Malakias 3:1-18 RIPV1996 - Bible AI

¹Kastoyⓕ ti sungbat ti APO a Mannakabalin-amin, “Ibaonkonto ti babaonek a mangisagana iti dalanko. Ket kellaatto nga umay ni Yahweh a sapsapulenyo iti Templona. Umayto ti babaonen a segseggaanyo ket ipakaammonanto ti tulagko.”

²Ngemⓖ siasinonto ti makaibtur iti aldaw a yaayna? Siasinonto ti makalasat inton agparang? Mayarigto iti apuy a manggugor iti landok ken kaslanto naingel a sabon.

³Umayto a mangukom, ket dalusannanto dagiti papadi a kas iti pannakagugor ti pirak ken ti balitok tapno idatagda iti APO ti umisu a daton.

⁴Maragsakanto ti APO kadagiti daton dagiti tattao ti Juda ken Jerusalem, kas iti panagragsakna kadagiti daton iti napalabas.

⁵Kuna ti APO a Mannakabalin-amin, “Umaykayto ukomen. Dagusekto ti mangidatag kadagiti pammaneknek a maibusor kadagiti managsalamangka, kadagiti mannakikamalala, kadagiti agsaksi iti ulbod, kadagiti mangsaur iti tangdan dagiti mangmangged, kadagiti manggundaway kadagiti balo, ulila ken ganggannaet, kadagiti amin a saan nga agraem kaniak.

⁶“Siak,ⓗ ni Yahweh, ket saanak nga agbalbaliw. Ngarud, dakayo a kaputotan ni Jacob, saankayo pay a napukaw a namimpinsan.

⁷Kas kadagidi kapuonanyo, tinallikudanyo met dagiti lintegko ket diyo tinungpal ida. Agsublikayo kaniak, ket agsubliak met kadakayo. Ngem saludsodenyo, ‘Ania ti aramidenmi tapno makapagsublikami kenka?’

⁸Saludsodek met: Rumbeng kadi a takawan ti maysa a tao ti Dios? Saan! Ngem taktakawandak. Kasano? Iti diyo pannangted iti naan-anay nga apagkapullo ken iti daton.

⁹Nailunodkayo amin gapu ta sasaurennak ti entero a pagilian.

¹⁰Yegyoⓘ ti amin nga apagkapullo iti Templo tapno adu ti taraon sadiay. Padasendak ket ilukatkonto dagiti pagidulinan ti gameng sadi langit ket ibuyatkonto kadakayo ti nawadwad a bendision.

¹¹Diakto ipalubos nga iggesen dagiti apityo ket adunto ti ubas ti kaubasanyo.

¹²Ibilangdakayto a nagasat dagiti amin a pagilian agsipud ta nasayaatto a pagyanan ti dagayo.”

¹³Kuna ni Yahweh, “Makasugat ti panagsasaoyo kaniak, ngem kunayo, ‘Ania ti sinasaomi maipapan kenka?’

¹⁴Kinunayo, ‘Awan mamaay ti panagserbi iti Dios. Awan ti magunggonami iti panangtungpalmi iti ibagana wenno iti panangipakitami iti APO a Mannakabalin-amin a pagbabawianmi dagiti inaramidmi.

¹⁵Kas makitami, dagiti natangsit a tattao ti naragsak. Saan laeng a rumang-ay dagiti agar-aramid iti dakes, ngem suotenda pay ti anus ti Dios kadagiti dakes nga aramidda ket saanda a maan-ano.’”

¹⁶Kalpasanna, nagsasarita dagiti tattao nga agbuteng ken ni Yahweh. Dimngeg ni Yahweh ket impangagna ida. Iti sangoananna, naisurat iti maysa a libro ti pakalaglagipan kadagiti agbuteng ken agdayaw ken ni Yahweh.

¹⁷“Agbalindanto a tattaok,” kuna ni Yahweh a Mannakabalin-amin. “Inton aldaw nga aggunayak, kukuakto ida. Kaasiakto ida a kas iti panangngaasi ti ama iti anak nga agserserbi kenkuana.

¹⁸Makitanto manen dagiti tattaok ti paggiddiatan ti mapasamak iti tao a nalinteg ken ti managdakdakes, ti agserbi kaniak ken ti saan.”