Joel 3:1-20 RIPV1996 - Bible AI

¹Kuna ti APO, “Iti dayta a tiempo, isublikto ti Juda ken ti Jerusalem manipud pannakakayawda.

²Ummongekto dagiti amin a pagilian, ket ipanko ida idiay Tanap ni Josafat.[3] Sadiayto ti pangukomak kadakuada gapu iti amin nga inaramidda kadagiti tattaok. Inwarawarada dagiti Israelita kadagiti sabali a pagilian. Biningbingayda ti dagak nga Israel.

³Nagbibinnunotda no siasino kadakuada ti mangala kadagiti balud. Nagilakoda kadagiti ubbing tapno adda pagbayadda iti balangkantis a babai ken iti arak.

⁴“Aniaⓙ ⓚ ti kayatyo nga aramiden kaniak, Tiro, Sidon, ken amin a Filistia? Kayatdak kadi a balsen gapu iti inaramidko? No kayatdak a balsen, dagdagusenkayto a balsen!

⁵Innalayo dagiti pirak ken balitokko, ket impanyo dagiti napateg a gamengko kadagiti temployo.

⁶Impanawyo dagiti tattao ti Juda ken Jerusalem iti pagilianda ket inlakoyo ida kadagiti Griego.

⁷Ita, iruarko ida kadagiti disso a nangilakoanyo kadakuada. Aramidekto met kadakayo ti inaramidyo kadakuada.

⁸Ipaluboskonto a mailako dagiti annakyo kadagiti taga-Juda a mangilakonto met kadakuada kadagiti taga-Saba nga adda iti adayo a pagilian. Ni Yahweh ti nagsao iti daytoy.

⁹“Ipakaammoyo daytoy kadagiti nasion: ‘Agsaganakayo a makigubat! Ayabanyo dagiti mannakigubat. Ummongenyo amin a soldado, ket inkayo!

¹⁰Aramidenyoⓛ a kampilan dagiti aradoyo; aramidenyo a gayang dagiti paggapasyo. Uray ti nakapuy masapul a makiranget.

¹¹Darasenyo[4] ti umay, dakay amin a kabangibang a nasion, ket agtitiponkayo iti tanap.’”

¹¹O APO, ibaonmo ti armadam a mangdarup kadakuada.

¹²“Masapul nga agsagana dagiti pagilian, ket mapanda idiay Tanap ni Josafat. Sadiay, siak, ni Yahweh, agtugawakto a mangukom kadagiti amin a kabangibang a nasion.

¹³Dakesdaⓜ la unay; Paraspasem ida a kas iti trigo iti tiempo ti panagani. Pespesem ida a kas iti ubas a maladdit iti napno a pagpespesan agingga nga aglippias ti arak.”

¹⁴Rinibribu dagiti adda iti Tanap ti Pangeddeng.[5] Dumtengen sadiay ti aldaw ni Yahweh.

¹⁵Agsipnget ti init ken ti bulan; saanen nga agraniag dagiti bituen.

¹⁶Agpukkawⓝ ni Yahweh manipud Bantay Sion; manipud Jerusalem, agallangogan ti timekna. Agkintayeg ti daga ken ti tangatang, ngem salaknibannanto dagiti tattaona.

¹⁷“Mabigbigmonto, Israel, a siak ni Yahweh a Diosmo. Agnaedak iti Sion a nasantoan a turodko. Agbalinto a nasantoan a siudad ti Jerusalem; saanton a parmeken dagiti ganggannaet.

¹⁸Inton dumteng dayta nga aldaw, masaknapanto iti ubas dagiti kabambantayan; adunto ti baka kadagiti katurturodan; nabuslonto ti danum iti entero a Juda. Addanto waig nga aggapu iti Templo ni Yahweh, ket padanumannanto ti Tanap dagiti Acacia.

¹⁹“Agbalinto a let-ang ti Egipto; agbalinto met a langalang ti Edom. Ngamin, rinautda ti daga ti Juda, ket pinapatayda dagiti tattao nga awan basolna.

²⁰Ibaleskonto[6] dagiti napapatay; diakto pakawanen dagiti nakabasol. Agnanayonton nga adda agnaed idiay Juda ken idiay Jerusalem, ket siak, ni Yahweh, agtaengakto idiay Bantay Sion.”