Oseas 12:1-14 RIPV1996 - Bible AI

¹Awan serserbi ken makadadael ti amin nga aramid dagiti tattao ti Israel manipud bigat agingga iti rabii. Umad-adu ti panangallilawda ken dagiti naranggas nga aramidda. Makitulagda iti Asiria ken makinegosioda iti Egipto.”

²Adda pammabasol ti APO nga iparangna a maibusor kadagiti tattao ti Juda. Dusaenna met dagiti tattao ti Israel gapu kadagiti aramidda.

³Idiⓞ ⓟ addada pay laeng iti tian ti inada, nakigubalen ni Jacob a kapuonanda ken ni Esau a kasinginna. Idi maysan nga agtutubo ni Jacob, nakigabbo ni Jacob iti Dios—

⁴nakirangetⓠ iti maysa nga anghel ket nagballigi. Nagsangit ni Jacob ket nagdawat iti bendision. Idiay Betel, nasabatna ti Dios, ket nakisao kenkuana.[23]

⁵Daytoy ti APO a Mannakabalin-amin a Dios—APO ti naganna.

⁶Ngarud, dakayo a kaputotan ni Jacob, agtalekkayo iti Dios ket agsublikayo kenkuana. Agaramidkayo iti naimbag ken nalinteg, ket aguraykayo a siaanus kenkuana.

⁷Kuna ti APO, “Ulbod dagiti tattao ti Israel a kas kadagiti Cananeo; pagay-ayatda a suitiken dagiti aggatgatang babaen kadagiti saan a husto a pagtimbangan. ‘Nabaknangkami,’ kunada. ‘Adu ti naurnongmi a sanikua. Ket awan ti mabalin a mangpabasol kadakami a sinaurmi ti ibabaknangmi.’

⁹Ngemⓡ siak nga APO a Diosyo a nangiruar kadakayo idiay Egipto, pagnaedenkayto manen iti tolda a kas idi immayak kadakayo idiay let-ang.

¹⁰“Nagsaoak kadagiti profeta ket nagipakitaak kadakuada iti adu a parmata. Babaen kadagiti profeta, binallaagak dagiti tattaok.

¹¹Ngem idiay Galaad a pagdaydayawan dagiti didiosen, matayto dagiti tattao nga agdaydayaw kadakuada. Idiay met Gilgal, maidaton dagiti toro a kas sakrifisio, ket agbalinto dagiti altar sadiay a kas gabsuon ti bato ti tay-ak.”

¹²Kapilitanⓢ a nagkamang idiay Mesopotamia ni Jacob a kapuonantayo. Tapno magun-odna ti babai nga agbalin nga asawana, nagserbi iti sabali a tao ket impastorna dagiti karnerona.

¹³Imbaonⓣ ti APO ti maysa a profeta a nangisalakan kadagiti tattao iti Israel iti pannakatagabuda idiay Egipto. Inaywananna ida.

¹⁴Napalalo ti pungtot ti APO gapu iti inaramid dagiti tattao ti Israel. Rumbeng ngarud a mapapatayda gapu kadagiti krimen a pinataudda. Dusaennanto ida gapu iti pannakaibabain nga inyegda kenkuana.