Nahum 2:1-13 RIPV1996 - Bible AI

¹Nineve, madama a rarautendaka! Addan ti pannakabalin a mangrebbek kenka! Bantayam dagiti sarikedked! Guardiaam ti dalan! Agsaganaka a makigubat! (

²Isublin ni Yahweh ti dayag ti Israel, ti dayagna sakbay ti panangsamsam kenkuana dagiti kabusorna.)

³Siiiggem iti nalabaga a kalasag dagiti soldado a kabusor; siaarruatda iti nalabaga a pagan-anay. Agsagsaganada a dumarup! Gumilgil-ayab a kasla apuy dagiti luganda a pakigubat. Saan a makatalna dagiti kabalioda.[1]

⁴Napegges nga agtaray dagiti lugan kadagiti kalsada; agsubli-sublida a sipapardas kadagiti lugar a nalawa. Gumilgil-ayabda a kas iti sumsumged a silaw; sumiwet-siwetda a kas iti kimat.

⁵Maayaban dagiti ofisiales; ipanguloanda dagiti soldadoda.

⁵Agdardaras dagiti rumaut a mapan iti bakud, ket ikabilda ti paglinged kadagiti pagrakrakda.

⁶Aglukat dagiti ruangan iti igid ti karayan; mapno ti palasio iti buteng.

⁷Maitalaw a kas balud ti reyna; agsangit ken aganug-og dagiti adipenna; dandanogenda dagiti barukongda, a mangipakita iti ladingitda.

⁸Agtataray dagiti tattao ti Nineve, kas iti danum ti nasawang a tambak ti karayan. “Agsardengkayo! Agsardengkayo!” yik-ikkisda, ngem awan ti agsubli uray maysa.

⁹Samsamenyo dagiti pirak ken balitok! Napno ti siudad kadagiti gameng.

¹⁰Nadadaelen ti Nineve; naglangalang ken nabaybay-anen. Mapukawen ti namnama gapu iti buteng; agtigerger dagiti tumeng, mapukaw ti pigsa; bumsag dagiti tattao.

¹¹Sadinot' ayan ti siudad, a mayarig iti rukib dagiti leon, ti lugar a pakataraonan dagiti urbon a leon, ti papanan ti kalakian a leon ken ti urbonna, ket awan ti pakaan-anoanda?

¹²Pinatay ti leon ti natiliwna, ket rinangrangkayna a taraon dagiti urbon ken asawana. Pinunnona ti rukibna kadagiti narangrangkay a karne.

¹³“Siak ti kabusormo,” kuna ni Yahweh a Mannakabalin-amin. “Padapuekto dagiti luganmo a pakigubat. Matayto dagiti soldadom iti gubat, ket pukawekto dagiti amin a sinamsammo. Agpatingganton ti pannakabalinmo ditoy lubong.”