San Lucas 11:1-54 RIPV1996 - Bible AI

¹Iti maysa nga aldaw, agkarkararag ni Jesus iti maysa a lugar. Idi malpasen, kinuna ti maysa kadagiti adalanna, “Apo, isuronakami man nga agkararag, kas iti panangisuro ni Juan kadagiti adalanna.”

²Kinuna ni Jesus kadakuada, “No agkararagkayo, kastoy ti kunayo: ‘Amami,[31] Madaydayaw koma ti nasantoan a naganmo; Umay koma ti Pagariam.

³Itedmo kadakami ti taraon a masapulmi iti inaldaw.[32]

⁴Pakawanennakami kadagiti basbasolmi, Ta pakawanenmi met dagiti amin a nakabasol kadakami. Dinakam iturong iti nakaro a pakasuotan.’”

⁵Kinuna pay ni Jesus kadagiti adalanna: “Kas pangarigan, iti tengnga ti rabii, mapan ti maysa kadakayo iti balay ti maysa a gayyemna ket kunana, ‘Gayyem, pabulodannak man iti tallo a tinapay.

⁶Dimmagas ngamin ti maysa a gayyemko iti panagbiahena ket awan a pulos ti ipakanko kenkuana.’

⁷“Kas pangarigan ta isungbat ti adda iti balay, ‘Dinak ringringgoren! Nairikepen ti ridaw ket nakaiddakamin kadagiti annakko. Diak mabalinen ti bumangon a mangted kenka iti uray ania.’

⁸“Ibagak kadakayo, numan pay aggayyemkayo, saanto a bumangon a mangted kenka iti tinapay. Ngem gapu ta dimo isardeng ti agdawat, bumangonto a mangted kenka iti amin a masapulmo.

⁹“Ibagak ngarud kadakayo: Agdawatkayo ket maikkankayto. Agsapulkayo ket makabirokkayto. Agtugtogkayo ket mailukatto kadakayo ti ruangan.

¹⁰Ta ti amin nga agdawat, maikkan. Ti agsapul, makabirok. Ti agtugtog, mailukatto kenkuana ti ruangan.

¹¹“Siasino kadakayo nga amma ti mangted iti uleg iti anakna no dumawat iti ikan?

¹²Wenno ikkanna aya iti manggagama no dumawat iti itlog?

¹³No dakayo, idinto a dakeskayo, ammoyo ti mangted iti naimbag kadagiti annakyo, dinto ket ad-addan ti pannangted ti Ama sadi langit iti Espiritu Santo kadagiti agdawat kenkuana!”

¹⁴[33] Pakpaksiaten idi ni Jesus ti maysa nga umel a demonio manipud iti maysa a lalaki. Idi napaksiaten ti demonio, makasaon daydi tao. Nasdaaw dagiti tattao,

¹⁵ngemⓟ kinuna ti dadduma kadakuada, “Ni Beelzebub a pangulo dagiti demonio ti mangmangted kenkuana iti pannakabalin a mamaksiat kadagiti demonio.”

¹⁶Kayatⓠ met dagiti dadduma a suoten ni Jesus. Dinawatda ngarud kenkuana a mangiparang iti milagro a pakakitaan iti yaanamong ti Dios kenkuana.

¹⁷Ngem ammo ni Jesus ti pampanunotenda ket kinunana kadakuada, “Saan nga agbayag ti pagarian a nabingaybingay ken agbibinnusor dagiti tattaona. Kasta met a mawarawara ti familia no agbibinnusor dagiti kamkamengna.

¹⁸Ngarud, no agbibinnusor dagiti pasurot ni Satanas, kasano ti panagpaut ti pagarianna? Kunayo a paksiatek dagiti demonio babaen iti tulong ni Beelzebub a mangted kaniak iti pannakabalin nga agaramid iti kasta.

¹⁹No kasta ti panangpaksiatko kadagiti demonio, kasano met ti panangpaksiat kadakuada dagiti pasurotyo? Isuda met laeng ti mangpaneknek nga agbiddutkayo!

²⁰Ngem siak, paksiatek dagiti demonio babaen iti pannakabalin ti Dios. Daytoy ti mangipaneknek a dimtengen kadakayo ti Pagarian ti Dios.

²¹“No bantayan ti napigsa a lalaki ti balayna ket sisasagana ti amin nga armasna, saan a maan-ano dagiti sanikuana.

²²Ngem no rauten ken parmeken ti napigpigsa a lalaki, agawenna amin ti armas a nagtaltalkan ti akimbalay. Kalpasanna, bingbingayenna dagiti tinakawna.

²³“Tiⓡ saan a makikadua kaniak, busorennak. Ti saan a tumulong kaniak nga agurnong, agiwara.”

²⁴“No rummuar ti dakes nga espiritu iti maysa a tao, mapan agsursor kadagiti luglugar a namaga nga agsapul iti paginanaanna. No awan masapulanna, kunana iti nakemna, ‘Agsubliak iti balayko.’

²⁵Agsubli ngarud ket masarakanna ti balay a nadalus ken naurnos.

²⁶Rummuar ket mangisangpet iti pito nga espiritu a dakdakes pay ngem isu. Kaduana ida nga agnaed sadiay. Iti kasta, dakdakes ti maud-udi a kasasaad dayta a tao ngem ti immuna.”

²⁷Idi nasaon ni Jesus daytoy, nagpukkaw ti maysa a babai a naitallaong sadiay. “Naggasat ketdin ti ina a nangipasngay ken nangtagibi kenka!” kinunana.

²⁸“Wen, ngem nagasgasat pay dagiti dumngeg ken mangtungpal iti sao ti Dios!” insungbat ni Jesus.

²⁹Idiⓢ umad-adu dagiti tattao a nangaribungbong ken ni Jesus, intuloyna ti nagsao: “Nagdakesen aya dagiti tattao kadagitoy nga aldaw! Agdawatda iti milagro ngem awanto ti maited kadakuada malaksid ti milagro ni Jonas.

³⁰Kasⓣ iti panagbalin ni profeta Jonas a pagilasinan dagiti taga-Nineve, kasta met nga agbalinto ti Anak ti Tao a pagilasinan dagiti tattao kadagitoy a panawen.

³¹“Intonⓤ Aldaw ti Panangukom, tumakderto ti Reyna iti Abagatan a mangidarum kadagiti tattao iti daytoy a kaputotan agsipud ta nagdaliasat manipud iti pagilianna tapno umayna denggen ti nainsiriban a pannursuro ni Solomon. Ibagak kadakayo, adda ditoy ti maysa a natantan-ok ngem ni Solomon.

³²Intonⓥ Aldaw ti Panangukom, tumakderto dagiti taga-Nineve a mangidarum kadakayo, ta nagbabawida kadagiti basbasolda idi nangngegda ti panangaskasaba ni Jonas. Adda ditoy, ibagak kadakayo, ti maysa a natantan-ok ngem ni Jonas!”

³³“Awanⓦ manggangat iti pagsilawan sana ilinged wenno kaluban. Iparabawna ketdi iti nairanta a pagsaadanna tapno makita dagiti tattao ti lawagna apaman a sumrekda iti balay.

³⁴“Dagiti matam ti pannakasilaw ti bagim. No nasalun-at dagiti matam, nalawag ti entero a bagim. Ngem no saan a nasalun-at dagiti matam, nasipnget ti entero a bagim.

³⁵Agannadka ngarud tapno ti silaw nga adda kenka saan a kinasipnget.

³⁶Isut' gapuna a no nalawag ti entero a bagim, ket awan ti pasetna a nasipnget, pasigto a nalawag a kasla silsilnagannaka ti maysa a naraniag a silaw.”

³⁷Kalpasan ti panagsao ni Jesus, inawis ti maysa a Fariseo a makipangan kenkuana. Napan ni Jesus ket simmango iti panganan.

³⁸Nasdaaw ti Fariseo idi makitana a saan a nagbuggo ni Jesus sakbay ti pannanganna.

³⁹Ngem kinuna ti Apo kenkuana, “Dakayo a Fariseo, dalusanyo ti ruar ti tasa ken pinggan, ngem napno ti unegyo iti ranggas ken kinadakes.

⁴⁰Maagkayo! Ti Dios a nangaramid iti akinruar, saanna aya nga inaramid met ti akin-uneg?

⁴¹Itedyo ketdi kadagiti napanglaw ti nagyan kadagiti tasa ken pingganyo, ket nadalusto aminen a banag kadakayo iti imatang ti linteg.

⁴²“Asikayoⓧ pay a Fariseo! Agpayso nga itedyo iti Dios ti apagkapullo ti apityo a menta, ruda[34] ken dadduma pay a natnateng. Ngem diyo met ikaskaso ti kinalinteg ken panagayat iti Dios. Dagitoy ti rebbengyo a tungpalen ket diyo liwayan dagiti dadduma.

⁴³“Asikayo pay a Fariseo! Pagay-ayatyo dagiti kangrunaan a pagtugawan kadagiti sinagoga ken makablaawan iti publiko.

⁴⁴Asikayo pay! Mayarigkayo kadagiti tantanem nga awan markana a badbaddeken dagiti tattao ta dida ammo a tanem.”

⁴⁵“Maestro,” kinuna kenkuana ti maysa a maestro iti Linteg, “insulto met kadakami ti kasta a panagsaom!”

⁴⁶“Asikayo pay a mamaestro iti Linteg!” insungbat ni Jesus. “Ipabaklayyo kadagiti tattao dagiti nadagsen nga awit, ngem dikay met aggunay a tumulong kadakuada.

⁴⁷Asikayo pay! Ta yaramidanyo kadagiti napipintas a tantanem dagiti profeta a pinapatay dagidi ammayo.

⁴⁸Kinaagpaysona, ipakitayo nga anamonganyo ti inaramid dagidi kapuonanyo: pinapatayda dagiti profeta sayo yaramidan ida iti tanemda.

⁴⁹“Daytoy ti gapuna a kinuna ti Sirib ti Dios,[35] ‘Mangibaonakto kadakuada kadagiti profeta ken apostoles. Patayendanto ti sumagmamano kadakuada, ket idadanesdanto dagiti dadduma.’

⁵⁰“Iti kasta, madusanto dagiti tattao iti daytoy a kaputotan gapu iti pannakapapatay dagiti amin a profeta, manipud pannakaparsua ti lubong.

⁵¹Nangrugiⓨ iti pannakapapatay ni Abel agingga iti pannakapapatay ni Zacarias iti nagbaetan ti altar ken ti Nasantoan a Disso. Wen, ibagak kadakayo, madusanto dagiti tattao iti daytoy a kaputotan gapu amin kadagitoy a pammapatay.

⁵²“Asikayo pay a mamaestro iti Linteg! Inlemmengyo ti tulbek a manglukat iti ruangan ti balay ti sirib. Madikayo a sumrek ket paritanyo pay dagiti agpanggep a sumrek!”

⁵³Bayat ti ipapanaw ni Jesus iti balay, napalalo ti panangbabalaw kenkuana dagiti Fariseo ken mamaestro iti Linteg. Adu ti sinaludsodda kenkuana ta

⁵⁴kayatda la nga adda maisaona a pangtiliwanda kenkuana.