Oseas 10:1-15 RIPV1996 - Bible AI

¹Ubas nga adu ti bungana ti kayarigan idi dagiti tattao ti Israel. Bimmaknangda a bimmaknang ngem immadu met nga immadu dagiti altar a binangonda. Bimmaknang a bimmaknang ti dagada, ngem ad-adda met a pinapintasda dagiti adigi a bato a pagdaydayawanda.

²Ngem manangallilaw dagiti Israelita, ket ita, masapul nga agsagabada gapu kadagiti basbasolda. Rebbaento ti APO dagiti altarda; dadaelennanto dagiti baton-lagip nga adigida.

³Iti saan a mabayag, kunanto dagitoy a tattao, “Awan arimi, gapu ta dikami nagbuteng iti APO. Ngem ania met ti maipaay kadakami ti ari?”

⁴Ubbaw dagiti saoda; ulbod dagiti panagsapatada no makitulagda. Nagbalin a killo ti hustisia nga arigna iti makasabidong a ruot nga agwaras iti naarado a talon.

⁵Mapabutnganto dagiti taga-Samaria ket agladingitdanto iti pannakapukaw ti balitok a sinan-urbon ti baka[16] a didiosen ti Bethaven.[17] Isuda ken dagiti papadi nga agserserbi iti imahen, sangitandanto ti didiosen. Agdung-awdanto inton maikkat dagiti napintas nga arkosna.

⁶Maipanto ti didiosen idiay Asiria a kas daton iti natan-ok nga emperador. Agsagabanto ti Israel iti pannakaibabain gapu iti balakad nga impangagna.

⁷Maitalawto ti arina, kas iti puted ti kayo nga yanud ti danum. Agpukaw a kas labutab ti danum.

⁸Madadaeltoⓙ dagiti santuario kadagiti tapaw ti Aven. Wen, ti disso a pagdaydayawan dagiti Israelita kadagiti didiosen. Agtubonto dagiti sisiitan a mula ken kalkalunay kadagiti altarda. Ngarud, kunadanto kadagiti bantay, “Ilemmengdakami!” ken kadagiti turod, “Gaburandakami!”

⁹Kunaⓚ ti APO, “Saan pay a nagsardeng ti panagbasol dagiti Israelita manipud idi addada idiay Gabaa. Isut' gapuna a madanon ida ti gubat sadiay.

¹⁰Rautekto[18] dagitoy managbasol a tattao ket dusaek ida. Agtitiponto dagiti pagilian a mangraut kadakuada tapno dusaenda ida gapu kadagiti adu a basolda.

¹¹“Mayarig idi ti Israel iti bumalasang a baka a nasayaat ti pannakasanayna ken sisasagana nga agirik. Ngem inkeddengko ti mangikabil iti sangol[19] iti napintas a tengngedna ket pagtrabahoek iti nadagdagsen. Pinagaradok ti Juda. Pinagsagadko ti Israel.

¹²Kinunakⓛ idi, ‘Agaradokayo iti baro a daga para iti pagimbaganyo. Agmulakayo iti kinalinteg ket apitenyo dagiti bendision a nagun-odyo iti kinapudnoyo kaniak. Ta tiempon ti panagpatulongyo ken ni Yahweh ket umaykonto ibuyat dagiti parabur kadakayo.’

¹³Ngem kinadakes ketdi ti immulayo ket kinadangkes ngarud ti inapityo. Nangankayo iti bunga ti allilaw.

¹³“Gapu ta nagtalekkayo kadagiti luganyo a pakigubat [20] ken iti kaadu dagiti soldadoyo,

¹⁴umayto ti gubat iti iliyo ket madadaelto ti amin a sarikedkedyo. Kaslanto iti aldaw idi rinebbek ni Ari Salmana ti siudad ti Bet-arbel ket narumrumek dagiti inna ken dagiti annakda.

¹⁵Kastoyto ti mapasamak kadakayo, dakayo a tattao ti Betel gapu iti nakabutbuteng a kinadakes nga inaramidyo. Apaman a mangrugi ti gubat, matayto ti ari ti Israel.”