Job 12:1-25 RIPV1996 - Bible AI

¹Wen, dakayo ti timek dagiti tattao; awanton ti kinasirib inton mataykayo.

³Ngem kadakayo, adda met nakemko; awan ti pakaatiwak kadakayo. Ammok met amin nga imbagayo.

⁴Uray ita, dagiti gagayyemko katkatawaandak nupay nalintegak ket awan pakababalawak. Ngem adda idi tiempo nga immawagak iti Dios ket impangagna ti kararagko.

⁵Awan ti pakariribukanyo, ngem kaskasdi a pagang-angawandak; kabilenyo ti tao a ngannganin matumba.

⁶Ngem natalna ti panagbiag dagiti mannanakaw ken awanan Dios nupay ti bukodda a pigsa ti kakaisuna a diosda.

⁷Uray dagiti billit ken animal adu ti maisuroda kenka.

⁸Dawatem kadagiti parsua iti baybay ken daga nga ipakaammoda kenka ti kinasiribda.

⁹Ammoda amin nga inaramid ti APO ida.

¹⁰Ti Dios ti mangidaldalan kadagiti pinarsuana; ti biag ti tunggal tao adda iti pannakabalinna.

¹¹Saan aya a pagraman ti dila, kas iti lapayag a pagdengngeg iti sarita?

¹²Addaan dagiti lallakay iti sirib, ngem addaan ti Dios iti sirib ken bileg. Addaan dagiti lallakay iti sirmata ngem addaan ti Dios iti sirmata ken pigsa.

¹⁴No agrakrak ti Dios, siasino ti makaipatakder iti rinakrakna? siasino ti makawayawaya iti tao nga ibaludna?

¹⁵No saanna a pagtudoen, agmaga ti daga. No ibuyatna ti tudo, dumteng ti layus.

¹⁶Nabileg ti Dios ket kanayon nga agballigi; agpada nga iturayanna ti maallilaw ken ti mangallilaw.

¹⁷Ikkatenna ti kinasirib dagiti agtuturay, ket pagbalinenna a kasla maag dagiti pangulo.

¹⁸Padisienna dagiti ar-ari iti saadda, ket pagbalinenna ida a balud.

¹⁹Ipababana dagiti papadi ken dagiti adda iti turay.

²⁰Pagulimekenna dagiti matalek a mammagbaga, ket pukawenna ti sirib dagiti lallakay.

²¹Ibabainna dagiti adda pannakabalinna, ket pukawenna ti bileg dagiti agtuturay.

²²Waknitanna ti nalidem a lugar ket lawaganna ti kasipngetan.

²³Itan-okna dagiti nasion, pabilgenna sana met la parmeken ken dadaelen ida.

²⁴Pagbalinenna a maag dagiti panguloda, ket pagalla-allaen ken yaw-awanna ida.

²⁵Iti sipnget, agar-arikapda; agibar-ibarda a kasla nabartekda.