San Marcos 15:1-47 RIPV1996 - Bible AI

¹Idi bumigaten, nagmimiting dagiti panguloen a papadi agraman dagiti panglakayen, dagiti mamaestro iti Linteg ken amin a kamkameng ti Sanhedrin. Tinulagda no ania ti aramidenda. Pinungoda ni Jesus sada impan ken ni Pilato.

²“Sika kadi ti Ari dagiti Judio?” sinaludsod kenkuana ni Pilato. “Nasaomon,” insungbat ni Jesus.

³Adu ti impabasol kenkuana dagiti panguloen a papadi.

⁴“Awan kadi ti maisungbatmo?” sinaludsod manen ni Pilato. “Denggem dagiti nakaad-adu nga ipabpabasolda kenka!”

⁵Ngem saan manen a simmungbat ni Jesus, ket nasdaaw ni Pilato.

⁶Tunggal Fiesta ti Paskua, kadawyan ni Pilato a wayawayaanna ti siasinoman a balud a dawaten dagiti tattao.

⁷Iti dayta a tiempo, adda lalaki nga agnagan Barrabas a sibabalud a kaduana dagiti immalsa a nakapapatay bayat ti riribuk.

⁸Idi naguummong dagiti tattao iti sangoanan ni Pilato, dinawatda nga ipaayna koma kadakuada ti ar-aramidenna iti tunggal fiesta.

⁹“Kayatyo a wayawayaak kadakayo ti Ari dagiti Judio?” sinaludsod ni Pilato.

¹⁰Ammona ngamin a gapu iti apal dagiti panguloen a papadi, inyawatda kenkuana ni Jesus.

¹¹Ngem sinugsogan dagiti panguloen a papadi dagiti tattao tapno dawatenda a ni Barrabas laengen ti wayawayaanna kadakuada. Nagsao manen ni Pilato kadagiti tattao.

¹²“Ania ngarud ti kayatyo nga[39] aramidek iti kunkunayo nga Ari dagiti Judio?” dinamagna.

¹³“Ilansam iti krus!” impukkawda.

¹⁴“Ania kadi ti basolna?” kinuna ni Pilato. “Ilansam iti krus!” inyad-addada ketdi nga impukkaw.

¹⁵Gapu ta kayat ni Pilato a pagustoan dagiti tattao, winayawayaanna ni Barrabas. Kalpasanna, pinasaplitna ni Jesus sana inyawat kadagiti soldado tapno ilansada iti krus.

¹⁶Inserrek dagiti soldado ni Jesus iti pangukoman (iti palasio ti Gobernador) sada inayaban dagiti dadduma a soldado.

¹⁷Kinagayanda ni Jesus iti nalabaga a lupot. Nagaramidda iti korona a sisiitan ket imbalangatda kenkuana.

¹⁸Kalpasanna, nagindadayawda a nangkablaaw kenkuana: “Agbiag ti Ari dagiti Judio!”

¹⁹Tinik-otik-olanda ti ulona iti runo. Tinupratupraanda. Nagparintumengda a naginrurukbab kenkuana.

²⁰Idi nalpasdan a nagang-angawan, inikkatda ti nalabaga a kagay. Imbadoda met laeng kenkuana ti pagan-anayna sada inruar tapno ilansada iti krus.

²¹Itiⓢ dalan, nasabatda ni Simon a taga-Cirene nga ama da Alejandro ken Rufo. Naggapu ni Simon iti away ket mapan iti siudad. Pinilit dagiti soldado a baklayenna ti krus ni Jesus.

²²Impanda ni Jesus iti disso a managan Golgota, a kayatna a sawen, “Lugar ti Bangabanga.”

²³Inikkanda iti arak a nalaokan iti mirra, ngem dina ininum.

²⁴Inlansadaⓣ iti krus. Kalpasanna, biningbingayda ti pagan-anayna, babaen iti panagbibinnunotda no ania ti alaen ti tunggal maysa.

²⁵Alas nuebe iti bigat idi ilansada.

²⁶Daytoy ti naisurat a naipabasol kenkuana: “Ti Ari dagiti Judio.”

²⁷Inggiddandaⓤ met nga inlansa iti krus ti dua a tulisan: ti maysa iti makannawan ni Jesus, ket ti sabali iti makannigidna.[40]

²⁹Nagngirsiⓥ dagiti tattao nga aglabas. Pinagsasaoanda ni Jesus: “Kinunkunam a rebbaem ti Templo samo bangonen met laeng iti uneg ti tallo nga aldaw.

³⁰Isalakanmo man ngarud ta bagim ket bumabaka iti krus.”

³¹Nakipagang-angaw dagiti panguloen a papadi, ken dagiti mamaestro iti Linteg. “Insalakanna dagiti dadduma ngem dina maisalakan ti bagina,” kinunkunada.

³²“No isu ti Cristo nga Ari ti Israel, kitaentayo man a bumaba ita iti krus tapno mamatitayo kenkuana.”

³²Nakipaglalais met dagiti padana a nailansa iti krus.

³³Iti tengnga ti aldaw, nagsipnget iti entero a daga ket nagpaut iti tallo nga oras.

³⁴Itiⓦ alas tres iti malem, impukkaw ni Jesus, “Eloi, Eloi, lama sabaktani?” a kayatna a sawen, “Diosko, Diosko, apay a binaybay-annak?”

³⁵Nangngeg daytoy ti sumagmamano nga adda sadiay ket kinunada, “Denggenyo, ay-ayabanna ni Elias!”

³⁶Addaⓧ nagtaray a napan nangala iti espongha. Impasagepsepna iti suka sana inkabil iti sukdal ket intanggayana ken ni Jesus. “Aguraykayo!” kinunana. “Kitaentayo man no umay ni Elias a mangibaba kenkuana iti krus!”

³⁷Nagikkis ni Jesus iti napigsa ket nauyosen ti biagna.

³⁸Napigisⓨ ti kurtina a naibengbeng iti Templo: naggudua manipud iti ngato agingga iti baba.

³⁹Iti sangoanan ti krus, adda nga agtaktakder ti kapitan dagiti soldado. Naimatanganna ti pannakatay ni Jesus. “Pudno gayam nga anak ti Dios daytoy a tao,” kinunana.

⁴⁰Itiⓩ pangadaywen bassit, adda met babbai a mangbuybuya iti mapaspasamak. Adda kadagitoy da Maria Magdalena ken Salome ken ni Maria nga ina da Jose ken Santiago nga ub-ubing.

⁴¹Simmursurotda ken ni Jesus idi adda idiay Galilea, ket nagserserbida kenkuana. Adu pay dagiti sabsabali a babbai nga adda sadiay a kimmuyog kenkuana idi napan idiay Jerusalem.

⁴²Dandanin sumipnget idi dumteng ni Jose a taga-Arimatea,

⁴³maysa a madaydayaw a kameng ti Sanhedrin. Makipagpaspasungad met iti Pagarian ti Dios.

⁴³Agsipud ta Aldaw a Panagsagana idi, kayatna a sawen, aldaw sakbay ti Panaginana, situtured ni Jose a napan ken ni Pilato tapno dawatenna ti bangkay ni Jesus.

⁴⁴Nasdaaw ni Pilato idi maammoanna a natayen ni Jesus. Inayabanna ti kapitan dagiti soldado ket sinaludsodna kenkuana no nabayagen a natay ni Jesus.

⁴⁵Pinatalgedan ti kapitan a natayen ni Jesus.

⁴⁵Impalubos ni Pilato nga alaen ni Jose ti bangkay.

⁴⁶Gimmatang ni Jose iti linen a lupot. Imbabana ti bangkay ni Jesus, binungonna iti lupot ket inkabilna iti tanem a naikungkong iti bato. Kalpasanna, nangitulid iti dakkel a bato a pinangserrana iti tanem.

⁴⁷Siiimatang idi da Maria Magdalena ken Maria nga ina ni Jose. Nakitada ti nakaitaneman ni Jesus.