Nehemias 10:1-39 RIPV1996 - Bible AI

¹Ni Gobernador Nehemias nga anak ni Hacalias ti immuna a nagfirma. Simmaruno ni Zedekias kenkuana.

²Dagitoy dagiti papadi a nagfirma: Seraias, Azarias, Jeremias, Pashur, Amarias, Malkija, Hattus, Sebanias, Malluk, Harim, Meremot, Obadias, Daniel, Ginneton, Baruc, Mesullam, Abias, Mijamin, Maasias, Bilgai ken Semaias.

⁹Dagiti Levita: Jesua nga anak ni Azanias, Binnui iti kapuonan ni Henadad, Kadmiel, Sebanias, Hodias, Kelita, Pelaias, Hanan, Mica, Rehob, Hasabias, Zakkur, Serebias, Sebanias, Hodias, Bani ken Beninu.

¹⁴Dagiti papangulo dagiti tattao: Paros, Pahat Moab, Elam, Zattu, Bani, Bunni, Azgad, Bebai, Adoniha, Bigvai, Adin, Ater, Hezekias, Azzur, Hodias, Hasum, Bezai, Harif, Anatot, Nebai, Magpias, Mesullam, Hezir, Mesezabel, Zadok, Jaddua, Pelatias, Hanan, Anaias, Oseas, Hananias, Hassub, Hallohes, Pilha, Sobek, Rehum, Hasabna, Maaseias, Ahias, Hanan, Anan, Malluk, Harim ken Baana.

²⁸Dakami iti entero nga Israel—papadi, Levita, guardia ti Templo, kantores iti Templo, trabahador iti Templo ken amin a simmina kadagiti ganggannaet iti pagilian gapu iti Linteg ti Dios, agraman dagiti assawa ken amin nga annakmi a nataenganen a makaawat

²⁹makipagsapatakami kadagiti nalatak a kakabsatmi a madusakami iti pannakailunod no saanmi a tungpalen ti sapata, ket agbiagkami kas mayannurot iti Linteg ti Dios nga intedna babaen ken ni Moises nga adipenna. Tungpalenmi dagiti amin a linteg nga ibilin kadakami ti APO a Diosmi.

³⁰Saankamiⓑ a makiinnasawa kadagiti ganggannaet nga agnanaed iti dagami.

³¹Noⓒ adda ilakoda a trigo wenno uray ania kadakami iti Aldaw a Panaginana wenno iti uray ania nga aldaw a nasantoan, dikami gumatang kadakuada. Iti tunggal maikapito a tawen, dimi mulaan dagiti taltalon, ket pakawanenmi amin nga utang.

³²Tinawenⓓ a mangtedkami iti apagkawalo nga onsa a pirak a kas tulongmi iti Templo.

³³Itedmi dagitoy a kasapulan nga agpaay iti panagdaydayaw iti Templo: ti nasagradoan a tinapay, ti inaldaw a daton a makan, dagiti animal a mapuoran a kas daton iti inaldaw, dagiti nasagradoan a sagut iti Aldaw a Panaginana, iti Fiesta ti Lutuad ken dadduma pay a fiesta, dagiti dadduma a nasagradoan a daton, dagiti daton a pakapakawanan dagiti basol ti Israel ken aniaman a kasapulan iti Templo.

³⁴Dakami a tattao, papadi ken Levita, tinawen nga agbibinnunotkami tapno maammoan ti familia a mangted iti kayo a pagpuor iti daton a maidatag iti APO a Diosmi, kas mayannurot iti bilin ti Linteg.

³⁵Tinawenⓔ nga ipanmi iti Templo dagiti daton nga agtaud iti umuna nga apitmi ken ti umuna a maluom a bunga dagiti kayomi.

³⁶Kasⓕ sagudayen ti Linteg, ipanmi kadagiti papadi nga agserserbi iti Templo dagiti sumaganad: ti inauna nga anakmi a lalaki tapno maidaton iti Dios; ti inauna nga urbon ti bakami; ti inauna nga urbon ti karneromi ken ti inauna nga urbon ti kaldingmi.

³⁷Ipanmiⓖ met kadagiti papadi iti Templo ti bellaay a maaramid iti umuna nga apit iti tinawen, kasta met dagiti dadduma a datonmi nga arak, lana ti olibo ken amin a kita ti frutas. Ipanmi kadagiti Levita, isuda nga agur-urnong kadagiti apagkapullo dagiti maapit iti dagami, dagiti apagkapullo dagiti apit iti talonmi.

³⁸Tunggalⓗ makolekta dagiti apagkapullo, kumuyog dagiti papadi a kaputotan ni Aaron kadagiti Levita. Ikabil dagiti Levita ti maurnongda iti pagiduldulinan iti Templo tapno mausar iti Templo ti amin a maurnongda.

³⁹Ipan dagiti Israelita ken dagiti Levita dagiti maited a makan, arak ken lana ti olibo iti pagiduldulinan kadagiti alikamen ti Templo ken iti pagyanan dagiti papadi a madama nga agserserbi, dagiti guardia ti Templo ken dagiti kamkameng ti koro ti Templo.

³⁹Diminto baybay-an ti balay ti Diosmi.