San Lucas 16:1-31 RIPV1996 - Bible AI

¹Kinuna ni Jesus kadagiti adalanna, “Adda idi maysa a baknang nga adda pagay-aywanenna kadagiti sanikuana. Naipulong kenkuana a busbusbosen ti agaywan ti kuarta ti amongna.

²“Iti kasta, pinaayaban ti amongna ket kinunana kenkuana, ‘Ania daytoy madamdamagko maipapan kenka? Itedmo kaniak ti amin a listaan ti panagaywanmo kadagiti sanikuak, ta ikkatenkan nga agaywan.’

³“Kinuna ti tao iti bagina, ‘Ikkatennakon ni amongko iti trabahok. Anianto ti aramidek? Diak kabaelan ti agkali ket mabainak met a makipalpalama.

⁴A, ammokon ti aramidek tapno inton maikkatak iti saadko, addanto gagayyemko a mangpasangbay kaniak kadagiti balbalayda.’

⁵“Inayabanna ngarud dagiti amin a nakautang iti amongna. Kinunana iti umuna, ‘Mano ti utangmo iti amongko?’

⁶‘Sangagasut a burnay a lana,’ insungbatna. ‘Adtoy ti resibom,’ kinuna ti agay-aywan. ‘Agtugawka ket isuratmo ti limapulo.’

⁷Iti sabali kinunana, ‘Ket sika, mano met ti utangmo?’ ‘Sangaribu a salup a trigo,’ insungbatna. ‘Adtoy ti resibom,’ kinuna ti agay-aywan. ‘Isuratmo ti walogasut.’

⁸“Nagbanaganna, dinaydayaw ti among ti ulbod a pagay-aywanenna gapu iti kinasikap nga inaramidna. Nasiksikap ngamin dagiti tattao ditoy lubong iti maipapan kadagiti ar-aramidda ngem dagiti tattao iti lawag.”

⁹Kinuna pay ni Jesus, “Ibagak ngarud kadakayo, pakigayyemyo dagiti naindagaan a sanikuayo tapno inton maibusankayo, maawatkayto iti agnanayon a pagtaengan.

¹⁰Ti tao a mapagtalkan kadagiti babassit a banag, mapagtalkanto met kadagiti dadakkel. Ngem ti saan a matalek kadagiti babassit a banag, saan met a mapagtalkan kadagiti dadakkel.

¹¹Ngarud, no saankayo a matalek nga agaywan kadagiti naindagaan a gameng, kasano a mapagtalkankayo kadagiti napaypayso a gameng?

¹²No saankayo a mapagtalkan kadagiti saanyo a kukua, siasinonto ti mangted kadakayo iti kukuayo?

¹³“Awanⓦ ti adipen a makapagserbi iti dua nga among. Ta guraennanto ti maysa ket ayatennanto ti sabali, wenno agserbinto a sipapasnek iti maysa ket umsiennanto ti sabali. Diyo mapaggiddan a pagserbian ti Dios ken ti sanikua.”

¹⁴Nangngeg dagiti Fariseo amin dagitoy, ket inuyawda ni Jesus agsipud ta naagumda iti kuarta.

¹⁵Kinuna ni Jesus kadakuada, “Agparangkayo a kasla nalinteg iti imatang dagiti tattao. Ngem ammo ti Dios ti naguneg iti pusoyo. Ta dagiti ibilang ti tao a kas napateg awan kaes-eskanna iti imatang ti Dios.

¹⁶“Naannurotⓧ ti Linteg ni Moises ken dagiti sursurat dagiti profeta agingga iti tiempo ni Juan a Mammuniag.[42] Manipud idin, naikaskasaba ti Naimbag a Damag maipapan iti Pagarian ti Dios, ket ipapilit ti tunggal maysa ti iseserrekna.

¹⁷Nalaklakaⓨ ti pannakapukaw ti langit ken daga ngem ti pannakaikkat ti uray kabassitan laeng a paset ti Linteg.

¹⁸“Makabasolⓩ iti pannakikamalala ti lalaki a mangisina iti asawana sa mangasawa iti sabali a babai. Ket ti lalaki a mangasawa iti naisina a babai, makabasol met iti pannakikamalala.”

¹⁹“Adda idi maysa a baknang a kanayon a sikakawes kadagiti agkakangina a lupot. Inaldaw met nga agbibiag a sibubuslon.

²⁰“Adda met maysa a napanglaw nga agnagan Lazaro. Nalapunos iti gaddil. Inaldaw a maipan iti ruangan ti balay ti baknang.

²¹Tartarigagayanna ngamin a pedpeden ti bisinna kadagiti maregreg iti sirok ti lamisaan ti baknang. Pasaray mapan dildilan dagiti aso ti gaddilna.

²²“Natay ti napanglaw ket impan dagiti angheles iti ayan ni Abraham. Natay met ti baknang ket naitanem.

²³Idi agsagaba iti napalalo idiay Hades,[43] timmangad ket nakitana ni Abraham nga adda iti adayo agraman ni Lazaro iti abayna.

²⁴Iti kasta, impukkawna, ‘Ama Abraham! Kaasiannak kadi ta ibaonmo ni Lazaro a mangbabasa iti ramayna ket palamiisanna toy dilak, ta kasta unay ti pannakatutuokko iti daytoy nga apuy!’

²⁵“Ngem kinuna ni Abraham, ‘Anakko, laglagipem a kabayatan ti panagbiagmo, naited kenka ti amin nga agkakaimbag a banag idinto a naglak-am ni Lazaro iti rigat. Itan, adda ditoy a maliwliwa ket addaka dita a matutuok.

²⁶Saan la a dayta! Adda dakkel a yuyeng iti nagbaetantayo tapno saan a makaballasiw dagiti mayat nga umay dita manipud ditoy wenno dagiti aggapu dita nga umay ditoy.’

²⁷“‘Dawatek ngarud kenka, ama Abraham,’ kinuna ti baknang, ‘nga ibaonmo ni Lazaro iti balay ni amak

²⁸tapno bagbagaanna dagiti lima a kakabsatko a lallaki sadiay, amangan no umayda met ditoy yan ti tuok.’

²⁹“Ngem kinuna ni Abraham, ‘Adda ni Moises ken dagiti profeta a mamagbaga kadakuada. Masapul a dumngeg dagiti kakabsatmo iti saoda.’

³⁰“‘Saan nga umanay dayta, ama Abraham,’ insungbat ti baknang. ‘Ngem no agungar ti maysa kadagiti natay ket mapan kadakuada, agbabawidanto kadagiti basbasolda.’

³¹“Ngem kinuna ni Abraham, ‘No dida denggen ni Moises ken dagiti profeta, didanto met la mamati, uray pay no adda agungar kadagiti natay.’”