Job 32:1-22 RIPV1996 - Bible AI

¹Gapu ta mamati unay ni Job nga awan ti basolna, insardeng dagiti tallo a lallaki ti mangsungsungbat kenkuana.

²Ngem adda nga agbuybuya sadiay ti maysa a tao a saanen a nakaigawid iti pungtotna ta ikalkalintegan ni Job ti bagina ket pabpabasolenna ti Dios. (Isu ni Elihu nga anak ni Barakel a kaputotan ni Buz, iti familia ni Ram.)

³Nakapungtot met kadagiti tallo a gagayyem ni Job agsipud ta awan masarakanda a naimbag a pangsungbatda kenkuana ket agparang a ti Dios ti nagbiddut.

⁴Agsipud ta ni Elihu ti kaubingan kadakuada, nagur-uray agingga a nalpasda amin a nagsao.

⁵Ngem nakapungtot idi makitana nga awanen ti maisungbat dagiti tallo ken ni Job,

⁶isut' gapuna a nagsao.

⁶Nagamakak a nangibaga iti kapanunotak ta ubingak idinto a lallakaykayo.

⁷Kinunak iti bagik a dakayo ti rumbeng nga agsao; ket dakay a lallakay ti mangibingay iti siribyo.

⁸Ngem ti espiritu iti tao, ti anges ti Mannakabalin-amin, ti mangted kenkuana iti pannakaawat.

⁹Saan a ti panaglakay ti mangpasirib kadagiti tattao wenno tumulong kadakuada a mangammo iti nalinteg.

¹⁰Dawatek ngarud a denggendak, ket ibagak kadakayo ti kapanunotak.

¹¹Siaanusak a nagdengngeg bayat ti panagsaoyo; dimngegak bayat ti panagsapsapulyo iti nainsiriban a pagsasao.

¹²Sipapasnekak a dimngeg kadakayo, ket nakitak a diyo mapaneknekan a biddut ti sinao ni Job.

¹³Kasano ngarud ti panagkunayo a ti kinasirib ket nasarakanyo? Ti Dios ti mangsungbat ken ni Job ta diyo nasungbatan.

¹⁴Dakayo ti kasasao ni Job, saan a siak, ngem no siak ti sumungbat saan a kas iti wagasyo.

¹⁵Job, awan ti naisaoda; awanen ti maisungbatda kenka.

¹⁶Agurayak kadi pay laeng bayat ti panagulimekda? Addada dita ket awanen ti maibagada.

¹⁷Diak agulimek, ket ibagak ti sungbatko; yebkasko met ti kapanunotak.

¹⁸Diak maibturanen ti di agsao; adu ti kayatko nga ibaga.

¹⁹No saanak nga agsao ita amangan no bumtakak a kas iti baro a supot a lalat.

²⁰Masapul nga agsaoak tapno mapalag-ananak.

²¹Awan ti kanunongak, awan met ti patiray-okak.

²²Diak ammo ti mangpatiray-ok; awan duadua a dusaennak ti Dios no kasta ti aramidek.