Paltiing 17:1-18 RIPV1996 - Bible AI

¹Immasidegⓞ kaniak ti maysa kadagiti pito nga angheles nga addaan iti pito a malukong ket kinunana: “Umayka, ket ipakitak kenka ti pannakadusa ti reyna ti immoralidad, dayta agdindinamag a siudad a nabangon iti asideg dagiti adu a karayan.

²Nakikamalalaⓟ kenkuana dagiti ari iti daga, ket nabartek dagiti tattao iti sangalubongan iti arak ti kinaderrepna.”

³Nariknakⓠ nga addaak iti pannakabalin ti Espiritu ket impannak ti anghel iti let-ang. Nakitak sadiay ti maysa a babai a nakasakay iti narungsot nga animal a nalabaga a nasuratan ti entero a bagina kadagiti agkakadakes a nagan a maibusor iti Dios. Adda pito nga ulo ken sangapulo a sarana.

⁴Kolorⓡ ube ken nalabaga ti pagan-anay ti babai. Rumimatrimat dagiti alahasna a balitok, agkakapateg a bato ken perlas. Nakaiggem iti kopa a balitok a napno iti agkakaalas ken agkakarugit a banag a gapuanan ti kinaimmoralna.

⁵Naisurat iti mugingna ti nagan nga adda nalimed a kaipapananna: “Ti Agdindinamag a Babilonia, ina dagiti dakes a babbai ken amin a kinaderrep ditoy lubong.”

⁶Ket nakitak a nabartek ti babai iti dara dagiti tattao ti Dios ken iti dara dagiti martir—dagiti napapatay idi gapu iti kinapudnoda ken ni Jesus.

⁶Kasta unay siddaawko a nakakita iti babai.

⁷“Apay a masdaawka?” sinaludsod ti anghel kaniak. “Ibagak kenka ti nalimed a kaipapanan ti babai ken ti nagsakayanna a narungsot nga animal nga adda pito nga ulona ken sangapulo a sarana.

⁸Sibibiagⓢ idi ti nakitam nga animal ngem ita, natayen. Dandani rummuaren iti nakaun-uneg a yuyeng ket agturong iti pannakadadael. Dagiti tattao nga agbibiag iti daga a saan a naisurat ti naganda iti libro ti biag sakbay ti pannakaparsua ti lubong, masdaawdanto a makakita iti narungsot nga animal. Sibibiag idi ket ita, natayen, ngem agparangto manen.

⁹“Daytoy ti pakasapulan iti kinasirib ken pannakaawat. Dagiti pito nga ulo isuda ti pito a turod a pagtugtugawan ti babai. Iladawanda ti pito nga ari:

¹⁰Naparmeken ti lima kadakuada, agturturay pay laeng ti maysa, ket di pay immay ti maysa. Inton umay, apagbiitto laeng ti panagturayna.

¹¹Ket ti narungsot nga animal a sibibiag idi ngem ita natayen, isu ti maikawalo nga ari a maibilang kadagiti pito—agturongen iti pannakadadael.

¹²“Dagitiⓣ sangapulo a sara a nakitam, isuda dagiti sangapulo nga ari a di pay nagturay, ngem agturaydanto a kaduada ti narungsot nga animal iti uneg ti maysa nga oras.

¹³Maymaysa ti panggep dagitoy a sangapulo, ket itedda ti pannakabalin ken turayda iti narungsot nga animal.

¹⁴Gubatendanto ti Kordero, ngem parmekento ida ti Kordero ken dagiti naayaban, napili ken mapagtalkan a pasurotna agsipud ta isu ti Apo dagiti appo ken Ari dagiti ar-ari.”

¹⁵Kinuna pay ti anghel kaniak: “Dagiti nakitam a danum a pagtugtugawan ti immoral a babai, isuda dagiti adu a tattao iti amin a puli ken pagilian.

¹⁶Guraento dagiti nakitam a sangapulo a sara ken ti narungsot nga animal ti immoral a babai. Agawendanto amin a sanikuana sada panawan a lamolamo. Kanendanto ti lasagna ket puorandanto ti nabati.

¹⁷Tinignay ida ti Dios tapno sangsangkamaysada a mangibanag iti panggepna babaen iti pannangtedda iti turayda iti narungsot nga animal agingga iti pannakatungpal dagiti sao ti Dios.

¹⁸“Ti nakitam a babai, isu ti dakkel a siudad a mangituray kadagiti ar-ari iti daga.”