San Juan 4:1-54 RIPV1996 - Bible AI

¹Nadamag dagiti Fariseo nga ad-adu ti adalan a mapaspasurot ken bumbuniagan ni Jesus ngem ni Juan.

²(Kinapudnona, saan a nangbumbuniag ni Jesus, no di ket dagiti adalanna laeng.)

³Ngarud, idi madamag ni Jesus ti maisasao, pimmanaw idiay Judea ket nagsubli idiay Galilea.

⁴Iti panagbiahena, masapul a lumasat idiay Samaria.

⁵Idiayⓜ Samaria, dimteng iti maysa nga ili a managan Sicar, a saan nga adayo iti talon nga inted idi ni Jacob ken ni Jose nga anakna.

⁶Adda sadiay ti bubon ni Jacob.

⁶Nagtugaw ni Jesus iti abay ti bubon gapu iti bannogna. Nganngani tengnga ti aldaw idi.

⁷Dimteng ti maysa a Samaritana tapno sumakdo, ket kinuna ni Jesus kenkuana, “Makiinumak man.” (

⁸Napan gimmatang idi dagiti adalanna iti kanenda idiay ili.)

⁹“Ania?”ⓝ kinuna ti babai. “Maysaka a Judio, ket makiinumka kaniak a Samaritana?” (Ta saan nga ugali dagiti Judio ti makilangenlangen kadagiti Samaritano.)

¹⁰“No ammom la koma ti sagut nga ited ti Dios ken no siasino ti dumawdawat kenka iti inumen, dumawatka koma kenkuana ket ikkannaka iti nabiag a danum,” insungbat ni Jesus.

¹¹“Apo,” kinuna ti babai, “nauneg ti bubon ket awan met ti pagsakdum. Pangalaam ngarud iti nabiag a danum?

¹²Inted kadakami ni Jacob a kapuonantayo daytoy a bubon. Nagin-inumanna daytoy a bubon agraman dagiti annak ken tarakenna. Dakdakkelka kadi ngem ni Jacob?”

¹³“Siasinoman nga uminum iti daytoy a danum, mawawto manen,” kinuna ni Jesus,

¹⁴“ngem ti uminum iti danum nga itedko, saanton a mawaw. Ta ti danum nga itedko agbalinto nga ubbog iti unegna a mangted kenkuana iti nabiag a danum ken biag nga agnanayon.”

¹⁵“Apo,” kinuna ti babai, “itedmo kaniak daytoy a danum tapno diakton mawaw wenno umay sumakdo ditoy.”

¹⁶“Inka ayaban ti asawam saka agsubli ditoy,” kinuna ni Jesus.

¹⁷“Awan asawak,” kinuna ti babai. “Agpayso ta kunam nga awan asawam,” kinuna ni Jesus.

¹⁸“Naminlimakan a nakiasawa, ket saanmo nga asawa ti lalaki a kabbalaymo ita. Pudno ti imbagam kaniak.”

¹⁹“Apo,” kinuna ti babai, “mabigbigko a profetaka.

²⁰Ditoy a bantay ti nagdaydayawan dagidi kapuonanmi iti Dios. Ngem dakayo a Judio kunayo nga idiay Jerusalem ti rumbeng a pagdaydayawan.”

²¹“Babai,” kinuna ni Jesus, “patiem ti kunak nga umayto ti tiempo a saan a ditoy a bantay wenno idiay Jerusalem ti pagdaydayawan iti Ama.

²²Dakayo a Samaritano, diyo ammo no siasino ti daydayawenyo. Dakami, ammomi ti daydayawenmi ta aggapu kadagiti Judio ti pannakaisalakan.

²³Ngem umasideg ti tiempo, ket dimtengen, a dagiti napaypayso nga agdaydayaw, daydayawendanto ti Ama iti espiritu ken kinapudno. Ta dagiti kakasta ti sapsapulen ti Ama nga agdayaw kenkuana.

²⁴Ti Dios ket Espiritu. Ngarud, dagiti agdaydayaw kenkuana masapul nga agdaydayawda iti Espiritu ken kinapudno.”

²⁵Kinuna kenkuana ti babai, “Ammok nga umayto ti Mesias a maawagan iti Cristo. Inton umay, ibagananto dagiti amin a bambanag.”

²⁶“Siak dayta,” insungbat ni Jesus. “Wen, siak a makisasao kenka.”

²⁷Iti dayta a kanito, simmangpet dagiti adalan ni Jesus. Kasta unay ti siddaawda ta nadanonda a makisasao ni Jesus iti babai. Ngem awan kadakuada ti nagdamag iti babai no ania ti masapulna. Saanda met a nagsaludsod ken ni Jesus no apay a makisasao kenkuana.

²⁸Pinanawan ti babai ti karambana ket nagsubli iti ili. “Umaykayo!” kinunana kadagiti tattao.

²⁹“Umayyo kitaen ti tao a nangibaga kaniak iti amin nga inar-aramidko. Saan ngata nga isu ti Cristo?”

³⁰Rimmuarda ngarud iti ili tapno mapanda iti ayan ni Jesus.

³¹Kabayatanna, inayaban dagiti adalan ni Jesus, “Maestro, umayka manganen!”

³²Ngem kinunana kadakuada, “Adda taraonko a diyo ammo.”

³³Iti kasta, nagsisinnaludsod dagiti adalan, “Adda aya nangyeg iti kanenna?”

³⁴“Ti taraonko isut' panangtungpalko iti pagayatan ti nangibaon kaniak ken ti panangileppasko iti paaramidna,” kinuna ni Jesus kadakuada.

³⁵Innayon ni Jesus: “Adda pagsasaoyo, ‘Uppat pay a bulan ket panaganin.’ Ngem ibagak kadakayo, kitaenyo a naimbag dagiti taltalon. Natangkenanen dagiti dawa ket mabalinen nga anien!

³⁶Matangdanan ti agani ket urnongenna ti apit para iti biag nga agnanayon. Iti kasta, agpadpada nga agragsak ti agmula ken ti agani.

³⁷Ta pudno ti pagsasao: ‘Maysa ti agmula, sabali ti agani.’

³⁸Imbaonkayo nga agani iti saanyo a nagbannogan. Sabali dagiti nagtrabaho, ket dakayo ti aglak-am iti nagbannoganda.”

³⁹Adu a Samaritano iti dayta nga ili ti namati ken ni Jesus gapu ta kinuna ti babai: “Imbagana kaniak ti amin nga inar-aramidko.”

⁴⁰Isut' gapuna nga idi napanda ken ni Jesus, indawatda a makipagyan kadakuada. Nagbati sadiay ni Jesus iti dua nga aldaw.

⁴¹Adu pay dagiti namati ken ni Jesus gapu iti insursurona.

⁴²Kinuna dagiti tattao iti babai, “Mamatikamin, saanen a gapu iti saom, ngem gapu ta dakami a mismo ti nakangngeg kenkuana, ket ammomi a pudno nga isu ti Mangisalakan iti lubong.”

⁴³Kalpasan ti dua nga aldaw a panagyan ni Jesus idiay Samaria, pimmanaw ket napan idiay Galilea.

⁴⁴Taⓞ ni met laeng Jesus ti nagkuna, “Saan a mapadayawan ti maysa a profeta iti mismo nga ilina.”

⁴⁵Idiⓟ makasangpet idiay Galilea, inawat dagiti umili, ta idi napanda dimmar-ay iti Fiesta ti Paskua idiay Jerusalem, nakitada amin nga inaramidna bayat ti Fiesta.

⁴⁶Kalpasanna,ⓠ nagsubli ni Jesus iti ili a Cana idiay Galilea, ti lugar a namagbalinanna iti danum nga arak. Adda idi sadiay ti maysa nga ofisial ti gobierno a masakit ti anakna a lalaki idiay Capernaum.

⁴⁷Nadamagna a simmangpet ni Jesus idiay Galilea a naggapu idiay Judea, ket napanna impakpakaasi kenkuana a mapan idiay Capernaum tapno paimbagenna ti anakna a nganngani matay.

⁴⁸Kinuna ni Jesus kenkuana, “No awan makitayo a milagro, saankayo a mamati.”

⁴⁹“Apo,” insungbat ti ofisial, “pangngaasim ta umayka amangan no matay ti anakko.”

⁵⁰“Inkan,” kinuna ni Jesus kenkuana. “Agbiag ti anakmo!” Namati ti ofisial iti sao ni Jesus ket nagawiden.

⁵¹Adda pay laeng ti ofisial iti dalan idi insabat dagiti babaonenna ti damag nga immimbagen ti anakna.

⁵²Dinamagna no kaano a naimbagen ti ubing.

⁵²“Idi kalman!” kinunada. “Ala una iti malem idi agbaaw ti gurigorna.”

⁵³Nalagip ti ama a dayta met laeng nga oras ti panangibaga ni Jesus kenkuana: “Agbiag ti anakmo.” Iti kasta, namati agraman ti familiana.

⁵⁴Daytoy ti maikadua a milagro nga inaramid ni Jesus kalpasan ti isasangpetna idiay Galilea manipud Judea.