San Lucas 7:1-50 RIPV1996 - Bible AI

¹Napan ni Jesus idiay Capernaum apaman a nasaona amin dagitoy kadagiti tattao.

²Adda sadiay ti maysa a kapitan dagiti soldado ti Roma. Masakit ti patpatgenna unay nga adipen ket dandanin matay.

³Idi madamag ti kapitan ti maipapan ken ni Jesus, imbaonna ti sumagmamano a panglakayen a Judio tapno dawatenda kenkuana nga umayna agasan ti adipenna.

⁴Napanda ken ni Jesus ket nagpakpakaasida kenkuana. “Pudno a maikari daytoy a tao iti tulongmo,” kinunada,

⁵“ta ay-ayatenna dagiti tattaomi ket imbangonannakami pay iti sinagoga.”

⁶Kimmuyog ni Jesus kadakuada. Idi asidegen ni Jesus iti balay, nangibaon ti kapitan kadagiti gagayyemna tapno ibagada daytoy kenkuana: “Apo, dika la agbambannogen ta diak maikari nga umawat kenka iti balayko.

⁷Ipapanko pay a diak maikari nga umay kenka iti personal. Agbilinka laeng ket umimbagto ti adipenko.

⁸Uray siak, adda dagiti ofisiales a mangituray kaniak ket adda met soldado nga iturayak. ‘Inka,’ kunak iti maysa ket mapan. ‘Umayka,’ kunak iti sabali ket umay. ‘Aramidem daytoy,’ kunak iti adipenko ket aramidenna.”

⁹Nasdaaw ni Jesus a nakangngeg iti daytoy. Sinangona dagiti adu a sumursurot kenkuana sana kinuna: “Ibagak kadakayo a diak pay nakakita iti kastoy a pammati, uray iti entero nga Israel!”

¹⁰Nagsubli dagiti naibaon iti balay ti kapitan ket nasangpetanda nga immimbagen ti adipen.

¹¹Iti saan a nabayag,[12] napan ni Jesus iti maysa nga ili a managan Nain. Kimmuyog kenkuana dagiti adalanna ken adu a tattao.

¹²Idi makaasideg iti ruangan ti ili, apag-isu met a rummuar dagiti tattao iti maysa a pamumpon. Ti natay isu ti bugbugtong nga anak a lalaki ti maysa a balo a babai. Kimmuyog kenkuana ti adu a tattao a taga-siudad.

¹³Naasian ti Apo idi makitana ti ina. “Dika agsangsangit,” kinunana kenkuana.

¹⁴Immasideg ni Jesus ket sinagidna ti lungon. Nagsardeng dagiti mangbakbaklay iti lungon. Kinuna ni Jesus, “Barok, bumangonka!”

¹⁵Nagtugaw daydi natay ket nagsao. Inyawat ni Jesus ken ni inana.

¹⁶Nagbuteng dagiti amin a tattao ket indaydayawda ti Dios. “Nagparang kadatayo ti maysa a naindaklan a profeta!” kinunkunada. “Immay ti Dios a mangisalakan kadagiti tattaona!”

¹⁷Nagwaras daytoy a damag maipapan ken ni Jesus iti entero a Judea ken kadagiti kabangibang a luglugar.

¹⁸[13] Naammoan ni Juan kadagiti adalanna ti amin maipapan kadagitoy ket inayabanna ti dua kadakuada.

¹⁹Imbaon ni Juan ida iti Apo tapno saludsodenda daytoy, “Sika kadi ti umay a kuna ni Juan, wenno aguraykami pay iti sabali?”

²⁰Idi makadanonda ken ni Jesus, kinunada, “Imbaonnakami ni Juan a Mammuniag tapno saludsodenmi kenka no sika ti kunana nga umay, wenno aguraykami pay iti sabali?”

²¹Iti dayta nga oras, adu dagiti tattao a pinaimbag ni Jesus kadagiti saksakit ken an-anayenda. Pinaksiatna dagiti dakes nga espiritu. Inagasanna ti adu a bulsek ket nakakitada.

²²Kinunaⓓ ni Jesus kadagiti imbaon ni Juan, “Agsublikayo ken ni Juan ket ibagayo kenkuana dagiti nakita ken nangngegyo: makakita dagiti bulsek, makapagna dagiti pilay, mapaimbag dagiti agkukutel, makangngeg dagiti tuleng, mapagungar dagiti natay ken maikaskasaba ti Naimbag a Damag kadagiti napanglaw.

²³Nagasat ti tao a di agduadua kaniak!”

²⁴Idi nakapanawen dagiti binaon ni Juan, kinuna ni Jesus kadagiti tattao maipapan ken ni Juan: “Idi mapankayo ken ni Juan idiay let-ang, ania ti ninamnamayo a makita? Maysa a runo a gargarawen ti angin?

²⁵Ania ti napanyo kinita? Maysa a tao a nagkawes iti napintas a pagan-anay? Kinapudnona, palasio ti pagnaedan dagiti agkawes iti kasta ken agbiag a sibubuslon!

²⁶Ibagayo man kaniak no ania ti napanyo kinita? Maysa a profeta? Wen, ket ibagak kadakayo a nangnangruna pay ngem profeta ti nakitayo.

²⁷Taⓔ ni Juan ti pakaiturongan ti kuna ti Nasantoan a Surat:

²⁷‘Adtoy ti babaonek,’ kuna ti Dios; ‘ibaonko nga umun-una ngem sika tapno isaganana ti dalanmo.’

²⁸Ibagak kadakayo a kadagiti amin a nayanak, awan nangnangruna ngem ni Juan. Nupay kasta, natantan-ok ngem isu ti kanumoan iti Pagarian ti Dios.”

²⁹Dimngegⓕ kenkuana dagiti amin a tattao ken dagiti agsingsingir iti buis. Nagdaydayawda iti Dios, gapu ta inawatda ti panangbuniag kadakuada ni Juan.

³⁰Ngem inumsi dagiti Fariseo ken mamaestro iti Linteg ti panggep ti Dios kadakuada ket dida kinayat ti pabuniagan ken ni Juan.

³¹“Ania ti pangipadaak kadagiti tattao kadagitoy nga aldaw?” intuloy ni Jesus. “Ania ti pakayaspinganda?

³²Kasda la kadagiti ubbing nga agtutugaw iti tiendaan. Ipukkaw ti maysa a grupo kadagiti kaay-ayamda, ‘Nagtokarkami iti naragsak, ngem dikay nagsala. Nagkantakam iti naliday, ngem dikayo nagladingit!’

³³Immay ni Juan a Mammuniag,[14] nagayunar ken di imminum iti arak, ket kinunayo: ‘Linuganan ti demonio!’

³⁴Immay ti Anak ti Tao. Nangnangan ken immin-inum ket kinunayo: ‘Kitaenyo daytoy a tao! Narawet ken mammartek. Gayyem dagiti agsingsingir iti buis ken dadduma pay a dakes a tattao!’

³⁵Nupay kasta, maipakita a pudno ti sirib ti Dios babaen kadagiti aramid dagiti annakna.”

³⁶Maysa a Fariseo ti nangawis ken ni Jesus a makipangan kenkuana. Napan ni Jesus iti balay ti Fariseo ket simmango iti panganan.

³⁷Itiⓖ dayta nga ili, adda babai a dakes unay ti panagbiagna. Idi nadamagna a mangmangan ni Jesus iti balay ti Fariseo, napan met sadiay ket nangitugot iti sangafraskita a bangbanglo.

³⁸Nagtakder nga agsangsangit iti likudan ni Jesus. Nagtedted dagiti luana kadagiti saka ni Jesus, ket pinunasanna ida iti buokna. Inagkanna dagiti saka ni Jesus sana binukbokan iti bangbanglo.

³⁹Idi makita daytoy ti Fariseo a nangawis ken Jesus, kinunana iti nakemna: “No pudno a profeta daytoy a tao, ammona koma no siasino daytoy a babai a mangsagsagid kenkuana. Ammona koma ti kadakes ti panagbiagna!”

⁴⁰“Simon,” kinuna ni Jesus iti Fariseo, “adda ibagak kenka.” “Ania dayta, Maestro?” insungbat ni Simon.

⁴¹“Adda dua a tao nga immutang iti kuarta,” inrugi ni Jesus. “Ti maysa, immutang iti 500 a denario,[15] ti maikadua, limapulo.

⁴²Agsipud ta dida makabayad, pinakawan ida ti immutanganda. Siasinonto kadagitoy ti dakdakkel ti panagayatna iti nagpautang?”

⁴³Insungbat ni Simon, “Pagarupek a ti tao nga ad-adu ti napakawan nga utangna.” “Pudno ta kunam,” kinuna ni Jesus.

⁴⁴Tinaliawna ti babai, sana kinuna ken Simon: “Makitam daytoy a babai? Simrekak iti balaymo ket dinak inikkan iti danum a pangbuggok kadagiti sakak, ngem binuggoan daytoy a babai dagiti sakak iti luana ken pinunasanna ida iti buokna.

⁴⁵Sika, dinak sinabat iti agek. Ngem manipud itay simmangpetak, di pay nagsardeng a mangag-agep kadagiti saksakak.

⁴⁶Sika, dimo linanaan ti ulok,[16] ngem isu, dinigosna dagiti sakak iti bangbanglo.

⁴⁷Ngarud, ibagak kenka, gapu iti dakkel a panagayat nga impakitana, napakawanen dagiti adu a basbasolna. Ngem ti tao a bassit ti mapakawan kenkuana, bassit met ti panagayatna.”

⁴⁸Kinuna ni Jesus iti babai, “Napakawanen dagiti basbasolmo.”

⁴⁹“Siasino daytoy a tao a mamakawan uray pay kadagiti basbasol?” kinuna iti nakem dagiti dadduma a sisasango iti panganan.

⁵⁰Ngem kinuna ni Jesus iti babai, “Insalakannaka ti pammatim. Agawidkan a sitatalna.”