San Lucas 14:1-35 RIPV1996 - Bible AI

¹Iti maysa nga Aldaw a Panaginana, napan nangan ni Jesus iti balay ti maysa kadagiti pangulo a Fariseo, ket sinisiim dagiti tattao.

²Adda lalaki nga imbal dagiti saka ken takkiagna a napan ken ni Jesus.

³Sinaludsod ni Jesus kadagiti mamaestro iti Linteg ken kadagiti Fariseo, “Ipalubos kadi ti Linteg ti panangpaimbag iti masakit iti Aldaw a Panaginana?”

⁴Ngem nagulimekda. Innala ni Jesus ti tao ket pinaimbagna sana pinagawid.

⁵Kalpasanna,ⓠ kinunana kadakuada, “No ti maysa kadakayo adda anakna wenno bakana a matnag iti bubon iti Aldaw a Panaginana, dina kadi dagusen nga aonen uray no Aldaw a Panaginana?”

⁶Awan naisungbatda kenkuana maipapan iti daytoy.

⁷Napaliiw ni Jesus a pilien dagiti sangaili dagiti kasayaatan a pagtugawan. Isut' gapuna a sinaritana amin kadakuada daytoy a pangngarig:

⁸“Noⓡ adda mangawis kenka iti paboda, dimo pilien ti kasayaatan a pagtugawan, amangan no adda naawis a natantan-ok ngem sika.

⁹Umayto kenka ti nangawis kadakayo a dua ket kunana, ‘Pangngaasim ta itedmo dayta a tugaw kenkuana.’ Mabainankanto ket kapilitan nga agtugawka iti kanumoan a pagyanan.

¹⁰“Ngem no maawiska, inka ketdi agtugaw iti kanumoan a lugar tapno umayto kenka ti nangawis ket kunana, ‘Gayyem, umayka idiay nasaysayaat a pagtugawan.’ Iti kasta, maidaydayawkanto iti imatang dagiti sangaili.

¹¹Taⓢ maipababanto ti amin a mangitan-ok iti bagina, ket maitan-okto ti amin nga agpakumbaba.”

¹²Kinuna met ni Jesus iti nangawis kenkuana, “No yawismo ti maysa a pangaldaw wenno pangrabii, dimo awisen dagiti gagayyemmo wenno dagiti kakabsat, kakabagian wenno babaknang a kaarrubam. Ta awisendakanto met, ket iti kasta, supapakandakanto iti impaaymo kadakuada.

¹³No agpadayaka, imbitaram dagiti napanglaw, dagiti lugpi, dagiti pilay ken dagiti bulsek.

¹⁴Nagasatkanto, ta didaka masupapakan. Ngem gunggonaannakanto ti Dios inton agungar dagiti nalinteg a tattao.”

¹⁵Nangngeg ti maysa kadagiti nakisango ken ni Jesus iti panganan daytoy a pangngarig. Kinunana ken ni Jesus, “Anian a ragsak dagiti sumangonto iti panganan iti Pagarian ti Dios!”

¹⁶Kinuna ni Jesus kenkuana, “Adda idi maysa a tao a nangisagana iti dakkel a padaya ket adu ti inawisna.

¹⁷Idi dimtengen ti oras ti padaya, binaonna ti adipenna a mangibaga kadagiti naawis, ‘Umaykayon, ta naisagana aminen.’

¹⁸“Ngem nagpambarda amin. Kinuna ti maysa iti adipen, ‘Gimmatangak iti talon ket masapul nga innak kitaen. Dispensarennak laengen.’

¹⁹Kinuna met ti sabali, ‘Gimmatangak iti lima nga agkasangol a baka ket innak ipadas ida. Dispensarennak laengen.’

²⁰Kinuna met ti sabali, ‘Kakaskasarko, isut' gapuna a diak makaumay.’

²¹“Nagawid ti adipen ket imbagana amin daytoy iti apona. “Nakapungtot ti apo. Binilinna ti adipenna, ‘Darasem ti mapan kadagiti kalkalsada ken daldalan iti ili, ket yegmo ditoy dagiti napanglaw, dagiti lugpi, dagiti bulsek ken dagiti pilay.’

²²“Iti saan a nabayag, kinuna ti adipen, ‘Apo, natungpal ti bilinmo ngem adu pay laeng ti pagyanan.’

²³“Iti kasta, kinuna manen ti apo iti adipen, ‘Inka kadagiti daldalan ken bitbit-ang, ket pilitem dagiti tattao nga umay tapno mapno ti balayko.

²⁴Ta ibagak kadakay amin nga awanto kadagiti inawisko ti makaraman iti saganak.’”

²⁵Iti naminsan, nakaad-adu a tattao ti sumursurot ken ni Jesus. Simmango ni Jesus kadakuada ket kinunana,

²⁶“Saanⓣ a makapagbalin nga adalak ti siasinoman nga umay kaniak malaksid no dakdakkel ti panagayatna kaniak ngem ti panagayatna kadagiti nagannak kenkuana, ti asawana ken dagiti annakna, dagiti kakabsatna ken uray ti bagina met laeng.

²⁷Saanⓤ met a makapagbalin nga adalak ti siasinoman a di mangbaklay iti krusna ken sumurot kaniak.

²⁸“No maysa kadakayo ti agpanggep a mangbangon iti torre, saan aya nga agtugaw nga umuna tapno panunotenna ti magastonanto, no adda makaanay a kuartana a pangleppasna?

²⁹No saan, dinanto maituloy ti torre kalpasan ti panangikabilna iti fondasion. Ang-angawento dagiti amin a makakita iti inrugina ket kunadanto,

³⁰‘Inrugina a binangon ti torre, ngem dina met maituloy!’

³¹“No rummuar ti maysa nga ari nga addaan 10,000 a soldado ket mapanna sarangten ti sabali nga ari nga addaan 20,000 a soldado, agtugaw pay a mangpanunot no kabaelanna a sangoen ti karangetna nga ari.

³²No saan, mangibaon iti sumabat iti dayta nga ari no adayo pay laeng tapno dawatenna ti panagkappiada.”

³³Kamaudiananna, kinuna ni Jesus, “Kasta met nga awan kadakayo ti makapagbalin nga adalak no dina panawan amin nga adda kenkuana.”

³⁴“Nasayaat ti asin. Ngem no timmamnayen, saanen a mapaapgad.

³⁵Awanen ti maiserbina iti daga wenno iti pagibuntonan iti rugit ti animal ket iti kasta maibelleng.

³⁵“Dumngegkayo ngarud, no adda pannakaawatyo!”