Numero 21:1-35 RIPV1996 - Bible AI

¹Idiⓛ madamag ti Cananeo nga ari ti Arad iti akin-abagatan a paset ti Canaan a magna dagiti Israelita iti Atarim, rinautna ida ket innalana a balud ti sumagmamano kadakuada.

²Insapata dagiti Israelita iti APO: “No palubosannakami a mangparmek kadagitoy a tattao, idatonmi kenka ida ken dagiti siudadda ket dadaelenmi ida.”

³Impangag ni Yahweh ti dawatda ket tinulonganna ida a mangparmek kadagiti Cananeo. Ngarud, dinadael ida dagiti Israelita kasta met dagiti siudadda sada pinanaganan ti lugar iti Horma.[19]

⁴Pimmanawⓜ dagiti Israelita iti Bantay Hor; linikawda ti sakup ti Edom ket nagnada iti kalsada nga agturong iti Gulfo ti Aqaba. Ngem iti dalan, naibus ti anus dagiti tattao

⁵ketⓝ nagsaoda iti maibusor iti Dios ken ni Moises. Inreklamoda, “Apay nga impanawnakami idiay Egipto? Tapno patayennakam iti daytoy a let-ang nga awan ti taraon wenno danum? Maumakamin iti kastoy a kanen nga awan serserbina!”

⁶Gapu iti daytoy, nangibaon ni Yahweh kadagiti nagita nga uleg iti ayanda ket adu nga Israelita ti nakagat a puon ti nakatayanda.

⁷Napan dagiti tattao ken ni Moises ket kinunada, “Nagbasolkami iti panagsaomi iti maibusor iti APO kasta met kenka. Ikararagmo koma iti APO nga ipanawna dagitoy nga uleg.” Iti kasta, inkararagan ni Moises dagiti tattao.

⁸Imbaga ni Yahweh a mangaramid ni Moises iti sinan-uleg a bronse sana ibayog tapno ti siasinoman a makagat umimbag no kitaenna ti sinan-uleg.

⁹Nangaramidⓞ ngarud ni Moises iti sinan-uleg, ket inkabilna iti kayo. No adda kagaten ti uleg, umimbag no kitaenna ti sinan-uleg.

¹⁰Intuloy dagiti Israelita ti nagdaliasat ket nagkampoda idiay Obot.

¹¹Pimmanawda iti dayta a lugar ket nagkampoda kadagiti rebba ti Abarim iti let-ang iti dayaen ti sakup ti Moab.

¹²Pimmanawda sadiay ket nagkampoda iti Tanap ti Zered.

¹³Manipud sadiay, intuloyda manen ti nagdaliasat ket nagkampoda iti ballasiw ti Karayan Arnon iti let-ang iti bangirna ti amianan a dumanon iti sakup dagiti Amorreo. (Ti Arnon ti nagbeddengan ti sakup dagiti Moabita ken ti sakup dagiti Amorreo.)

¹⁴Daytoy ti gapuna nga iti Libro dagiti Pannakigubat ni Yahweh adda kastoy a nailanad: “…ti ili ti Waheb idiay Sufa, ken dagiti tanap; ti Karayan Arnon,

¹⁵ken ti salogan dagiti tanap a dumanon iti ili ti Ar ken iti beddeng ti Moab.”

¹⁶Manipud sadiay, napanda iti maysa a lugar a managan Bubbubon a nagkunaan ni Yahweh ken ni Moises: “Ummongem dagiti tattao ket ikkak ida iti danum.”

¹⁷Iti dayta a tiempo, kinanta dagiti Israelita daytoy:

¹⁷“Dakayo a bubon, agipussuakkay iti danum ket kantaanmi—

¹⁸Bubon a kinali dagiti papangulo, dagiti agtuturay dagiti tattao; bubon a nakali babaen iti setro ken bastonda.”

¹⁸Pimmanawda iti let-ang ket nagturongda idiay Matana.

¹⁹Manipud sadiay, napanda idiay Nahaliel ket manipud Nahaliel, napanda idiay Bamot

²⁰ket manipud Bamot, napanda iti tanap iti sakup ti Moab, iti babaen ti Bantay Pisga a pakatannawagan iti let-ang.

²¹Nangibaon dagiti Israelita kadagiti pannakabagida a mapan ken ni Sihon nga ari dagiti Amorreo ket kinunada kenkuana:

²²“Palubosannakami koma a lumasat iti dagam. Surotenmi ti dalan, dakami ken dagiti animalmi; dikam sumrek kadagiti talonyo wenno kaubasanyo ket dikam uminum kadagiti bubonyo. Magnakami iti kangrunaan a kalsada[20] agingga a makaruarkami iti sakupmo.”

²³Ngem saan a palubosan ni Sihon a lumasat dagiti Israelita iti dagana. Inummongna ketdi ti armadana ket dinarupna dagiti Israelita. Nagrarangetda idiay Jaaz iti let-ang.

²⁴Nagballigi dagiti Israelita a nangparmek kadagiti kabusor ket sinakupda ti dagada, manipud Karayan Arnon iti amianan ti Jabbok agingga iti Jazer iti beddeng dagiti Ammonita.[21]

²⁵Sinakup dagiti Israelita ti amin a siudad dagiti Ammonita, agraman ti Hesbon ken amin a kabangibangna nga ili ket nagnaedda sadiay.

²⁶Ti Hesbon ti kangrunaan a siudad ni Sihon nga ari dagiti Amorreo. Nakiranget ni Sihon iti sigud nga ari ti Moab ket sinakupna ti amin a dagana agingga iti Karayan Arnon.

²⁷Daytoy ti gapuna nga ikanta dagiti mannaniw:

²⁷“Umaykay iti Hesbon a siudad ni Ari Sihon! Kayatmi a makita a mabangon manen ket matarimaan.

²⁸Naminsan,ⓟ manipud iti siudad ti Hesbon, kasla apuy a rimmuar ti armada ni Sihon. Dinadaelna ti siudad ti Ar iti Moab ken inkisapna[22] dagiti turod ti akingngato nga Arnon.

²⁹Anian a kinadaksanggasatyo, dakayo a tattao ti Moab! Dakayo nga agdaydayaw ken ni Kemos, agturongkay iti pannakadadael. Pinalubosan ti diosmo a kinamat ti ari dagiti Amorreo dagiti lallaki, ken tiniliwna a kas balud dagiti babbai.

³⁰Ngem nadadaelen dagiti kaputotanda, manipud Hesbon agingga't idiay Dibon, manipud Nasim agingga't idiay Nofa, iti asideg ti Medeba.”

³¹Ngarud, nagnaed dagiti Israelita iti sakup dagiti Amorreo.

³²Kalpasanna, nangibaon ni Moises kadagiti tattao tapno ammoenda no kasano a serkenda ti siudad ti Jazer. Sinakup dagiti Israelita ti siudad ken dagiti kabangibang nga ili; pinagtalawda dagiti Amorreo nga agnaed sadiay.

³³Nagsikko dagiti Israelita ket nagnada iti dalan nga agpa-Basan. Rimmuar ni Og nga ari ti Basan agraman ti armadana ket dinarupna ida idiay Edrei.

³⁴Kinuna ni Yahweh ken ni Moises, “Dika agbuteng kenkuana. Yawatko kenka ti ari, agraman ti amin a tattaona ken ti dagana. Aramidem kenkuana ti inaramidmo ken ni Sihon, ti ari dagiti Amorreo a nagturay idiay Hesbon.”

³⁵Pinatay dagiti Israelita ni Og, dagiti annakna ken amin a tattaona—awan ti nakalasat kadakuada. Ket sinakupda ti dagana.