Paltiing 3:1-22 RIPV1996 - Bible AI

¹Ket kinunana kaniak, “Kastoy ti isuratmo iti anghel ti iglesia idiay Sardis: “Daytoy ti mensahe nga aggapu iti addaan kadagiti pito nga espiritu ti Dios ken kadagiti pito a bituen: Ammok dagiti aramidmo. Ammok nga agdindinamag a sibibiagka, ngem ti kinapudnona, nataykan!

²Isut' gapuna nga agriingka ket papigsaem ti adda pay kenka sakbay a matayka a mamimpinsan. Ta masarakak nga adda pay la pagkurangan dagiti inar-aramidmo iti imatang ti Diosko.

³Ngarud,ⓢ laglagipem dagiti nasursuro ken nangngegmo. Tungpalem ida ket agbabawika kadagiti basbasolmo. No dika agriing, umayakto kenka a kas iti mannanakaw—dimonto ammo no ania ti oras nga isasangpetko.

⁴“Ngem ti sumagmamano kadakayo dita Sardis, pinagtalinaedyo a nadalus ti pagan-anayyo. Makipagnakayto kaniak a sikakawes iti puraw ta maikarikayo.

⁵Kastoytoⓣ ti pannakakawes ti agballigi, ket diakto punasen ti naganna iti libro ti biag. Ipaduyakyakkonto ti naganna iti sangoanan ni Amak ken dagiti anghelesna nga isu ket kukuak.

⁶“No adda pannakaawatyo, denggenyo ngarud ti sao ti Espiritu kadagiti iglesia.”

⁷“Kastoyⓤ ti isuratmo iti anghel ti iglesia idiay Filadelfia: “Daytoy ti mensahe ti nasantoan ken napudno. Ig-iggamanna ti tulbek a kukua idi ni David. No adda ilukatna, awan ti makairikep, ket no adda rikpanna, awan ti makailukat. Kunana:

⁸Ammok dagiti aramidmo. Kitaem, nangikabilak iti sangom iti silulukat a ruangan nga awan ti makairikep. Ammok a bassit ti pannakabalinmo. Nupay kasta, tinungpalmo ti pannursurok ket nagtalinaedka a napudno kaniak.

⁹Denggem,ⓥ no maipanggep iti bunggoy nga agdaydayaw ken ni Satanas, dagita nga ulbod ken agpamarang a Judioda, ibaonko ida kenka tapno agrukbabda iti sakaanam ket maammoandanto amin nga ay-ayatenka.

¹⁰Agsipud ta tinungpalmo ti bilinko, nga anusam nga ibturan ti panagsagaba, aywanankanto met inton dumteng ti riribuk a pakasuotan ti amin a tao iti sangalubongan.

¹¹Umayak iti mabiit. Saluadam ngarud ti adda kenka tapno awan ti mangagaw iti gunggonam.

¹²“Tiⓦ agballigi, pagbalinekto a maysa kadagiti adigi iti templo ti Diosko, ket agyanto sadiay iti agnanayon. Ikitikitkonto kenkuana ti nagan ti Diosko ken ti nagan ti siudad ti Diosko, ti baro a Jerusalem a bumabanto manipud langit ken aggapu iti Diosko. Ikitikitkonto met kenkuana ti baro a naganko.

¹³“No adda pannakaawatyo, denggenyo ngarud ti sao ti Espiritu kadagiti iglesia.”

¹⁴“Kastoyⓧ ti isuratmo iti anghel ti iglesia idiay Laodicea: “Daytoy ti mensahe nga aggapu ken ni Amen, ti matalek ken napudno a saksi, ti pangrugian ti[10] amin a pinarsua ti Dios:

¹⁵Ammok ti ar-aramidem. Ammok a saanka a nalamiis wenno napudot. Tarigagayak unay a nalamiis wenno napudotka koma.

¹⁶Ngem agsipud ta saanka a napudot ket saanka met a nalamiis, ituprakanto!

¹⁷“Kunam a nabaknang ken narang-ayka ket adda amin a masapulmo. Ngem dimo ammo a daksanggasat ken kakaasika. Napanglawka. Lamolamoka. Bulsekka.

¹⁸Ngarud, ibalakadko kenka a gumatangka kaniak iti balitok a nagugoran iti apuy tapno bumaknangka. Gumatangka met iti puraw a pagan-anay a pagkawesmo tapno saan a makita ti nakababain a kinalamolamom. Gumatangka pay iti agas ta matam tapno makakitaka.

¹⁹Babalawekⓨ ken dusaek ti amin nga ay-ayatek. Agregtaka ngarud ket agbabawika kadagiti basbasolmo.

²⁰Denggem, addaak nga agtatakder iti ruar ket agtuktuktokak iti ruangan. No adda makangngeg iti timekko ket luktanna ti ruangan, sumrekakto iti balayna ket agkalanglangkamto a mangan.

²¹“Ti agballigi, ikkakto iti kalintegan nga agtugaw iti dennak iti tronok, kas kaniak a nagballigi, ket ita, agtugtugawak iti abay ni Amak iti tronona.

²²“No adda pannakaawatyo, denggenyo ngarud ti sao ti Espiritu kadagiti iglesia.”