Oseas 6:1-11 RIPV1996 - Bible AI

¹Kuna dagiti tattao, “Agsublitayo iti APO. Rinangrangkaynatayo, wen, ngem agasannatayto; sinugatnatayo ngem bedbedannanto dagiti sugattayo.

²Kalpasan ti dua wenno tallo nga aldaw, pagungarennatayto, ket agbiagtayto iti imatangna.

³Agpakumbabatayo iti imatang ti APO. Ikagumaantayo ti mangbigbig kenkuana. Awan duadua ti yaayna kadatayo, kas iti idadateng ti parbangon, kas iti damo a tudo a mangsibog iti daga.”

⁴Ngem kuna ti APO, “Israel ken Juda, ania ti aramidek kadakayo? Agpukaw ti kinapudnoyo kaniak, a kasla angep iti bigat; arigna iti linnaaw a nasapa a mapukaw.

⁵Daytoy ti gapuna nga imbaonko dagiti profetak a mangipakaammo iti pangngeddengko a mangyeg iti panagdadael. Nalawag ti kayatko nga aramiden kadakayo a tattaok.

⁶Kalikagumakⓕ ti saan nga agbalbaliw nga ayatyo, saan a dagiti animal a puoranyo. Kaykayatko nga ammoendak dagiti tattaok ngem dagiti datonda.

⁷“Ngem apaman a simrekda iti daga ti Adam, sinalungasingda ti nagtutulaganmi.

⁸Siudad dagiti managdakdakes ken mammapatay ti Galaad.

⁹Bunggoy dagiti mannanakaw ti kayarigan dagiti papadina. Kanayonda nga agur-uray iti sanebenda. Agpapatayda uray iti dalan nga agturong iti nasantoan a lugar idiay ket igagarada nga aramiden.

¹⁰Adda nakitak a nakarimrimon a banag iti Israel: tinulawan dagiti tattaok ti bagida babaen iti panagdaydayawda kadagiti didiosen.

¹¹“Ket dakayo a tattao ti Juda, adda met ar-aramidenyo, ket nangitudingakon iti tiempo a panangdusak kadakayo.