Numero 34:1-29 RIPV1996 - Bible AI

¹Inted ni Yahweh ken ni Moises

²dagitoy nga alagaden nga agpaay kadagiti Israelita: “Inton sakupenyo ti Canaan nga itedko kadakayo, dagitoyto ti beddeng ti dagayo:

³Mangrugi ti akin-abagatan a beddeng iti let-ang ti Zin agingga iti beddeng ti Edom. Mangrugi iti akindaya a paset ti akin-abagatan a pungto ti Natay a Baybay.

⁴Agsikko ti beddeng nga agpa-abagatan nga agturong iti Bessang ti Akrabbim ket dumanon iti Zin agingga iti abagatan idiay Kades Barnea. Agtuloy iti amianan-a-laud agingga iti Hazar Addar sa aglayon iti Azmon.

⁵Sadiay, agsikko nga agturong iti tanap iti beddeng ti Egipto agingga idiay Mediterranean.

⁶“Ti Taaw Mediterranean ti akinlaud a beddeng.

⁷“Mangrugi ti akin-amianan a beddeng iti Taaw Mediterranean agingga iti Bantay Hor

⁸ket aglayon iti Bessang ti Hamat. Aglayon iti Zedad

⁹sa idiay Zifron ket agpatingga idiay Hazar Enan.

¹⁰“Mangrugi ti akindaya a beddeng iti Hazar Enan agingga iti Sefam.

¹¹Agpa-abagatan nga agturong idiay Harbel, iti dayaen ti Ain sa aglayon kadagiti katurturodan iti akindaya nga igid ti Dan-aw ti Galilea.

¹²Aglayon iti igid ti Karayan Jordan agingga iti Natay a Baybay. Daytoy ti beddeng ti dagayo iti aglawlaw.”

¹³Imbagaⓠ ⓡ ni Moises kadagiti Israelita, “Daydiay ti daga nga ited ti APO kadagiti siam ket kagudua a tribu; mabingbingay babaen iti binnunot.

¹⁴Addan daga a naited kadagiti tribu da Ruben ken Gad ken ti kagudua a tribu ni Manases

¹⁵iti ballasiw ti Jordan iti bangirna iti daya a kasumbangir ti Jerico.”

¹⁶Kinuna ni Yahweh ken ni Moises,

¹⁷“Tarawidwidan da Eleazar a padi ken Josue nga anak ni Nun ti pannakabingbingay iti daga.

¹⁸Mangpilika met iti tunggal tribu iti maysa a pangulo a tumulong kadakuada.

¹⁹Dagitoy dagiti natudingan: ni Caleb nga anak ni Jefone, iti tribu ni Juda;

²⁰ni Semuel nga anak ni Amiud, iti tribu ni Simeon;

²¹ni Elidad nga anak ni Kislon, iti tribu ni Benjamin;

²²ni Bukki nga anak ni Jogli, iti tribu ni Dan;

²³ni Haniel nga anak ni Efod, iti tribu ni Manases;

²⁴ni Kemuel nga anak ni Ziftan, iti tribu ni Efraim;

²⁵ni Elizafan nga anak ni Parnak, iti tribu ni Zabulon;

²⁶ni Paltiel nga anak ni Azan, iti tribu ni Issacar;

²⁷ni Ahihud nga anak ni Selomi, iti tribu ni Aser;

²⁸ken ni Padahel nga anak ni Amiud, iti tribu ni Neftali.”

²⁹Dagitoy dagiti dinutokan ni Yahweh a mangbingay iti sanikua nga agpaay kadagiti Israelita iti daga ti Canaan.