San Juan 21:1-25 RIPV1996 - Bible AI

¹Kalpasan daytoy, nagparang manen a mismo ni Jesus kadagiti adalanna iti Dan-aw ti Tiberias. Kastoy ti pannakapasamakna:

²Adda sadiay da Simon Pedro, Tomas (a maaw-awagan iti “Singin”), Natanael (ti taga-Cana idiay Galilea), dagiti annak ni Zebedeo, agraman dua pay nga adalan ni Jesus.

³Kinunaⓓ ni Simon Pedro kadagiti kaduana, “Innak agkalap.” “Umaykam met,” kinunada kenkuana. Napanda ngarud ket limmuganda iti bangka. Ngem pulos nga awan ti naalada iti nagpatnag.

⁴Idi lumlumgaken ti init, nagtakder ni Jesus iti igid ti dan-aw, ngem saan a nailasin dagiti adalan.

⁵Kinuna ngarud ni Jesus kadakuada, “Gagayyem, adda kadi nakalapanyo?”

⁵“Awan a pulos,” insungbatda.

⁶Kinunanaⓔ kadakuada, “Iwayatyo ti iketyo iti makannawan ti bangka, ket adda maalayo.” Inwayatda ngarud ti iket, ket saandan a maisang-at gapu iti kaadu ti naalada nga ikan.

⁷Ti adalan a dinungdungngo ni Jesus kinunana ken ni Pedro, “Isu daytoy ti Apo!” Idi nangngeg ni Simon Pedro nga isu ti Apo, nagbado (ta nakauksob idi) ket timmappuak iti danum.

⁸Ngem nagbati dagiti dadduma nga adalan iti bilog a mangisangsang-at iti iket a napno iti ikan. Saanda unay nga adayo iti sang-at. Agsangagasut a metro laeng.

⁹Idi nakasang-atdan, nakitada sadiay ti dumardarang a beggang ken ti matuntuno nga ikan ken sumagmamano a tinapay.

¹⁰Kinuna ni Jesus kadakuada, “Mangyegkay iti ikan a kaal-alayo.”

¹¹Napan ni Simon Pedro iti bangka ket insang-atna ti iket a napno iti dadakkel nga ikan—153 ti dagupda amin. Nupay adu unay ti ikan, saan a nabsang ti iket.

¹²Kinuna ni Jesus kadakuada, “Umaykayo mamigaten.” Awan kadagiti adalan ti nakaitured a nagsaludsod kenkuana iti kinasiasinona. Ammoda nga isu ti Apo.

¹³Iti kasta, innala ni Jesus ket ti tinapay ken ti ikan sana inted kadagiti adalanna.

¹⁴Daytoy ti maikatlo a panagparang ni Jesus kadagiti adalanna kalpasan ti pannakapagungarna.

¹⁵Kalpasan ti panamigatda, kinuna ni Jesus ken ni Simon Pedro, “Simon nga anak ni Juan, ad-adda kadi ti panangdungngom kaniak ngem dagitoy?” “Wen, Apo,” insungbatna, “ammom nga ay-ayatenka.” Kinuna ni Jesus kenkuana, “Aywanam dagiti urbon a karnerok.”

¹⁶Pinidua ni Jesus a sinaludsod, “Simon nga anak ni Juan, dungdungngoennak kadi?” “Wen, Apo,” insungbatna, “ammom nga ay-ayatenka.” Kinuna ni Jesus kenkuana, “Aywanam dagiti karnerok.”

¹⁷Pinitlo ni Jesus a sinaludsod, “Simon nga anak ni Juan, ay-ayatennak kadi?” Kinuna ni Pedro, “Apo, ammom amin a banag. Ammom nga ay-ayatenka!” Kinuna ni Jesus kenkuana, “Aywanam dagiti karnerok.

¹⁷Nagliday ni Pedro gapu ta namitlon a sinaludsod ni Jesus kenkuana, “Ay-ayatennak kadi?”

¹⁸Ibagak ti pudno kenka: Idi kabambanuagam, sika ti mangbarbarikes iti bagim ket mapanka iti sadinoman a kayatmo a papanan. Ngem inton lumakaykan, sabalinto ti mangbarikes kenka sanaka ipan iti dimo kayat a papanan.”

¹⁹(Iti panangisao ni Jesus iti daytoy, impakaammona no kasano ti ipapatay ni Pedro tapno maidaydayaw ti Dios.)

¹⁹Kalpasanna, kinuna ni Jesus kenkuana, “Surotennak.”

²⁰Timmaliawⓕ ni Pedro. Nakitana a sumursurot ti adalan a dinungdungngo ni Jesus. Daytoy ti adalan a nagsadag ken ni Jesus iti daydi panangrabii tapno saludsodenna no siasinonto ti mangliput iti Apo.

²¹Idi makita ni Pedro ti adalan, kinunana ken ni Jesus, “Apo, anianto ngarud ti mapasamak iti daytoy a tao?”

²²“No kayatko nga agbiag agingga iti yaayko, apay a maseknanka?” insungbat ni Jesus. “Surotennak!”

²³Gapu itoy, nagdinamag kadagiti pasurot ni Jesus a dinto matay daytoy nga adalan. Ngem saan nga imbaga ni Jesus a dinto matay daytoy a tao, no di ket kinunana, “No kayatko nga agbiag agingga iti yaayko, apay a maseknanka?”

²⁴Daytoy ti adalan a nagsao maipapan kadagitoy a bambanag ken nangisurat pay kadagitoy. Ammomi a pudno ti pammaneknekna.

²⁵Wen, adu pay dagiti sabali nga inar-aramid ni Jesus. No maisuratda koma amin, pagarupek a di malaon ti lubong dagiti libro a pakaisuratanda.