San Lucas 17:1-37 RIPV1996 - Bible AI

¹Kinuna ni Jesus kadagiti adalanna, “Saan a pagduaduaan ti kaadda dagiti pakaigapuan ti panagbasol dagiti tattao. Ngem asi pay ti tao a pakaigapuan ti basol!

²Nasaysayaat koma no maigalut ti gilingan a bato iti tengngedna sa maitappuak iti taaw, ngem ti panangisungsongna nga agbasol ti maysa kadagitoy nga ubbing.

³Agannadkayoⓐ ngarud iti aramidyo!

³“Babalawem ti kabsatmo no makabasol. Pakawanem no agbabawi.

⁴No mamimpito nga agbasol kenka iti maysa nga aldaw, ket tunggal makabasol agpakawan kenka, rebbengmo a pakawanen.”

⁵Kinuna dagiti apostoles iti Apo, “Pabilgem ti pammatimi.”

⁶“No adda pammatiyo a kas iti kadakkel ti bukel ti mostasa,”[44] insungbat ti Apo, “mabalinyo a kuna iti daytoy a kayo ti sikamoro, ‘Bag-utem ti bagim ket imulam iti taaw,’ ket agtulnog kadakayo.”

⁷“Kas pangarigan, maysa kadakayo ti adda adipenna nga agar-arado wenno agay-aywan kadagiti karnero, ket sumangpet nga aggapu iti talon, kunam kadi kenkuana, ‘Darasem ta umayka manganen?’

⁸Saan! Kunam ketdi kenkuana, ‘Isaganam ti pangrabiik sakanto agsukat nga agserbi kaniak bayat ti pannanganko. Kalpasanna, mabalinmonton ti mangan.’

⁹“Masapul aya nga agyamanka iti adipen gapu iti panangtungpalna iti naibilin? Saan!

¹⁰Kasta met kadakayo: No naaramidyon amin a naibilin kadakayo, kunayo, ‘Adipenkami laeng. Inaramidmi laeng ti pagrebbenganmi.’”

¹¹Bayat ti panagturong ni Jesus idiay Jerusalem, nagna iti nagbeddengan ti Samaria ken Galilea.

¹²Idi sumungsungad iti maysa a barrio, sinabat ti sangapulo a lallaki nga agkukutel. Nagtakderda iti adayo bassit

¹³ket impukkawda, “Jesus, Maestro, kaasiannakami!”

¹⁴Nakitaⓑ ida ni Jesus ket kinunana, “Inkay agpakita kadagiti papadi.” Idi addada iti dalan, naimbagandan.

¹⁵Apaman a nadlaw ti maysa kadakuada a naimbaganen, nagsubli a nangidaydayaw iti Dios iti napigsa a timek.

¹⁶Nagparintumeng iti sangoanan ni Jesus ket nagyaman kenkuana. Samaritano daytoy a lalaki.

¹⁷“Saan aya a sangapulo dagiti napaimbag?” kinuna ni Jesus. “Sadino ti ayan dagiti siam?

¹⁸Apay a daytoy laeng ganggannaet ti nagsubli nga agyaman iti Dios?”

¹⁹Kinuna ni Jesus kenkuana, “Tumakderka ket agawidkan. Pinaimbagnaka ta pammatim.”

²⁰Sumagmamano a Fariseo ti nangsaludsod ken ni Jesus no kaanonto ti yaay ti Pagarian ti Dios. Insungbat ni Jesus, “Saan nga umay ti Pagarian ti Dios babaen kadagiti makita a pagilasinan.

²¹Awanto ti agkuna, ‘Kitaenyo, adda ditoy!’ wenno ‘Adda sadiay!’ Ta adda kadakayo ti Pagarian ti Dios.”

²²Kalpasanna, kinuna ni Jesus kadagiti adalan, “Dumtengto ti tiempo a tarigagayanyo a makita ti uray maysa laeng kadagiti aldaw ti Anak ti Tao, ngem diyonto makita.

²³“Addanto dagiti agkuna kadakayo, ‘Kumitakayo sadiay!’ wenno ‘Kumitakayo ditoy!’ Ngem diyo mapan birbiroken.

²⁴Kas iti panaggilap ti kimat ket lawaganna ti tangatang manipud iti maysa a bangir agingga iti sabali, kastanto met ti Anak ti Tao inton aldawna.

²⁵Ngem masapul nga agsagaba nga umuna iti adu ken laksiden dagiti tattao iti daytoy a kaputotan.

²⁷Nangnangan,ⓓ nagiinum ken nagaassawada agingga iti aldaw nga iseserrek ni Noe iti daong. Dimteng ti Layus ket nalmesda amin.

²⁸Maaramidtoⓔ met ti kas iti naaramid kadagidi aldaw ni Lot. Nangnangan ken nagiinumda. Naggatgatang ken naglaklakoda. Nagmulmula ken nagbalbalayda.

²⁹Idi aldaw nga ipapanaw ni Lot idiay Sodoma, nagtudo iti apuy ken asufre manipud langit a nangpatay kadakuada amin.

³⁰Kastanto ti mapasamak inton aldaw a pannakaiparangarang ti Anak ti Tao.

³¹“Itiⓕ dayta nga aldaw, ti adda iti tuktok ti balayna saanton a bumaba a sumrek iti balay a mangala kadagiti sanikuana. Kasta met a ti adda iti away dinto agsublin iti balayna.

³²“Laglagipenyoⓖ daydi asawa ni Lot!

³³“Tiⓗ siasinoman nga agpanggep a mangisalakan iti biagna, mapukawnanto. Ti siasinoman a makapukaw iti biagna, mataginayonnanto.

³⁴“Ibagak kadakayo nga iti dayta a rabii, addanto dua a lallaki nga agid-idda iti maymaysa a katre. Maalanto ti maysa ket mabatinto ti sabali.

³⁵Addanto met dua a babbai nga aggilgiling iti maymaysa a paggilingan. Maalanto ti maysa ket mabatinto ti sabali.”[45]

³⁷Sinaludsod kenkuana dagiti adalan, “Sadino, Apo?” “Iti sadinoman a yan ti bangkay, sadiay ti paguurnongan dagiti agila,” insungbat ni Jesus.