San Lucas 8:1-56 RIPV1996 - Bible AI

¹Iti saan a nabayag, sinursor ni Jesus dagiti il-ili ken barbarrio ket inkaskasabana ti Naimbag a Damag maipapan iti Pagarian ti Dios. Kimmuyog kenkuana dagiti sangapulo ket dua nga adalan.

²Kimmuyogⓗ met ti sumagmamano a babbai a naagasan kadagiti sakitda ken kadagiti dakes nga espiritu: ni Maria a managan Magdalena a nakapaksiatan kadagiti pito a demonio,

³ni Juana nga asawa ni Cusa a katalek ni Herodes, ni Susana ken adu pay a babbai a nangipaay kadagiti sanikuada a kas tulong ken ni Jesus ken kadagiti adalanna.

⁴Saan nga agsardeng ti panagsangpet dagiti tattao a mapan ken ni Jesus. Naggapuda kadagiti nadumaduma nga ili. Idi naurnongen ti adu a tao, sinaritana daytoy a pangngarig:

⁵“Adda maysa a tao a napan nagpurruak kadagiti bukel. Idi agpurpurruak, nagdisso ti sumagmamano a bukel iti igid ti dalan a nakapaypayatanda ket tinuktok dagiti tumatayab.

⁶Adda met sumagmamano a bukel a nagdisso iti kabatoan. Idi agtuboda, nalaylayda ta saan a nadam-eg ti daga a nagdissoanda.

⁷Nagdisso ti sumagmamano a bukel iti nagtuboan dagiti siitan a mula a nakigiddan a dimmakkel ken nangleppes kadakuada.

⁸Adda met kadagiti bukel a nagdisso iti nadam-eg a daga, nagtubo ken nagbungada iti sagsasangagasut.

⁸“Dumngeg ngarud ti siasinoman nga addaan pannakaawat,” inggibus ni Jesus.

⁹Sinaludsod dagiti adalan ni Jesus ti kaipapanan daytoy a pangngarig.

¹⁰“Naipakaammoⓘ kadakayo dagiti palimed ti Pagarian ti Dios,” insungbat ni Jesus. “Ngem maipakaammo dagitoy kadagiti dadduma babaen kadagiti pangngarig, tapno ‘uray kitkitaenda, dida mailasin, ken uray dengdenggenda, dida maawatan.’”

¹¹“Daytoy ti kaipapanan ti pangngarig: Ti bukel isu ti sao ti Dios.

¹²Dagiti nagdisso iti igid ti dalan, iladawanda dagiti tattao a dumngeg. Ngem umay ti Diablo ket ikkatenna ti mensahe iti pusoda tapno dida mamati ken maisalakan.

¹³Dagiti nagdisso iti kabatoan, iladawanda dagiti tattao a dumngeg iti mensahe ken awatenda a siraragsak. Ngem saan nga umuneg ti mensahe kadakuada. Mamatida iti apagbiit, ngem suminada no dumteng ti tiempo a pannakasuot.

¹⁴Dagiti nagdisso iti ayan dagiti siitan a mula, kayariganda dagiti tattao a dumngeg; ngem dagiti pakaringgoran ken kinabaknang ken ragragsak ditoy a biag, leppesenda ida ket saan a matangkenan dagiti bungada.

¹⁵Dagiti nagdisso iti nadam-eg a daga, iladawanda dagiti tattao a dumngeg iti mensahe, salimetmetanda iti naimbag ken natulnog a puso, ket agtalinaedda agingga iti agbungada.”

¹⁶“Awanⓙ manggangat iti pagsilawan sana kaluban wenno ikabil iti sirok ti pagiddaan. Ikabilna ketdi iti nairanta a pagyananna tapno makita dagiti tattao ti lawagna no sumrekda.

¹⁷Taⓚ awan ti nailemmeng a dinto mailatak, ket awan ti palimed a dinto maammoan ken maiparangarang.

¹⁸“Agannadkayoⓛ ngarud iti panagdengngegyo. Ta ti addaan, maikkanto pay iti ad-adu, ket ti awanan, uray pay ti ipagarupna nga adda kenkuana maikkatto pay.”

¹⁹Napan ken ni Jesus ni inana ken dagiti lallaki a kakabsatna, ngem dida makaasideg kenkuana gapu iti kaadu ti tao.

²⁰“Adda idiay ruar ni inam ken dagiti lallaki a kakabsatmo, ket kayatdaka a makita,” adda nagkuna ken ni Jesus.

²¹“Ti inak ken kakabsatko, isuda dagiti dumngeg ken mangtungpal iti sao ti Dios,” kinuna ni Jesus kadakuada amin.

²²Iti maysa nga aldaw, limmugan ni Jesus ken dagiti adalanna iti bangka ket kinunana kadakuada, “Bumallasiwtayo.” Nagrubbuatda ket

²³idi aglaylayagda, nakaturog ni Jesus. Dimteng ti napigsa nga angin iti dan-aw ket mangrugin a mapno ti bangka iti danum. Iti kasta, napeggad ti kasasaadda.

²⁴Napan dagiti adalan ken ni Jesus ket riniingda. “Apo! Apo!” kinunada, “lumnedtayon.” Bimmangon ni Jesus ket binilinna ti angin ken dagiti nadawel a dalluyon. Nagtalnada ket nalinak manen ti dan-aw.

²⁵Kinuna ni Jesus kadagiti adalan, “Sadino ti yan ti pammatiyo?”

²⁵Ngem gapu iti siddaaw ken amakda, kinunada iti maysa ken maysa: “Ania ti katataona daytoy? Bilinenna ti angin ken dagiti dalluyon, ket agtulnogda kenkuana!”

²⁶Intuloyda ti naglayag ket dimtengda iti daga dagiti Gergeseno,[17] iti ballasiw ti Dan-aw ti Galilea.

²⁷Idi sumanglad ni Jesus, sinabat ti maysa a lalaki a taga-ili a nabayagen a linuganan dagiti demonio. Lamolamo, ket saan nga agtaeng iti balay no di ket kadagiti tantanem.

²⁸Apaman a nakitana ni Jesus, nagikkis sa nagparintumeng iti sangoananna. “Jesus nga Anak ti Dios a Kangatoan!” impukkawna. “Ania ti kayatmo kaniak? Pangngaasim ta dinak parigaten.”

²⁹Kasta ti sinaona ta imbilin ni Jesus iti dakes nga espiritu a rummuar iti dayta a lalaki. Masansan a parigatenna ket uray tenglen ken kawaranda dagiti ima ken sakana, pugsotenna ti kawar sa iturong ti demonio iti let-ang.

³⁰“Ania ti naganmo?” sinaludsod ni Jesus. “Armada,”[18] insungbat ti tao, ta adu a demonio ti limmugan kenkuana.

³¹Dinawat dagiti demonio ken ni Jesus a dina ibaon ida iti yuyeng.[19]

³²Iti asideg sadiay, adda dakkel nga arban ti baboy a mangmangan iti bakras ti turod. Nagpakpakaasi dagiti demonio ken Jesus a palubosanna ida a sumrek kadagiti baboy. Pinalubosanna ida.

³³Rimmuar ngarud dagiti demonio iti tao ket simrekda kadagiti baboy. Nagdadarison ti entero nga arban iti teppang, sada timmapuak iti dan-aw ket nalmesda amin.

³⁴Idi makita dagiti agtartaraken kadagiti baboy ti napasamak, nagtatarayda a napan nagipadamag iti ili ken kadagiti barbarrio.

³⁵Napan kinita dagiti tattao ti napasamak. Idi makadanonda iti ayan ni Jesus, nasarakanda ti lalaki a nakapaksiatan dagiti demonio. Agtugtugaw a nakabadon iti sakaanan ni Jesus. Nagpulangen ti nasayaat a panunotna.

³⁵Nagbuteng dagiti amin a tattao.

³⁶Sinarita dagiti nakaimatang iti napasamak no kasano ti pannakapaimbag ti lalaki.

³⁷Gapu iti kasta unay a buteng dagiti Gergeseno,[20] dinawatda ken ni Jesus a pumanaw sadiay. Limmugan ngarud ni Jesus iti bangka ket pimmanaw.

³⁸Nagpakpakaasi ken Jesus ti lalaki a nakapaksiatan dagiti demonio a makikuyog koma kenkuana. Ngem pinagawid ni Jesus a kunana:

³⁹“Agawidka ketdi ket saritaem ti amin nga inaramid ti Dios kenka.”

³⁹Nagawid ti lalaki ket impadamagna iti entero nga ili ti inaramid ni Jesus kenkuana.

⁴⁰Idi agsubli ni Jesus iti ballasiw ti dan-aw, inawat a siraragsak dagiti adu a tattao a nangpaspasungad kenkuana.

⁴¹Ket dimteng ti maysa a tao nga agnagan Jairo, maysa a pangulo iti sinagoga sadiay. Nagrukbab iti sangoanan ni Jesus ket nagpakpakaasi kenkuana a mapan iti balayna.

⁴²Dandani ngamin matay ti kakaisuna nga anakna a babai nga agtawen iti sangapulo ket dua.

⁴²Idi magmagna ni Jesus, inaribungbongan dagiti tattao.

⁴³Adda sadiay ti maysa a babai nga agsagsagaba iti panagbulos ti dara. Sangapulo ket dua a tawenen nga agsagsagaba ket nagastona aminen a sanikuana kadagiti mangngagas[21] ngem awan nakapaimbag kenkuana.

⁴⁴Nakilinnetlet kadagiti tattao ket napan iti likudan ni Jesus. Sinagidna ti gayadan ti kagay ni Jesus, ket dagus a nagsardeng ti panagbulos ti darana.

⁴⁵“Siasino ti nangsagid kaniak?” sinaludsod ni Jesus. “Saan a siak,” maysa-maysa ti nagkuna. “Apo,” kinuna ni Pedro, “adu a tattao ti agdidinnuron iti lawlawmo.”

⁴⁶“Adda nangsagid kaniak,” impapati ni Jesus, “ta nariknak nga adda pannakabalin a nauyos kaniak.”

⁴⁷Idi makita ti babai a naduktalanen, agtigtigerger a napan ken ni Jesus sa nagrukbab iti sangoananna. Iti imatang dagiti amin a tattao, impalawagna no apay a sinagidna ni Jesus ken ti pannakapaimbagna a dagus.

⁴⁸“Anakko, pinaimbagnaka ti pammatim,” kinuna ni Jesus. “Agawidkan a sitatalna.”

⁴⁹Madama pay laeng a sasawen daytoy ni Jesus idi dumteng ti naibaon a naggapu iti balay ni Jairo. “Natayen ti anakmo,” kinunana ken ni Jairo. “Saanmon a ringgoren ti Maestro.”

⁵⁰Ngem nangngeg daytoy ni Jesus ket kinunana ken ni Jairo, “Dika agdanag. Papigsaem ketdi ti pammatim ket umimbagto ti anakmo.”

⁵¹Idi dumteng ni Jesus iti balay, awan pinastrekna no di laeng da Pedro, Juan, Santiago ken dagiti nagannak iti ubing.

⁵²Amin nga adda sadiay sangsangitan ken dungdung-awanda ti ubing.

⁵²“Dikay agsangsangit,” kinuna ni Jesus. “Saan a natay ti ubing—matmaturog laeng!”

⁵³Linalaisda ni Jesus, ta ammoda a natayen ti ubing.

⁵⁴Ngem iniggaman ni Jesus ti ima ti ubing. “Anak, bumangonka,” kinuna ni Jesus.

⁵⁵Nagungar ti ubing ket timmakder a dagus. Imbilin ni Jesus nga ikkanda iti kanenna.

⁵⁶Nasdaaw dagiti nagannak, ngem imbilin ni Jesus kadakuada nga awan pangibagbagaanda iti napasamak.