Joel 2:1-32 RIPV1996 - Bible AI

¹Puyotenyo ti trumpeta; ipakdaaryo a dumteng ti peggad idiay Sion, ti nasantoan a turod[1] ti Dios. Agpigergerkayo, dakay amin a taga-Juda, ta asidegen ti yaay ti aldaw ti APO!

²Nasipnget ken nalidemto dayta nga aldaw, aldaw a nalulem ken naulep. Sumungad ti dakkel a pangen ti dudon, kas iti sipnget nga agsaknap kadagiti bantay. Awan pay napasamak a kas iti daytoy, ket awanton ti kasta a mapasamak iti masakbayan.

³Kasda la apuy nga agkaan kadagiti mula. Kasla Hardin ti Eden ti sangpetanda a daga, ngem no panawandan maysan a let-ang nga awan nagyanna. Awan ti lisianda.

⁴Kasdaⓒ la kabalio; dumarupda a kasla kabalio a pakigubat.

⁵Iti panaglagtolagtoda kadagiti bambantay, kumaradakadda a kas kadagiti lugan a pakigubat. Kumarasakasda a kas iti nagango a ruot a maur-uram. Naintarda a kasla nabileg nga armada a nakasagana a makigubat.

⁶Agbuteng dagiti makakita iti isusungadda, ket uray la a bumbumsagda amin.

⁷Dumarupda a kasla mannakigubat; kasda la soldado a mangkalay-at iti bakud. Naurnos ti pannagnada; sangsangkamaysa ti turongda,

⁸ket saanda nga agsisinnali. Sarienda dagiti sarikedked, ket awan ti makalapped kadakuada.

⁹Sipapardasda a mangraut iti siudad; kalay-atenda dagiti bakud; ulienda dagiti balbalay, ket kasda la mannanakaw a sumrek iti tawa.

¹⁰Agkintayegⓓ ti daga iti isusungadda; agpigerger ti tangatang. Agsipnget ti init ken ti bulan; saanen nga agraniag dagiti bituen.

¹¹Bilinenⓔ ti APO ti armadana; kasla gurruod ti timekna. Adu ken nabileg dagiti soldado nga agtulnog kenkuana. Nakabutbuteng ti aldaw ti APO! Siasinonto ti makalasat iti dayta nga aldaw?

¹²Kuna ti APO: “Ngem uray ita, agbabawikayo iti amin a pusoyo ket agsublikayo kaniak; agayunar, agsangit ken agdung-awkayo.

¹³Ipakitayo ti agsensennaay a pusoyo iti ladingit; saan nga umdas ti panangray-abyo iti pagan-anayyo.”

¹³Agsublikay iti APO a Diosyo. Naasi ken managparabur, naanus ken tungpalenna ti karina; sidadaan a mamakawan, saan a mangdusa.

¹⁴Nalabit a baliwan ti APO a Diosyo ti panunotna, ket paraburannakayto iti adu nga apit. Iti kasta, addanto makan ken arak nga idatonyo kenkuana.

¹⁵Puyotenyo ti trumpeta idiay Bantay Sion; ibilinyo ti panagayunar dagiti tattao, ket angayenyo ti gimong.

¹⁶Ummongenyo dagiti tattao; isaganayo ida a tumabuno iti sagrado a gimong. Yegyo dagiti babbaket ken lallakay; ummongenyo dagiti ubbing, uray pay dagiti maladaga. Uray dagiti kakaskasar, masapul a panawanda ti balayda ket umayda.

¹⁷Dakayoⓕ a papadi nga agserserbi ti APO iti nagbaetan ti altar ken ti ruangan ti Templo, masapul nga agsangit ken agkararagkayo. Kunayo, “Kaasiam dagiti tattaom, O APO. Dimo ipalubos a lalaisen ken pagang-angawandakami dagiti sabali a nasion iti panagkunada: ‘Sadino ti ayan ti Diosyo?’”

¹⁸Kalpasanna, impakita ti APO ti panangipategna iti dagana; kinaasianna dagiti tattaona.

¹⁹Impangagna ida, ket kinunana: “Ita, ikkankayo iti trigo, arak ken lana, ket mapnekkayto. Didakayton laisen dagiti sabali a nasion.

²⁰Ipanawkonto kadakayo dagiti pangen ti dudon a naggapu iti amianan, ket ipankonto iti let-ang ti dadduma kadakuada. Sunsonekto ti akin-sango a bunggoyda agingga iti Natay a Baybay. Iturongkonto ti akinlikud a buyotda agingga idiay Taaw Mediterranean. Agbuyokto dagiti bangkayda, ket agadiwaranto ti bangsitda. Dadaelekto ida gapu kadagiti amin nga inaramidda kadakayo.

²¹“Dakayo a talon, dikay agbuteng ngem agrag-o ken agragsakkayo, gapu iti amin nga impaay ti APO kadakayo.

²²Dikay agbuteng, dakayo nga animal; nalangto manen dagiti pagaraban. Agbungan dagiti kayo, ket adu ti bunga ti igos ken ubas.

²³“Agragsakkayo, tattao ti Sion; agragsakkayo gapu iti impaay kadakayo ti APO a Diosyo. Inikkannakayo iti tumutop nga umuna a tudo;[2] nagbayakabak iti tiempo ti tudtudo ket kas iti sigud, inikkannakayo iti naladaw a tudo.

²⁴Mapnonto iti trigo dagiti pagirikan; aglippiasto iti arak ken lana dagiti tangke iti abay dagiti pagpespesan.

²⁵Isublikto ti napukawyo kadagiti napalabas a tawen idi kinnan dagiti pinangen a dudon dagiti apityo. Imbaonko daytoy nga armada a nangraut kadakayo.

²⁶Adunton ti taraonyo, ket mapnekkayto. Idaydayawyonto ti APO a Diosyo, a nagaramid kadagiti nakaskasdaaw a banag nga agpaay kadakayo. Saanton a malalais dagiti tattaok.

²⁷Dakayo nga Israelita, maammoanyonto nga addaak kadakayo, ket siak, ni Yahweh, siak ti Diosyo, awan ti sabali. Saanton a malalais dagiti tattaok.”

²⁸Kunaⓖ ti APO: “Kalpasanna, ibuyatkonto ti Espirituk iti amin a tao. Ipakaammonto dagiti annakyo ti mensahek; agdarepdepto dagiti lallakayyo, ket agparmatanto dagiti lallaki nga agtutuboyo.

²⁹Iti dayta a tiempo, ibuyatkonto ti Espirituk uray pay kadagiti adipen, lalaki man wenno babai.

³⁰“Iti dayta nga aldaw, agipakitaakto kadagiti ballaag iti tangatang ken ditoy daga. Addanto pannakaibuyat ti dara, addanto apuy ken asimbuyok.

³¹Agsipngettoⓗ ti init, ket lumabbaganto ti bulan a kas iti dara sakbay a dumteng ti naindaklan ken nakabutbuteng nga aldaw ni Yahweh.

³²Ngemⓘ maispalto dagiti amin nga agpatulong ken ni Yahweh. Kas kinunana, ‘Addanto dagiti makalasat idiay Jerusalem; makalassatto dagiti piliek.’”