbatan? Manglalaiska, agulimekkami kadi lattan?

⁴Kunam a pudno ti sasawem; ibagam a nadaluska iti imatang ti Dios.

⁵No sungbatannaka la koma ti Dios,

⁶ipakaammona kenka dagiti palimed ti kinasirib; adda dagiti di matukod nga ammoen ti tao. Nalag-an ti impatay ti Dios a pannusa kenka ngem iti rumbeng a dusam koma.

⁷Marukodmo kadi ti kinangato ti Dios ken ti kadakkel ti pannakabalinna?

⁸Nangatngato ngem ti langit; saanmo a magaw-at. Naun-uneg ngem ti lubong dagiti natay;[15] saanmo a matukod.

⁹Dakdakkel ti kinatan-ok ti Dios ngem ti daga, ket nalawlawa ngem ti baybay.

¹⁰No tiliwennaka ti Dios ket isaklangnaka, siasino ti makalapped kenkuana?

¹¹Ammona no siasino dagiti awan serserbina a tattao; makitana amin ti dakes nga aramidda.

¹²Agbalinto la a masirib dagiti nanengneng inton agbalin a naamo dagiti atap nga asno.

¹³Palintegem ta pusom, Job, ket umawagka iti Dios!

¹⁴Papanawem iti balaymo ti kinadakes ken kinakillo.

¹⁵Iti kasta, mabalinmonto manen a sangoen ti lubong ket maaddanka iti talged ken tured.

¹⁶Malipatamton ti amin a rigatmo kas layus a naglabas, saanen a malagip.

¹⁷Nalawlawagto ti biagmo ngem ti init iti tengnga ti aldaw. Agraniagto a kas bannawag ti kasipngetan a kanito ti biagmo.

¹⁸Agbiagkanto a natalged ken napnoan namnama; salaknibannakanto ti Dios, ket ikkannakanto iti inana.

¹⁹Awanto ti kabusor a kabutengmo; Agpatulongto kenka ti adu a tattao.

²⁰Ngem inton makita dagiti managdakdakes ti likmutda, maawanandanto iti namnama. Awanto a pulos ti paglisianda, ket ti la namnamada isu ti yaay ti Patay.