Kanta ni Solomon 6:1-13 RIPV1996 - Bible AI

¹“Kaimnasan kadagiti babbai, napanan kadi ti patpatgem? Ibagam kadakami ti nagturonganna, ta tulongandaka a mangbirok kenkuana.”

²“Napan ti kaayan-ayatko iti hardinna a pagtubtuboan dagiti kayo a balsamo. Ipapaarabna ti arbanna iti minuyongan ken agketkettel kadagiti lirio.

³Kukuak ti kaayan-ayatko ket kukuanak met; pagarabenna ti arbanna iti kalirioan.”

⁴“Ay-ayatek, napintaska a kas iti Jerusalem; nalibnoska a kas iti siudad ti Tirsa; makakayawka a kas kadakuada.

⁵Dimo iperreng dagita matam kaniak, ta makayawan toy riknak. Agsalsala ti buokmo a kas iti arban ti kalding a sumalsalog kadagiti turod ti Galaad.

⁶Napupudaw dagiti ngipenmo a kas kadagiti kaddigos a karnero. Awan ti naikkat kadakuada ket napintas ti panagbabatogda.

⁷Agraniag dagiti pingpingmo a naabbongan iti belom.

⁸Addaan ti ari iti innem a pulo a reyna, ken walopulo a kamalala, ken babbalasang a di mabilang.

⁹Ngem bugbugtong ti ay-ayatek, napintas a kalapati ti kayariganna. Kakaisuna nga anak ni inana, ket idumduma ti nangipasngay kenkuana. Kitkitaen amin a babbai ket raemenda; ikankanta dagiti reyna ken kamalala ti panagdaydayawda.

¹⁰“Siasino daytoy pumalpalludip a kas iti parbangon? Napintas, naraniag; makapurar a kas iti init wenno bulan Nakaskasdaaw a kas armada nga addaan kadagiti bandera.

¹¹Simmalogak iti kaalmendrasan tapno kitaek dagiti nalangto a mula iti tanap; tapno kitaek no naguggoten dagiti ubas ken nagsabongen dagiti granada.

¹²Agtigtigergerak, pinaggagarnak iti ayat a kas iti panaggagar ti maingel a mapan makigubat.”

¹³“Agsalaka, agsalaka, balasang a Sulamita; wen, agsalaka tapno buyaendaka.” “Apay a kayatyo a buyaen ti Sulamita, a kas iti sala iti nagbaetan ti dua nga armada?”[2]