Paltiing 15:1-8 RIPV1996 - Bible AI

¹Nakitak sadi langit ti sabali a naindaklan a pagilasinan, maysa a nakaskasdaaw a buya. Pito nga angheles nga addaan kadagiti pito a didigra. Dagitoy dagiti maudi a pakatungpalan ti napalalo a pungtot ti Dios.

²Ket nakitak ti kasla taaw a kristal a gumilgil-ayab. Nakitak pay dagiti nangparmek iti narungsot nga animal ken iti ladawanna, agraman iti animal a numero ti kaibatogan ti naganna. Agtatakderda iti igid ti taaw a kristal; ig-iggamanda dagiti arpa nga inted ti Dios kadakuada.

³Ketⓐ kankantaenda ti kanta ni Moises nga adipen ti Dios, ken ti kanta ti Kordero:

³“Apo Dios a Mannakabalin-amin Natan-ok ken nakaskasdaaw dagiti aramidmo! Ari dagiti pagilian.[17] Nalinteg ken napudno dagiti dalanmo!

⁴Siasinoⓑ ti saan nga agbuteng kenka, Apo? Siasino ti saan a mangitan-ok iti naganmo? Agsipud ta siksika laeng ti nasantoan. Umayto dagiti amin a pagilian Ket agdaydayawda iti sangoanam, Ta maimatangan ti amin dagiti nalinteg nga aramidmo.”

⁵Kalpasanⓒ daytoy, nakitak a naluktan ti templo sadi langit. Adda iti unegna ti tolda ti pammaneknek.

⁶Rimmuar iti templo dagiti pito nga angheles nga addaan kadagiti pito a didigra. Nakakawesda iti nadalus ken narangrang a linen a lupot ket adda balitok a banda a naiputipot iti barukongda.

⁷Maysa kadagiti uppat a sibibiag a parsua ti nangted kadagiti pito nga angheles iti pito a malukong a balitok. Napno dagitoy iti napalalo a pungtot ti Dios a sibibiag iti agnanayon nga awan inggana.

⁸Napnoⓓ ti templo iti asuk a naggapu iti dayag ken pannakabalin ti Dios. Awan ti makastrek iti templo agingga a di aggibus dagiti pito a didigra nga inyeg dagiti pito nga angheles.