Job 28:1-28 RIPV1996 - Bible AI

¹[33] Adda pagminasan iti pirak, adda met paggugoran iti balitok.

²Kalien ti tao ti landok iti daga, ket tunawenna ti gambang kadagiti bato.

³Sukisoken dagiti tattao ti nasipnget a disso, iti kaunggan a paset ti daga, agkalida iti batbato.

⁴Agkalida iti usok ti pagminasan, iti lugar nga awan matagtagitao wenno di pay nadanon ti tao. Agtrabahoda sadiay a malmaldaang, kumkumpet kadagiti tali iti uneg ti daga.

⁵Agtaud ti taraon iti daga, ngem ti mismo nga unegna madaddadael iti apuy a bumarbara.

⁶Adda safiro kadagiti bato iti daga; adda met balitok kadagiti tapok.

⁷Awan ti kali a makakita kadagiti usok ti minas. Awan met ti buitre nga agtayab iti ngatoenda.

⁸Awan ti leon wenno narungsot nga ayup nga agdaliasat kadagiti naiputputong a dalan.

⁹Agkali dagiti tattao kadagiti pamulinawen a dalumpinas. Kalienda ti puon dagiti bantay.

¹⁰Bayat ti panagaramidda iti usok, makasarakda kadagiti napapateg a bato.

¹¹Agkalida agingga iti paggapuan[34] ti karayan, ket iruarda dagiti nailemmeng a gameng.

¹²Ngemⓒ sadino ti pagtaudan ti sirib? Sadino ti paggapuan ti pannakaawat?

¹³Saanⓓ a masarakan ti sirib kadagiti tattao; saan met a masarakan iti rabaw ti daga.

¹⁴Ibaga dagiti lansad ti taaw ken baybay a saan a masarakan ti sirib sadiay.

¹⁵Saan a magatang ti sirib iti pirak wenno balitok.

¹⁶Saan met a magatadan iti kanginaan a balitok ken alahas.

¹⁷Napatpateg nga adayo ngem ti balitok, napatpateg ngem ti alikamen a balitok ken kapintasan a baso.

¹⁸Napatpateg nga adayo ti sirib ngem ti koral, kristal wenno rubi.

¹⁹Saan a maipada ti pateg ti sirib iti kapatgan a topasio ken iti puro a balitok.

²⁰Sadino ngarud ti paggapuan ti sirib? Sadino ti pakaadalantayo iti pannakaawat?

²¹Nailemmeng ti sirib kadagiti sibibiag; di makita ti siasinoman, uray dagiti tumatayab.

²²Uray ni patay ken ti pannakadadael annugotenda a sayangguseng laeng dagiti nangngegda.

²³Tiⓔ Dios laeng ti makaammo iti dalan, ammona ti lugar a pakasarakan kenkuana.

²⁴Ngamin, makitana ti ungto ti daga ken ti amin nga adda iti babaen ti langit.

²⁵Idi inikkan ti Dios ti angin iti bileg, ken inkeddengna ti kalawa ti baybay,

²⁶idi intudingna ti pagtinnagan ti tudo, ken ti pagdaliasatan ti kimat ken gurruod,

²⁷nakitanaⓕ ti sirib ket tiningitingna ti pategna, isut' gapuna nga impasdek ken pinasingkedanna.

²⁸Kinunaⓖ ti Dios kadagiti tattao: “Tapno sumiribkayo, agbutengkayo iti APO. Tapno maaddaankay pannakaawat, laksiden ti dakes.”