Numero 14:1-45 RIPV1996 - Bible AI

¹Nagpatpatnag a nagsangsangit dagiti tattao gapu iti ladingitda.

²Nagsaoda iti maibusor kada Moises ken Aaron. Kinunada, “Naim-imbag la koman a nataykam idiay Egipto wenno uray ditoy let-ang.

³Apay nga ipannatayo ti APO iti dayta a daga? Patayendatayto dagiti kabusortayo ket tiliwenda dagiti assawa ken annaktayo. Nasaysayaat nga agsublitayo idiay Egipto.”

⁴Iti kasta, nagsasaritaanda ti panangpilida iti mangipangulo kadakuada nga agsubli idiay Egipto.

⁵Nagpakleb da Moises ken Aaron iti imatang dagiti amin a tattao.

⁶Rinay-ab ti dua kadagiti napan nangsukimat iti daga ti pagan-anayda gapu iti ladingitda. Isuda da Josue ken Caleb nga anak ni Jefone.

⁷Kinunada kadagiti tattao, “Nasayaat ti daga a napanmi kinita.

⁸No maragsakan kadatayo ti APO, ipannatayto sadiay ket itedna kadatayo dayta a nabaknang ken nadam-eg a daga.

⁹Diyoⓡ busoren ti APO, ket dikay agbuteng kadagiti tattao nga agnanaed sadiay. Nalaka a parmekentayo ida ta kaduatayo ti APO idinto nga awanen dagiti didiosen a mangsalsalaknib kadakuada. Ngarud, dikay agbuteng.”

¹⁰Ranta dagiti tattao a batoen ida agingga a matayda, ngem pagammoan, nakitada ti makapurar a lawag ti dayag ni Yahweh iti ngatoen ti Tolda ti Dios.

¹¹Kinuna ni Yahweh ken ni Moises, “Kasano pay kabayag ti panangumsi kaniak dagitoy a tattao? Kasano pay kabayag ti dida panagtalek kaniak idinto a nagipakitaak kadakuada kadagiti adu a milagro?

¹²Mangyegak iti angol ket dadaelek ida. Ngem pagbalinenka nga ama ti maysa a nasion a dakdakkel ken nabilbileg ngem isuda.”

¹³Ngemⓢ kinuna ni Moises ken ni Yahweh, “Inruarmo dagitoy a tattao idiay Egipto babaen iti pannakabalinmo. Inton madamag dagiti Egipcio ti inaramidmo kadagiti tattaom,

¹⁴ibagadanto kadagiti tattao nga agnaed iti daytoy a daga. Nadamagen dagitoy a tattao a sika nga APO ket addaka kadakami. Ammoda nga agparangka a silalatak no agsardeng ti ulepmo iti ngatoenmi, ket ammoda nga idaldalannakami babaen iti monmon nga ulep iti aldaw ken monmon nga apuy iti rabii.

¹⁵Ita, no ikisapmo ida, ibaganto dagiti nasion a makaammo iti kinalatakmo

¹⁶a pinapataymo dagiti tattaom iti let-ang, agsipud ta dimo kabaelan nga ipan ida iti daga nga inkarim nga ited kadakuada.

¹⁷Dawatek ngarud, O APO, nga ipakitam a naindaklanka, kas inkarim idi kinunam,

¹⁸‘Siak,ⓣ ni Yahweh, saanak a nalaka nga agpungtot. Ipakitak ti naindaklan nga ayat ken kinapudnok, ket pakawanek ti basol ken panagsukir. Nupay kasta, dusaek dagiti annak ken appoko agingga iti maikapat a kaputotan gapu kadagiti basol dagiti nagannak kadakuada.’

¹⁹Ita ngarud, O APO, dawatek a pakawanem ti basol dagitoy a tattao a kas mayannatup iti kadakkel ti di agbalbaliw nga ayatmo, kas iti panangpakawanmo kadakuada manipud pay iruruarda idiay Egipto.”

²⁰Simmungbat ni Yahweh, “Pakawanek ida a kas iti dinawatmo.

²¹Ngemⓤ isapatak iti naganko ken iti dayagko a mangpunno iti lubong,

²²nga awan kadagitoy a tattao ti makastrek iti dayta a daga. Nakitada ti makapurar a lawag ti dayagko ken dagiti milagro nga inaramidko idiay Egipto ken idiay let-ang, ngem namin-adu a sinuotda ti anusko, ket dida nagtulnog kaniak.

²³Pulos a didanto makastrek iti daga nga inkarik nga ited kadagiti kapuonanda. Awan ti uray maysa kadagiti nanglaksid kaniak ti makastrek iti dayta a daga.

²⁴Ngemⓥ agsipud ta maisupadi kadakuada ti rikna ni Caleb nga adipenko, ket nagtalinaed a napudno kaniak, ipankonto iti daga a nakitana. Tagikuaento dagiti kaputotanna ti daga

²⁵a dagiti tanapna pagnaedan ita dagiti Amalekita ken dagiti Cananeo. Inton bigat, agsublikayo ket inkay iti let-ang nga agturong iti Gulfo ti Aqaba.”

²⁶Kinuna ni Yahweh kada Moises ken Aaron,

²⁷“Kaanonto nga agsardeng ti panagrekreklamo dagitoy managdakdakes a tattao? Naumaakon kadagiti panagtantanabutobda!

²⁸Ibagam kadakuada daytoy a sungbatko: ‘Isapatak iti naganko a maaramidto ti dinawatyo. Siak, ni Yahweh a sibibiag, ti nagsao.

²⁹Mataykaytoⓦ ket maiwalang dagiti bangkayyo ditoy let-ang. Agsipud ta nagsaokayo iti maibusor kaniak, awanto kadakayo nga agtawen iti nasursurok ngem duapulo ti makastrek iti dayta a daga.

³⁰Inkarik nga agnaedkayto sadiay, ngem awanto ti uray maysa a makagteng sadiay malaksid kada Caleb ken Josue.

³¹Kinunayo a matiliwto dagiti annakyo, ngem ipankonto ida iti dayta a daga a linaksidyo, ket agyandanto sadiay.

³²Mataykayto ditoy let-ang.

³³Agalla-allantoⓧ dagiti annakyo ditoy let-ang iti las-ud ti uppat a pulo a tawen. Agsagabadanto iti dusa ti kinasukiryo agingga iti ipapatay ti maudi kadakayo.

³⁴Uppat a pulonto a tawen nga ikaroyo dagiti basolyo. Uppat a pulo nga aldaw a sinukimatyo ti daga, ket maysa a tawen ti kaibatogan ti maysa nga aldaw. Maammoanyonto ti kaipapanan ti panangbusorko kadakayo.

³⁵Isapatak nga aramidek daytoy kadakayo a managdakdakes a tattao, dakayo a naguummong a bumusor kaniak. Mataykayto amin ditoy let-ang. Siak, ni Yahweh, ti nagsao.’”

³⁶Saan a pudno ti impadamag dagiti imbaon ni Moises a mangsukimat iti daga, ket gapu iti daytoy, nagsao dagiti tattao iti maibusor ken ni Yahweh. Iti kasta, pinagsakit ida ni Yahweh ket natayda.

³⁸Kadagiti sangapulo ket dua a naibaon, da la Josue ken Caleb ti nakalasat.

³⁹Kasta unay ti leddaang dagiti Israelita idi ipakaammo ni Moises ti sao ni Yahweh.

⁴⁰Kabigatanna, nasapada a nagrubbuat a mangsakup iti katurturodan a pagilian. Kinunada, “Ita, nakasaganakamin a mapan iti lugar nga imbaga ti APO. Bigbigenmi a nagbasolkami.”

⁴¹Ngem kinuna ni Moises, “Apay ngarud a sukirenyo ti APO? Saankayto nga agballigi.

⁴²Dikayo mapmapan. Awan kadakayo ti APO ket parmekendakayto dagiti kabusoryo.

⁴³Inton makigubatkayo kadagiti Amalekita ken kadagiti Cananeo, mataykayto. Awanto ti APO kadakayo agsipud ta diyo kinayat ti sumurot kenkuana.”

⁴⁴Nupay kasta, napanda latta iti katurturodan a pagilian, uray no nagbati ti Lakasa ti Tulag ni Yahweh ken ni Moises iti kampo.

⁴⁵Dinarup dagiti Amalekita ken dagiti Cananeo nga agnanaed sadiay dagiti Israelita. Naparmek dagiti Israelita ket nasunsonda agingga idiay Horma.