San Marcos 16:1-20 RIPV1996 - Bible AI

¹Idi nakalabasen ti Aldaw a Panaginana, gimmatang da Maria Magdalena, Salome ken Maria nga ina ni Santiago iti bangbanglo a pangsapsapoda iti bangkay ni Jesus.

²Iti agsapa, idi lumgaken ti init, iti umuna nga aldaw ti lawas, napanda iti nakaitaneman ni Jesus.

³Iti dalan, kinunada iti maysa ken maysa, “Siasinonto ti kasaotayo a mangitulid iti bato a naiserra iti tanem?”

⁴Ngem idi kitaenda ti tanem, nakitada a natuliden ti bato. Ket nakadakdakkel!

⁵Simrekda iti tanem ket nasdaawda ta adda nakitada nga agtutubo a lalaki nga agtugtugaw iti makannawan ken nakakawes iti puraw.

⁶Kinuna ti lalaki, “Dikay masdaaw! Ammok a sapsapulenyo ni Jesus a taga-Nazaret a nailansa iti krus. Awan ditoy. Napagungaren! Kitaenyo, adtoy ti disso a nangikabilanda kenkuana.

⁷Ita,ⓐ inkay ibaga daytoy a mensahe kadagiti adalanna, agraman ni Pedro: ‘Umun-unanto ngem dakayo a mapan idiay Galilea. Makitayonto sadiay a kas kinunana kadakayo.’”

⁸Iti kasta, nagtataray dagiti babbai a rimmuar iti tanem. Napalalo ti kigtot ken butengda. Awan ti siasinoman a nangibagaanda iti napasamak ta kasta unay ti butengda.

⁹[41] Iti agsapa ti umuna nga aldaw ti lawas kalpasan ti panagungar ni Jesus, immuna a nagparang ken ni Maria Magdalena a nangpaksiatanna idi iti pito a demonio.

¹⁰Napan impakaammo ni Maria daytoy kadagiti kimmuykuyog ken ni Jesus. Agladladingit ken agsangsangitda.

¹¹Uray nangngegda a kinunana a sibibiag ni Jesus ken nagparang kenkuana, saanda latta a namati.

¹²Kalpasan daytoy, iti sabali a wagas, nagparang ni Jesus kadagiti dua nga adalan a magmagna a mapan iti away.

¹³Nagsubli dagiti dua ket impakaammoda kadagiti kakaduada a nagparang ni Jesus, ngem saanda a namati kadakuada.

¹⁴Kamaudiananna, nagparang ni Jesus kadagiti sangapulo ket maysa nga adalan idi mangmanganda. Inungtanna ida gapu iti kaawan ti pammatida ken iti katangken ti uloda, ta dida namati kadagiti nakakita kenkuana a nagungaren.

¹⁵Imbaganaⓑ kadakuada: “Inkay iti entero a lubong ket ikasabayo ti Naimbag a Damag kadagiti amin a parsua.

¹⁶Ti mamati ken mabuniagan,[42] maisalakanto. Ngem ti di mamati, madusanto.

¹⁷Maitedto kadagiti mamati dagitoy a pannakabalin: Iti naganko, paksiatendanto dagiti demonio. Agsaodanto kadagiti sabali a pagsasao.

¹⁸Uray no agiggemda kadagiti uleg, wenno uminumda iti sabidong, didanto maan-ano. Ipataydanto ti imada kadagiti masakit ket umimbagdanto.”

¹⁹Kalpasanⓒ ti pannakisao ni Apo Jesus kadakuada, nayuli sadi langit, ket nagtugaw iti makannawan ti Dios.

²⁰Napan nangaskasaba dagiti adalan iti amin a disso. Timmultulong ti Apo kadakuada ket pinasingkedanna ti kinapudno ti panangaskasabada babaen kadagiti milagro a naaramid. Napan dagiti babbai kada Pedro ken dagiti gagayyemna, ket iti ababa a sarita, impadamagda amin a naibaga kadakuada. Kalpasanna, imbaon ni Jesus dagiti adalanna a mapan iti amin a lugar a mangiwaragawag iti nasantoan ken saan nga agpatingga a damag iti agnanayon a pannakaisalakan.

²⁰TI AB-ABABA A PAGGIBUSAN [43]