San Lucas 9:1-62 RIPV1996 - Bible AI

¹Inayaban ni Jesus dagiti sangapulo ket dua nga adalan ket intedna kadakuada ti pannakabalin ken turay a mangpaksiat kadagiti amin a demonio ken mangpaimbag kadagiti masakit.

²Kalpasanna, imbaonna ida a mangikasaba iti Pagarian ti Dios ken mangpaimbag kadagiti masakit.

³Kinunanaⓜ kadakuada, “Dikayo mangitugtugot iti uray ania, sarukod man wenno bay-on, kanen man wenno kuarta, uray pay pagsukatanyo.

⁴No adda mangawat kadakayo, agdaguskayo iti dayta a balay inggana a pumanawkay iti dayta nga ili.

⁵Noⓝ didakay awaten, panawanyo dayta nga ili ket pampagenyo ti tapok iti sakayo a kas pakaballaaganda.”

⁶Pimmanaw dagiti adalan ket sinursorda ti amin a barrio. Inkaskasabada ti Naimbag a Damag, ken nangag-agasda kadagiti masakit iti amin a lugar.

⁷Nadamagⓞ ni Herodes nga agturay iti Galilea dagiti amin a mapaspasamak ket napalalo ti pannakariribukna gapu ta adda sumagmamano a tattao nga agkunkuna a nagungar ni Juan a Mammuniag.[22]

⁸Kuna met dagiti dadduma a nagparang ni Elias. Adda pay nagkuna a nagungar ti maysa kadagiti immun-una a profeta.

⁹“Pinaputolak ni Juan,” kinuna ni Herodes, “ngem siasino daytoy a tao a madamdamagko?” Manipud idin, tinarigagayanna a makita ni Jesus.

¹⁰Nagsubli dagiti apostoles ket sinaritada ken ni Jesus ti amin nga inaramidda. Inkuyogna ida a napan iti ili a managan Betsaida.

¹¹Nadamag daytoy dagiti tattao ket simmurotda kenkuana. Inawatna ida ket inkasabana kadakuada ti Pagarian ti Dios. Pinaimbagna dagiti masapul a maagasan.

¹²Mumalemen idi napan kenkuana dagiti sangapulo ket dua nga adalan. “Pagawidemon dagiti tattao,” kinunada, “tapno mapanda kadagiti kabangibang nga il-ili ken barbarrio ket agbirokda iti kanen ken pagdagusanda, ta adayotayo kadagiti balbalay.”

¹³“Ikkanyo ketdi ida iti kanenda!” insungbat ni Jesus. “Lima a tinapay ken dua nga ikan laeng ti adda kadakami,” kinunada. “Kayatmo kadi nga inkam gumatang iti ipakan kadakuada amin?”

¹⁴(Aglimaribu ti bilang dagiti lallaki sadiay.) “Pagtugawenyo a magrupo-grupo dagiti tattao; saglilimapulo iti tunggal grupo,” imbilin ni Jesus kadagiti adalan.

¹⁵Nagtungpal dagiti adalan ket pinagtugawda dagiti amin a tattao.

¹⁶Innala ni Jesus dagiti lima a tinapay ken dua nga ikan. Timmangad sadi langit sa nagyaman iti Dios. Pinispisina dagiti tinapay ket intedna kadagiti adalan tapno ibunongda kadagiti tattao.

¹⁷Nanganda amin ket nabsogda. Inurnong dagiti adalan dagiti natda ket napno ti sangapulo ket dua a basket a nagikabilanda.

¹⁸Iti maysa nga aldaw, idi agkarkararag a maymaysa ni Jesus, immasideg kenkuana dagiti adalan. “Siasinoak kano iti panagkuna dagiti tattao?” sinaludsodna kadakuada.

¹⁹“Addaⓟ agkuna a sika ni Juan a Mammuniag,” insungbatda. “Adda met agkuna a sika ni Elias. Adda pay agkuna a nagungar ti maysa kadagiti immun-una a profeta.”

²⁰“Ketⓠ dakayo,” sinaludsodna kadakuada, “siasinoak iti panagkunayo?” “Sika ti Cristo ti Dios,” insungbat ni Pedro.

²¹Siiinget ni Jesus a nangbilin kadakuada nga awan pangibagbagaanda iti daytoy.

²²Kinunana pay: “Masapul nga agsagabanto iti napalalo ti Anak ti Tao ken laksiden dagiti panglakayen, dagiti panguloen a papadi ken dagiti mamaestro iti Linteg. Mapapatayto, ngem mapagungarto iti maikatlo nga aldaw.”

²³Ketⓡ kinunana kadakuada amin: “Ti agtarigagay a sumurot kaniak, masapul a tallikudanna ti bagina, ibaklayna ti krusna iti inaldaw, ket surotennak.

²⁴Taⓢ ti tao a mangisalakan iti biagna, mapukawnanto. Ngem ti makapukaw iti biagna gapu kaniak, maisalakannanto.

²⁵Adda aya magunggona ti tao no matagikuana ti entero a lubong ngem mapukaw wenno madadael met ti biagna? Awan!

²⁶Ti mangibain kaniak ken iti pannursurok, ibainto met ti Anak ti Tao inton umay iti bukodna a dayag, iti dayag ti Ama ken dagiti nasantoan nga angheles.

²⁷Laglagipenyo daytoy: Adda sumagmamano kadakayo ditoy a dinto matay agingga iti makitada ti Pagarian ti Dios.”

²⁸Agarupⓣ maysa a lawas kalpasan ti panangisao ni Jesus kadagitoy, inkuyogna da Pedro, Juan ken Santiago ket simmang-atda iti bantay tapno agkararag.

²⁹Idi agkarkararag, nagbalbaliw ti langana ket makasisirap ti pudaw dagiti pagan-anayna.

³⁰Pagammoan, adda dua a lallaki a makisasao kenkuana—da Moises ken Elias.

³¹Nagparangda iti nailangitan a dayag. Kasarsaritada ni Jesus maipapan iti asidegen a panangtungpalna iti panggep ti Dios babaen iti ipapatayna idiay Jerusalem.

³²Nargaan idi ti turog ni Pedro ken dagiti kaduana, ngem idi makariingda, nakitada ti dayag ni Jesus ken dagiti dua a lallaki nga agtatakder iti abayna.

³³Bayat ti ipapanaw dagiti dua iti yan ni Jesus, kinuna ni Pedro kenkuana: “Apo, nagsayaaten ti kaaddatayo ditoy! Mangaramidkam iti tallo a kalapaw: maysa para kenka, maysa para ken ni Moises, ket ti maysa para ken ni Elias.” (Dina ammo idi ti sasawenna.)

³⁴Madama pay la nga agsasao idi agparang ti maysa nga ulep a nanglinong kadakuada ket nagbuteng dagiti adalan idi kumotan ida ti ulep.

³⁵Addaⓤ timek a naggapu iti ulep a nagkuna: “Daytoy ti Anakko, ti pinilik.[23] Isu ti denggenyo.”

³⁶Idi agpukawen ti timek, ni laengen Jesus ti adda. Nagulimek dagiti adalan ket awan nangibagbagaanda idi iti aniaman a nakitada.

³⁷Iti sumaruno nga aldaw, simmalogda iti bantay. Adu a tattao ti simmabat ken Jesus.

³⁸Pagammoan, maysa kadakuada ti nagpukkaw. “Maestro,” impakpakaasina, “kitaem kadi daytoy barok, ti kakaisuna nga anakko.

³⁹No luganan ti dakes nga espiritu, pagikkisenna a kellaat, pagkissiwenna ket paglabutabenna ti ngiwatna. Parigatenna unay ket dina kayat a panawan.

⁴⁰Dinawatko kadagiti adalam a paksiatenda koma, ngem dida nabalinan.”

⁴¹“Tattao a managdakdakes ken awanan pammati!” kinuna ni Jesus. “Kasano pay kabayag ti kaaddak iti dennayo? Kasano pay kabayag ti panagan-anusko kadakayo?” Ket kinunana iti ama ti ubing, “Yegmo ditoy ti anakmo.”

⁴²Idi umas-asideg ti ubing, imbalat ti demonio ket pinagkissiwna. Ngem inungtan ni Jesus ti dakes nga espiritu, pinaimbagna ti ubing sana inyawat ken ni amana.

⁴³Nagsiddaaw dagiti amin a tattao iti naindaklan a pannakabalin ti Dios. Masmasdaaw pay laeng dagiti tattao iti amin nga inaramid ni Jesus, idi kunana kadagiti adalanna,

⁴⁴“Diyo liplipatan daytoy ibagak kadakayo: Dandanin mayawat ti Anak ti Tao iti pannakabalin dagiti tattao.”

⁴⁵Ngem dida ammo ti kaipapanan ti sinaona ta nailimed kadakuada tapno dida maawatan. Nagbutengda nga agsaludsod kenkuana maipapan iti daytoy.

⁴⁶Addaⓥ rimsua a panagsusuppiat kadagiti adalan no siasino kadakuada ti kangrunaan.

⁴⁷Ammo ni Jesus ti pampanunotenda, isut' gapuna a nangala iti maysa nga ubing, ket pinagtakderna iti abayna

⁴⁸sanaⓦ kinuna kadakuada, “Ti umawat iti daytoy nga ubing gapu kaniak, siak ti awatenna. Ket ti umawat kaniak, awatenna met ti nangibaon kaniak. Ta ti kanunumoan kadakay amin, isu ti kangrunaan.”

⁴⁹“Apo,” impulong ni Juan, “nakitami ti maysa a tao a mangpakpaksiat kadagiti demonio babaen iti naganmo. Pinaritanmi gapu ta ditayo met kadua.”

⁵⁰“Saanyo a paritan,” kinuna ni Jesus kenkuana ken kadagiti dadduma nga adalan, “ta kaduayo ti saan a bumusor kadakayo.”

⁵¹Idi umasidegen ti aldaw a pannakayuli ni Jesus sadi langit, inkeddengna ti mapan idiay Jerusalem.

⁵²Pinaunana ti sumagmamano a tattao. Napanda iti maysa a barrio idiay Samaria[24] tapno isaganada ti amin para kenkuana.

⁵³Ngem saan nga inawat dagiti tattao sadiay, ta nalawag a mapan ni Jesus idiay Jerusalem.

⁵⁴Idiⓧ makita daytoy da Santiago ken Juan nga adalanna, kinunada, “Apo, kayatmo nga awaganmi a bumaba ti apuy sadi langit tapno uramenna ida?”[25]

⁵⁵Sinango ni Jesus dagiti adalan sana binabalaw ida.[26]

⁵⁶Kalpasanna, napan ni Jesus ken dagiti adalanna iti sabali a barrio.

⁵⁷Idi addada iti dalanda, immasideg ti maysa a lalaki ket kinunana ken ni Jesus, “Sumurotak kenka, uray sadino ti papanam.”

⁵⁸“Adda rukib dagiti musang, ken adda umok dagiti tumatayab, ngem awan pagiddaan ken paginanaan ti Anak ti Tao,” insungbat ni Jesus.

⁵⁹Kinunana iti sabali a lalaki, “Surotennak.” Ngem kinuna ti lalaki, “Apo, innak man pay ipumpon ni amak.”

⁶⁰Kinuna ni Jesus kenkuana, “Bay-am dagiti natay a mangipumpon kadagiti minatayda. Inka ketdi ikasaba ti Pagarian ti Dios.”

⁶¹Addaⓨ manen sabali a nagkuna ken ni Jesus, “Sumurotak kenka, Apo, ngem innak kadi pay agpakada iti familiak.”

⁶²Kinuna ni Jesus kenkuana, “Ti mangrugi nga agarado sa taliaw a taliaw, saan a maikari iti Pagarian ti Dios.”