Job 39:1-30 RIPV1996 - Bible AI

¹Ammom kadi no kaano a nayanak dagiti atap a kalding ti bantay? Naimatangam kadin ti panagpasngay ti ugsa?

²Ammom kadi no mano a bulan ti panagsikogda wenno ania nga aldaw ti panaganakda?

³Ammom kadi no kaano ti panagrukobda tapno agpasngayda?

⁴Dumakkel dagiti urbonda iti kabakiran; pumanawda ket dida agsubsublin.

⁵Siasino ti nangted iti wayawaya dagiti atap nga asno? Siasino ti nangibulos kadakuada tapno agturongda iti kaykayatda a papanan?

⁶Intedko ti let-ang a pagtaenganda, ket pinagnaedko ida iti naapgad a daga.

⁷Adaywanda dagiti naarimbangaw a siudad, ket awan ti makapaamo kadakuada tapno pagtrabahoenda ida.

⁸Sursorenda dagiti bambantay a kas pastoda ket agbirokda iti naraber a ruot nga arabenda.

⁹Mapagtrabahom kadi ti atap a nuang? Kayatna aya ti maturog iti koralmo iti rabii?

¹⁰Mataliam aya tapno pagaradoem wenno pagsagadem iti talonmo?

¹¹Makapagpannurayka kadi iti dakkel a pigsana? Namnamaem kadi nga aramidenna ti trabahom?

¹²Manamnamam kadi nga isangpetna ti apitmo, ket ummongenna ti nairikmo?

¹³Napardas ti panagpayakpak ti abestrus! Ngem awan ti abestrus a makatayab a kas iti kannaway!

¹⁴Panawan ti abestrus dagiti itlogna iti daga, ket bay-anna ti pudot ti daga a mangpessa kadakuada.

¹⁵Dina pampanunoten no mabaddekan dagiti itlogna wenno pis-iten dagiti atap nga animal.

¹⁶Kasla saan a nagtaud dagiti itlog kenkuana; kasla awan aniaman ti nagbannoganna.

¹⁷Siak ti namagbalin kenkuana a maag, ket saanko nga inikkan iti sirib.

¹⁸Ngem no rugianna ti agtaray, atiwenna ti kabalio ken ti nagsakay.

¹⁹Sika aya, Job, ti namagbalin kadagiti kabalio a nakapigpigsa? Sika aya ti nangted iti agal-allon a pargayen iti tengngedda?

²⁰Palagtoem kadi ida a kas kadagiti dudon? Agbuteng dagiti tattao iti panagbang-esda.

²¹Sigagagarda a mangkurob iti daga iti tanap; kasta unay ti pardasda a mapan iti paggugubatan.

²²Dida ammo ti agbuteng, dida madanagan ket dida itarayan ti kampilan.

²³Kumalangiking ken aggilapgilap ti igam dagiti nagsakay kadakuada.

²⁴Gapu iti nalaus a gagarda, agtarayda a dagus no mapuyot ti trumpeta.

²⁵Agbang-esda tunggal aguni ti trumpeta; adayoda pay ngem maangotda ti gubat. Mangngegda ti arimbangaw; agbilin dagiti ofisiales ket matimudda dagiti pukkaw.

²⁶Sika aya ti pagsursuroan ti kali iti panagtayabna, no yukradna dagiti payakna nga agpa-abagatan?

²⁷Agpannuray aya ti agila iti bilinmo tapno agaramid iti umokna iti nangato a bantay?

²⁸Agtaeng kadagiti kangatoan a rangkis, ket pagbalinenna a sarikedkedna dagiti nangato a pantok.

²⁹Manipud sadiay, agsiput iti alun-onenna, adayo pay laeng ngem makitana.

³⁰Aguummongⓠ dagiti buitre iti ayan dagiti bangkay, ket inumen dagiti urbonda ti dara dagiti natay.