Ruth 2:1-23 RIPV1996 - Bible AI

¹Adda idi kabagian ni Noemi iti partido daydi Elimelec nga asawana. Isu ni Boaz, maysa a baknang ken mararaem a tao.

²Itiⓐ maysa nga aldaw, kinuna ni Ruth ken ni Noemi, “Innak idiay taltalon ket agtudtodak kadagiti dawa a mabati dagiti agan-ani. Agyanak iti likudan ti siasinoman a mangipalubos nga agtudtodak iti dawa a mabati.”

²“Inka, a, anakko,” insungbat ni Noemi.

³Iti kasta, napan ni Ruth iti taltalon, ket nagtudtod kadagiti dawa a malabsan dagiti agan-ani. Nairana nga iti talon ni Boaz a kabagian ni Elimelec ti napananna.

⁴Iti saan a mabayag, simmangpet ni Boaz a naggapu idiay Betlehem. Kinablaawanna dagiti agan-ani, “Adda koma kadakayo ti APO.” “Kasta met koma kenka,” insungbatda.

⁵Idi makita ni Boaz ni Ruth, sinaludsodna iti pangulo dagiti agan-ani, “Siasino dayta a balasang?”

⁶“Isu ti ganggannaet a babai a kinakuyog ni Noemi a naggapu idiay Moab,” insungbat ti lalaki.

⁷“Impakpakaasina a palubosak a sumaruno kadagiti agan-ani tapno agtudtod kadagiti dawa. Manipud pay la itay bigat nga agtudtudtod, ket ita la nga aglinong tapno aginanat' biit.”

⁸Iti kasta, kinuna ni Boaz ken ni Ruth, “Denggem ti balakadko kenka. Dika mapmapan agtudtod iti sabali a talon. Ditoy laengen ti pagtudtodam iti dawa. Agyankan ditoy ket makipagtrabahoka kadagiti babbai.

⁹Siputam no sadino ti paganianda, ket sumurotka kadakuada. Binilinko dagiti tattaok a didaka an-anoen. No mawawka, inka latta uminum kadagiti karamba a sinakdoanda.”

¹⁰Nagrukob a nagdayaw ni Ruth sana kinuna ken ni Boaz, “Naimbagkayo unay kaniak idinto a maysaak laeng a ganggannaet.”

¹¹Simmungbat ni Boaz, “Nadamagko dagiti amin nga impaaymo ken ni Noemi a katugangam manipud natay ti asawam. Ammok a pinanawam dagiti nagannak kenka ken ti ilim tapno umayka makipagnaed kadagiti tattao a dimo am-ammo.

¹²Gunggonaannaka koma ti APO gapu iti inaramidmo. Wen, naan-anay koma ti gunggonam nga ited ti APO a Dios ti Israel, isu a nagkamangam!”

¹³Kinuna ni Ruth, “Naimbagkayo unay[3] kaniak, apo. Nakagin-awaak iti naanus a panagsaoyo kaniak, nupay no saanak a maipada iti maysa kadagiti adipenyo a babbai.”

¹⁴Iti tiempo ti pannangan, kinuna ni Boaz ken ni Ruth, “Umayka mangala iti tinapay ket isawsawmo iti arak.” Iti kasta, nakilanglang ni Ruth kadagiti agan-ani, ket inikkan ni Boaz iti pilipig. Nangan ni Ruth agingga a nabsog. Adda pay natedda iti taraon a naited kenkuana.

¹⁵Idi mapan manen agtudtod ni Ruth kadagiti nalabsan a dawa, binilin ni Boaz dagiti agan-ani, “Palubosanyo nga agtudtod uray iti asideg dagiti binettek. Diyo singsingaen.

¹⁶Aguyoskayo ketdi kadagiti dawa iti binettek ket iwarayo tapno adda tudtodenna. Diyo dildillawen.”

¹⁷Nagtudtod ni Ruth agingga iti sumipnget. Idi mairikna amin, aganay a maysa nga efa[4] ti sebada ti dagsenna.

¹⁸Inyawidna ti irik ket impakitana iti katuganganna ti naurnongna. Intedna pay ken ni Noemi ti natda iti taraon a naited kenkuana.

¹⁹Sinaludsod ni Noemi, “Sadino ti napanmo nagtudtodan ita nga aldaw? Akintalon ti napanmo nagtudtodan? Bendisionan koma ti Dios ti tao a nangngaasi kenka.”

¹⁹Imbaga ni Ruth ken ni Noemi a napan nagtudtod iti talon ti maysa a lalaki nga agnagan iti Boaz.

²⁰Kinunaⓑ ni Noemi kenkuana, “Bendisionan koma ti APO dayta a tao! Tungpalen ti APO dagiti karina kadagiti sibibiag man wenno natay.” Intuloyna, “Asideg a kabagiantayo dayta a tao, maysa kadagiti adda pagrebbenganna a mangaywan kadata.”

²¹Kalpasanna, kinuna ni Ruth, “Malaksid kadagiti impaayna kaniak, kinunana pay nga itultuloyko ti agtudtod agingga a malpas ti ani.”

²²“Wen, anakko,” insungbat ni Noemi, “nasaysayaat no makipaganika kadagiti babbai iti talon ni Boaz. Amangan no adda mangdangran kenka no mapanka iti talon ti sabali a tao.”

²³Iti kasta, nakiani ni Ruth kadakuada, ket nagtudtod kadagiti dawa agingga a naani amin a sebada ken trigo. Intuloyna ti nakipagnaed iti katuganganna.