Paltiing 20:1-15 RIPV1996 - Bible AI

¹Nakitak ti maysa nga anghel a bumabbaba manipud langit. Iggemna ti maysa a dakkel a kawar ken ti tulbek ti nakaun-uneg a yuyeng.

²Tiniliwnaⓦ ti dragon, daydi duduogan nga uleg nga isu ti Diablo ken Satanas, sana kinawaran tapno saan a makaruk-at iti unos ti 1,000 a tawen.

³Intappuakna iti nakaun-uneg a yuyeng. Rinikpan ken tinimbreanna ti wangawangan tapno saan a makaruar ti dragon ken mangallilaw kadagiti pagilian. Inton aggibus ti 1,000 a tawen, masapul a mawayawayaan iti apagbiit a tiempo.

⁴Ketⓧ nakakitaak kadagiti trono. Naikkan dagiti nakatugaw sadiay iti pannakabalin a mangukom. Nakitak met dagiti kararua dagiti napapatay gapu iti panangpaneknekda ken ni Jesus ken iti panangipakaammoda iti sao ti Dios. Saanda a nagrukbab iti narungsot nga animal wenno iti ladawanna. Saanda a pinaikkan dagiti muging ken imada iti marka ti narungsot nga animal. Nagungarda ket nakipagturayda ken ni Cristo iti unos ti 1,000 a tawen.

⁵(Saan a nagungar dagiti dadduma agingga a di malpas ti 1,000 a tawen.) Daytoy ti umuna a pannakapagungar dagiti natay.

⁶Nagasat ken nasantoan dagiti mairaman iti umuna a pannakapagungar. Awan pannakabalin ti maikadua nga ipapatay kadakuada. Agbalindanto a papadi ti Dios ken ni Cristo, ket makipagturaydanto kenkuana iti 1,000 a tawen.

⁷Kalpasan ti 1,000 a tawen, mawayawayaanto ni Satanas iti nakaibaludanna.

⁸Rummuartoⓨ a mangallilaw kadagiti nasion iti entero a lubong, kayatna a sawen, da Gog ken Magog. Ummongento ida ni Satanas a kaduana a makigubat. Adunto ti armadada kas iti kaadu ti darat iti igid ti baybay.

⁹Nagwarasda iti sangalubongan ket linakubda ti kampo dagiti tattao ti Dios ken ti inay-ayatna a siudad. Ngem nagtudo iti apuy manipud langit a nangibus kadakuada.

¹⁰Kalpasanna, naitappuak iti dan-aw ti apuy ken asufre ti Diablo a nangallilaw kadakuada. Daytoy met la a dan-aw ti nakaitappuakan ti narungsot nga animal ken ti sinan-profeta. Matutuokdanto sadiay iti aldaw ken rabii, iti agnanayon nga awan inggana.

¹¹Kalpasanna,ⓩ nakitak ti maysa a dakkel a trono a puraw agraman ti nakatugaw. Nagpukaw ti langit ken daga iti sangoananna ket awanen pakakitaan kadakuada.

¹²Nakitak dagiti natay, natan-ok ken nanumo, nga agtatakder iti sangoanan ti trono. Naluktan dagiti libro ken ti sabali a libro, ti libro ti biag. Naukom dagiti natay segun ti inaramidda a kas naisurat kadagiti libro.

¹³Inyula ti taaw dagiti natay nga adda kenkuana. Inyula met ni Patay ken ti Hades dagiti natay nga adda kadakuada. Naukomda amin kas mayannurot iti inaramidda.

¹⁴Kalpasanna, naitappuak ni Patay ken ti Hades iti dan-aw ti apuy. (Daytoy a dan-aw ti apuy ti maikadua nga ipapatay.)

¹⁵Ditoy a dan-aw ti apuy ti nakaitappuakan dagiti awan naganna iti libro ti biag.