Oseas 9:1-17 RIPV1996 - Bible AI

¹Tattao ti Israel, isardengyo a rambakan dagiti fiestayo iti rag-o a kas kadagiti pagano! Tinallikudanyo ti Diosyo ket saanka a napudno kaniak. Iti entero a daga, inlakoyo ti bagiyo a kas balangkantis ken ni didiosen a Baal a kas iti dakes a babai ket kinayatmo ti trigo nga imbayadna kenka iti entero a daga.

²Ngem saanton nga umanay a taraonyo ti trigo ken lana ti olibo ket awanton ti arak.

³Saanto nga agtalinaed dagiti tattao ti Israel iti daga ni Yahweh. Masapul nga agsublidanto idiay Egipto, ket mangandanto iti maiparit a taraon.[13]

⁴Kadagita ganggannaet a daga, saanto a mabalin nga agibuyatda iti daton nga arak iti APO wenno agidatag kadagiti sakrifisioda kenkuana. Mayarig ti taraonda iti taraon ti nagminatay. Matulawan ti mangan kadakuada. Awanto ti maipan iti Templo ti APO a kas sakrifisio. Kanendanto laeng a pamedped iti bisinda.

⁵Anianto ti aramidenyo iti aldaw ti rambak wenno iti fiesta ti APO?

⁶Kitaenyo! Inton itarayanda ti pannakadadael, dagitinto taga-Egipto ti mangawat kadakuada ket maitanemdanto idiay Memfis. Makumotanto iti barsanga dagiti gamengda. Agtubonto ti sisiitan kadagiti taengda.

⁷Umayenⓖ dagiti aldaw a panagdusa, ti tiempo nga agsagaba dagiti tattao kas maikari kadakuada. Inton mapasamak daytoy, maammoanto ti Israel! Kunayo, “Maag ti profeta. Agmauyong daytoy nga addaan iti parmata.” Dakayo a tattao, dakkel ti gurayo ta adu ti basolyo.

⁸Imbaonnak ti Dios a kas profeta, tapno pakdaarak dagiti tattaona nga Israelita. Ngem, iti sadinoman a papanak siloandak a kas tumatayab. Uray ti Templo ti Dios dagiti tattao ti kabusor ti profeta ditoy daga.

⁹Naigamerdaⓗ iti kinadakes, kas idi addada idiay Gabaa.[14] Malagipto ti Dios ti kinadakesda, ket dusaennanto ida gapu iti basolda.

¹⁰Kunaⓘ ti APO, “Idi damo a masarakak ti Israel, kaslaak la nakasarak kadagiti pinuon ti ubas a sumansantak iti let-ang. Idi damo a makitak dagiti kapuonanyo, kaslaak la nakakita iti apagluom ken damo a bunga ti igos. Ngem idi dumtengda idiay Bantay Peor, rinugianda ti nagdaydayaw ken ni Baal.[15] Nagbalinda a makarimon a kas iti imahen nga inayatda.

¹¹Mapukawto ti kinatan-ok ti Israel. Kaslanto iti tumatayab a pumanaw. Awanton ti mayanakda, awanton agsikog ken aganak.

¹²Ngem uray no padakkelenda dagiti annakda, patayekto dagiti ubbing agingga nga awan mabati kadakuada. Inton baybay-ak dagitoy a tattao, nakabutbutengto dagiti didigra a dumteng kadakuada.”

¹³APO, makitak dagiti annakda a makamkamat ken mapapatay.

¹⁴Ania, O APO, ti dawatek nga aramidem kadagitoy a tattao? Pagbalinem nga alis ti sikogda! Saanmo a pagtubbogen dagiti susoda tapno dida matagibi dagiti maladagada!

¹⁵Kuna ti APO, “Nangrugi idiay Gilgal ti amin a kinadakesda. Sadiay met a nangrugi ti pananggurak kadakuada. Ket pagtalawekto ida iti daga gapu kadagiti dakes nga aramidda. Sinukirdak dagiti amin nga agtuturayda. Gibusakon ti ayatko kadakuada.

¹⁶Mula a nagango dagiti ramutna ti kayarigan ti Israel. Wen, mulada a dinto agbunga. Awanto ti annakda ngem uray no agpasngayda, patayekto met la dagiti annak a dungdungoenda.”

¹⁷Saan a dimngeg kenkuana dagiti tattaona, isu a laksidento ida ti Dios a pagserserbiak. Ket agalla-alladanto kadagiti pagilian.