Paltiing 21:1-27 RIPV1996 - Bible AI

¹Kalpasanna,ⓐ nakitak ti baro a langit ken ti baro a daga. Awanen ti immuna a langit ken ti immuna a daga. Awan metten ti taaw.

²Ketⓑ nakitak ti Nasantoan a Siudad, ti baro a Jerusalem, a bumabbaba manipud langit nga aggapu iti Dios, a kas iti babai a nakawesan nga agkasar ken mangpadpadaan iti lalaki a mangikallaysa kenkuana.

³Nakangngegakⓒ iti napigsa a timek a naggapu iti trono. Kunana: “Agnaeden ti Dios iti sidong dagiti tattao! Makipagtaengto kadakuada ket isudanto ti ilina. Kaduadanto ti Dios, ket isunto ti Diosda.[18]

⁴Punasennantoⓓ dagiti luada. Awanton ti patay, ladingit, sangsangit wenno ut-ot agsipud ta limmabasen dagiti immun-una a banag.”

⁵Kinuna ti nakatugaw iti trono, “Pabaroekon ti amin a banag!” Kinunana pay kaniak, “Isuratmo daytoy: Mapangnamnamaan ken pudno dagitoy a sao.”

⁶Kinunanaⓔ pay, “Natungpalen! Siak ti Alfa ken ti Omega, ti pangrugian ken ti panungpalan. Siasinoman a mawaw, ikkakto iti kalintegan nga uminum iti ubbog ti danum ti biag.

⁷Daytoyⓕ ti gunggona ti agballigi: Siakto ti Diosna ket isunto ti anakko.

⁸Ngem nakabutbutengto ti pagbanagan dagiti takrot, dagiti traidor, dagiti naderrep, dagiti mammapatay, dagiti mannakikamalala, dagiti managanito, dagiti agrukbab kadagiti didiosen ken amin nga ulbod—agyandanto iti dan-aw ti gumilgil-ayab nga apuy ken asufre nga isu ti maikadua nga ipapatay.”

⁹Inasitgannak ti maysa kadagiti pito nga angheles nga addaan iti pito a malukong a napno kadagiti pito a maudi a didigra. “Umayka,” kinunana, “ket ipakitak kenka ti babai nga ikasar ti Kordero.”

¹⁰Addaakⓖ iti pannakabalin ti Espiritu ket impannak ti anghel iti rabaw ti nakangatngato a bantay. Impakitana kaniak ti Jerusalem, ti Nasantoan a Siudad a bumabbaba manipud langit nga aggapu iti Dios.

¹¹Agranraniag daytoy gapu iti dayag ti Dios. Agrimatrimat a kas iti alahas a haspe ken aganninaw a kas iti kristal.

¹²Napuskolⓗ ken nangato ti bakud ket adda sangapulo ket dua a ruanganna a nagsaggaysaan a bambantayan ti sangapulo ket dua nga angheles. Iti tunggal ruangan, adda nagan a naisurat. Dagitoy dagiti nagan dagiti sangapulo ket dua a tribu ti Israel.

¹³Tallo ti ruangan ti tunggal benneg ti bakud: tallo iti daya, tallo iti abagatan, tallo iti amianan ken tallo iti laud.

¹⁴Nabangon ti bakud ti siudad iti sangapulo ket dua a bato a nakaisuratan ti nagan dagiti sangapulo ket dua nga apostoles ti Kordero.

¹⁵Addaⓘ balitok a pagrukod ti anghel a nagsao kaniak. Rukodenna ti siudad, dagiti ruangan ken bakudna.

¹⁶Kuadrado ti siudad: 2,400 a kilometro ti kaatiddog; kasta met ti kaakaba ken kangatona.

¹⁷Rinukod ti anghel ti bakud ket 216 a kadapan ti kangatona kas mayannurot iti rukod nga ar-aramaten dagiti tattao.

¹⁸Haspeⓙ ti bakud, puro a balitok ti siudad, ket aganninaw a kas kristal.

¹⁹Namontaran dagiti fondasion a bato ti bakud kadagiti agkakapateg a bato. Haspe ti umuna; safiro ti maikadua; kalsedonia ti maikatlo; esmeralda ti maikapat;

²⁰sardonika ti maikalima; karnelia ti maikanem; krisolito ti maikapito; berilo ti maikawalo; topasio ti maikasiam; krisoprasio ti maikasangapulo; hasinto ti maikasangapulo ket maysa ken amatista ti maikasangapulo ket dua.

²¹Perlas dagiti sangapulo ket dua a ruangan; naaramid ti tunggal maysa iti sangkanayon a perlas. Paspasig a balitok dagiti kalsada ti siudad; aganninaw a kas kristal.

²²Nadlawko nga awan templo iti siudad agsipud ta ni Apo Dios a Mannakabalin-amin ken ti Kordero ti pannakatemplona.

²³Saanenⓚ a masapul ti init ken ti bulan a manglawag iti siudad agsipud ta ti dayag ti Dios ti mangranraniag ket ti Kordero ti pagsilawan.

²⁴Itiⓛ lawagna, magnanto dagiti amin a tattao ket ipanto sadiay dagiti ari ditoy daga ti kinadayagda.

²⁵Agmalmalemⓜ a silulukat dagiti ruangan ti siudad agsipud ta awanen ti rabii sadiay.

²⁶Maipanto iti siudad ti dayag ken dayaw dagiti nasion.

²⁷Ngemⓝ saanto a makastrek sadiay ti uray ania a saan a nadalus iti imatang ti Dios, ti siasinoman nga agar-aramid iti nakababain ken dagiti naulbod. Dagitinto laeng naisurat ti naganna iti libro ti biag nga adda iti ikut ti Kordero ti makastrek iti siudad.