Paltiing 4:1-11 RIPV1996 - Bible AI

¹Kalpasan daytoy, adda manen sabali a parmata a nasaksiak. Nakakitaak iti silulukat a ruangan sadi langit. Ket nangngegko manen ti timek a kasla uni ti trumpeta a kunana kaniak: “Umulika ditoy ket ipakitak kenka dagiti dumteng a mapasamak.”

²Pagammoan,ⓩ addaak iti pannakabalin ti Espiritu ket nakitak sadi langit ti maysa a trono. Adda nakatugaw iti trono.

³Rumimatrimat ti rupana a kas iti haspe ken karnelia. Iti lawlaw ti trono, adda bullalayaw a naraniag a kas iti esmeralda.

⁴Iti aglikmut ti trono, adda duapulo ket uppat a sabali a trono a pagtugtugawan ti duapulo ket uppat a panglakayen a nakakawes iti puraw ken nakakorona iti balitok.

⁵Manipudⓐ iti trono, agkimatkimat a kagiddan ti agkakapigsa nga uni ken gurruod. Iti sango ti trono, adda pito a pagsilawan a sumsumged; dagitoy dagiti pito nga espiritu ti Dios.

⁶Addaⓑ ⓒ pay iti sangoanan ti trono ti kasla baybay a sarming, nalitnaw a kasla kristal.

⁶Iti aglikmut ti trono, adda uppat a sibibiag a parsua a mata amin ti sango ken likudda.

⁷Kasla leon ti umuna a sibibiag a parsua; kasla toro a baka ti maikadua; karuprupa ti tao ti maikatlo; ket kasla tumaytayab nga agila ti maikapat.

⁸Innemⓓ ti payak ti tunggal maysa kadagiti sibibiag a parsua, ket mata amin iti uneg ken ruar ti payak. Aldaw-rabii nga awan sardengda a mangikankanta:

⁸“Santo, santo, santo, ni Apo Dios a Mannakabalin-amin, Isu nga adda idi, adda ita ken umayto.”

⁹Ikanta dagiti uppat a sibibiag a parsua dagiti kanta ti dayag, pagdayaw ken pagyaman iti situtugaw iti trono nga agbiag nga agnanayon nga awan inggana. Bayat ti panagkantada,

¹⁰agrukbab dagiti duapulo ket uppat a panglakayen iti sangoanan ti trono ket agdaydayawda iti situtugaw sadiay, isu nga agbiag iti agnanayon nga awan inggana. Ipurruakda ti koronada iti sangoanan ti trono sada kuna:

¹¹“Apo ken Diosmi! Maikarika nga umawat iti dayag, dayaw ken pannakabalin. Ta pinarsuam dagiti amin a bambanag, ket babaen iti pagayatam, naparsua ken naikkanda iti biag.”