Nehemias 13:1-31 RIPV1996 - Bible AI

¹Idiⓚ maibasbasa ti Linteg ni Moises kadagiti tattao, nakadanonda iti maysa a paset a nagkuna a maiparit ti Ammonita wenno Moabita a tumipon kadagiti tattao ti Dios.

²Ngamin,ⓛ dida inikkan idi dagiti Israelita iti kanen ken inumen idi rimmuarda idiay Egipto. Tinangdananda ketdi ni Balaam a mangilunod iti Israel ngem pinagbalin ti Diostayo ti lunod a bendision.

³Idi mangngeg dagiti Israelita daytoy a linteg, linaksidda iti Israel ti amin a tattao a ganggannaet.

⁴Nabayagen a nasayaat ti panagtunos da Eliasib a padi ken ni Tobias. Ni Eliasib ti mangay-aywan kadagiti kuarto a pagiduldulinan iti uneg ti Templo.

⁵Pinalubosanna ni Tobias a mangaramat iti dakkel a kuarto a nairanta a pagidulinan laeng kadagiti daton a makan ken insenso; alikamen a maar-aramat iti Templo; dagiti daton nga agpaay kadagiti papadi; ken dagiti apagkapullo ti trigo, arak ken lana ti olibo a maited kadagiti Levita, kadagiti kantores ti Templo ken kadagiti guardia ti Templo.

⁶Awanak idiay Jerusalem idi mapaspasamak dagitoy. Ngamin, iti maika-32 a tawen a panagari ni Artaxerxes,[12] nagsubliak idiay Babilonia tapno makiumanak kenkuana. Iti saan a nabayag, pinalubosannak,

⁷ket nagsubliak idiay Jerusalem. Naklaatak a nakaammo a pinalubosan ni Eliasib ni Tobias a mangaramat iti maysa a kuarto iti Templo.

⁸Kasta unay ti pungtotko ket impurruakko iti ruar dagiti amin a gargaret ni Tobias.

⁹Imbilinko a maaramid ti seremonia ti pannakadalus dagiti kuarto sako pinaisubli dagiti alikamen ti Templo, dagiti daton a makan ken ti insenso.

¹⁰Nadamagkoⓜ pay a pimmanawen dagiti Levita ken dagiti kantores ti Templo ket nagsublida kadagiti talonda, gapu ta saan nga umdas a pagbiagda ti it-ited dagiti tattao.

¹¹Inungtak dagiti ofisiales iti panangipalubosda a mabaybay-an ti Templo. Insublik dagiti Levita ken musiko ket pinagtrabahok manen ida iti Templo.

¹²Kalpasanna,ⓝ inyeg dagiti amin nga Israelita dagiti apagkapullo ti trigo, arak ken lana ti olibo kadagiti bodega iti Templo.

¹³Insaadko dagiti sumaganad a mangaywan kadagiti pagiduldulinan: Selemias a padi; Zadok a masirib iti Linteg; ken Pedaias, maysa a Levita. Ni Hanan nga anak ni Zaccur ken apoko ni Mattanias ti katulonganda. Ammok a mapagtalkan dagitoy a tattao a mangiwaras kadagiti kasapulan dagiti padada nga agtartrabaho.

¹⁴Laglagipem, O Diosko, amin dagitoy nga impaayko iti Templom ken iti panagdaydayaw sadiay.

¹⁵Itiⓞ dayta a tiempo, nakakitaak kadagiti tattao idiay Juda nga agpespespes iti ubas iti Aldaw a Panaginana. Adda dagiti agikarkarga iti trigo, arak, ubas, igos ken dadduma pay kadagiti asnoda sada ipan idiay Jerusalem. Binallaagak ida a saanda nga aglako iti aniaman iti dayta nga aldaw.

¹⁶Sumagmamano a lallaki a taga-siudad ti Tiro ti agnaed idiay Jerusalem ket agisangpetda iti ikan ken nadumaduma a tagilako nga ilakoda kadagiti kailiantayo iti Aldaw a Panaginana.

¹⁷Inungtak dagiti papangulo a Judio ket imbagak kadakuada, “Kitaenyo ti kinadakes nga ar-aramidenyo! Pagbalinenyo a saan a nasantoan ti Aldaw a Panaginana.

¹⁸Daytoy ti nangdusaan ti Diostayo kadagidi kapuonanyo idi dinadaelna daytoy a siudad. Ngem kaskasdi a rubrobanyo ti pungtot ti Dios iti Israel gapu iti panangtulawyo iti Aldaw a Panaginana.”

¹⁹Ngarud, imbilinko a marikpan dagiti ruangan ti siudad apaman a dumteng ti sardam[13] a panangrugi ti Aldaw ti Panaginana ket sadanto la maluktan no mapalabas dayta nga aldaw. Pinagbantayko ti sumagmamano kadagiti tattaok kadagiti ruangan tapno awan ti palubosanda nga agiserrek kadagiti tagilako iti Aldaw a Panaginana.

²⁰Naminsan wenno namindua nga immian dagiti komersiante nga agtagtagilako iti amin a kita ti tagilako iti ruar ti siudad sakbay ti Aldaw a Panaginana.

²¹Binallaagak ida, “Awan serserbi nga agyankayo dita ruar a pangurayanyo ti bigat. No ulitenyo daytoy, dusaenkayo.” Manipud idin, didan nagsubli iti Aldaw a Panaginana.

²²Binilinko dagiti Levita nga aramidenda ti seremonia ti pannakadalusda ket guardiaanda dagiti ruangan tapno awan duadua a mangilin ti Aldaw a Panaginana.

²²Laglagipennak manen, O Dios, gapu iti daytoy ket ispalennak gapu iti naindaklan nga ayatmo.

²³Itiⓟ dayta a tiempo, natakuatak met nga adu kadagiti Judio ti nangasawa kadagiti babbai iti Asdod, Ammon ken Moab.

²⁴Kagudua ti bilang dagiti annakda ti agsao iti pagsasao ti Asdod wenno ti sabali a pagsasao ket dida ammo ti agsao iti lengguahetayo.

²⁵Nakisuppiatak kadakuada ket inlunodko ida. Kinabilko ida ket pinarutko ti buokda. Pinagsapatak ida iti nagan ti Dios a didanton makiasawa kadagiti ganggannaet, isuda ken dagiti annakda.

²⁶Imbagakⓠ kadakuada, “Dagiti ganggannaet a babbai ti nakaigapuan ti panagbasol ni Ari Solomon. Awan ti siasinoman nga ari dagiti nasion a pumada kenkuana. Inay-ayat ti Dios ket insaadna nga ari a mangituray iti entero nga Israel, ngem nagbasol gapu kadagiti ganggannaet a babbai.

²⁷Kayatyo kadi a sawen a tuladenmi ti dakes nga aramidyo ket sukirenmi ti Dios babaen iti panangasawami kadagiti ganggannaet a babbai?”

²⁸Anakⓡ ni Eliasib a Nangato a Padi ni Joyada. Ngem maysa kadagiti annak ni Joyada ti nangasawa iti anak ni Sanballat a taga-ili ti Bet Horon, isu a pinapanawko ni Joyada idiay Jerusalem.

²⁹Laglagipem, O Dios, ti panangtulaw dagitoy a tattao iti akem a kinapadi ken iti tulagyo kadagiti papadi ken Levita.

³⁰Inaramidko ti seremonia tapno maikkat kadakuada ti amin a banag a ganggannaet. Nagaramidak kadagiti alagaden dagiti papadi ken dagiti Levita tapno ammo ti tunggal maysa ti annongenna.

³¹Nangitudingak iti tiempo a pannakaipan dagiti kayo a pagpuor iti daton, kasta met dagiti umuna nga apit ken dagiti umuna a bungbunga a maluom.

³¹Laglagipem amin dagitoy, O Dios, ket padayawannak.