San Marcos 8:1-38 RIPV1996 - Bible AI

¹Iti saan a nabayag kalpasanna, naguurnong manen dagiti adu a tattao. Agsipud ta awan ti kanenda, inayaban ni Jesus dagiti adalanna.

²“Maasianak kadagitoy a tattao,” kinunana. “Tallo nga aldawdan ditoy yanko, ket ita, awanen ti kanenda.

³No pagawidek ida a sibibisin, matalimudawdanto iti dalan ta adayo ti naggapuan dagiti dadduma.”

⁴“Sadino ditoy let-ang ti pangalaantayo iti umanay nga ipakan iti kastoy kaadu a tattao?” sinaludsod dagiti adalanna.

⁵“Adda mano a tinapayyo?” sinaludsod ni Jesus. “Pito,” insungbatda.

⁶Imbilin ni Jesus kadagiti tattao nga agtugawda iti daga. Innalana dagiti pito a tinapay ket nagyaman iti Dios. Kalpasanna, pinispisina sana inted kadagiti adalanna tapno ibunongda kadagiti tattao. Ket tinungpalda ti imbilinna.

⁷Adda pay sumagmamano a babassit nga ikan. Nagyaman ni Jesus iti Dios gapu kadagitoy sana inted kadagiti adalanna tapno ibunongda met kadagiti tattao.

⁸Nanganda amin ket nabsogda—aguppat a ribu ti bilang dagiti tattao. Kalpasanna, innala dagiti adalan dagiti pito a basket a napno kadagiti natda. Pinagawid ni Jesus dagiti tattao

¹⁰sa dagus a limmugan iti bangka agraman dagiti adalanna ket napanda iti sakup ti Dalmanuta.

¹¹Napanⓔ ti sumagmamano a Fariseo ken ni Jesus ket nakisuppiatda kenkuana. Kas pangsuotda kenkuana, kiniddawda a mangiparang iti milagro a pakakitaan a naggapu sadi langit ti pannakabalinna.

¹²Nagsennaayⓕ ni Jesus iti nauneg ket kinunana, “Apay nga agkiddaw iti milagro dagiti tattao kadagitoy nga al-aldaw? Kunak kadakayo nga awan ti maited a pammaneknek kadagita a tattao!”

¹³Pinanawanna ida ket nagsubli iti bilog sa bimmallasiw iti dan-aw.

¹⁴Nalipatan dagiti adalanna ti nagbalon iti tinapay malaksid ti maysa nga adda kadakuada iti bangka.

¹⁵“Agsiputkayo!”ⓖ imballaag ni Jesus kadakuada. “Annadanyo ti lebadura dagiti Fariseo, kasta met ti lebadura ni Herodes.”

¹⁶Nagsasaritaanda maipapan iti imbagana. “Kasta ti saona ta awan tinapaytayo,” kinunada.

¹⁷Nadlaw daytoy ni Jesus ket kinunana, “Apay a pagsasaritaanyo ti kaawan ti tinapayyo? Diyo pay kadi ammo wenno maawatan? Nagnengnengkayo ketdin!

¹⁸Addaⓗ matayo; dikayo kadi makakita? Adda lapayagyo; dikayo kadi makangngeg? Diyo kadi malagip

¹⁹idi pinispisik dagiti lima a tinapay a kinnan dagiti limaribu a tattao? Mano a basket ti tedda nga inurnongyo?”

¹⁹“Sangapulo ket dua,” insungbat dagiti adalan.

²⁰Sinaludsod ni Jesus, “Idi pinispisik dagiti pito a tinapay a kinnan dagiti uppat a ribu a tattao, mano a basket ti tedda a naurnongyo?” “Pito,” insungbatda.

²¹Kinuna ni Jesus kadakuada, “Agpapan ita, diyo kadi pay la maawatan?”

²²Simmangpet ni Jesus ken dagiti adalanna idiay Betsaida. Impan ti sumagmamano a tattao ti maysa a bulsek a lalaki iti yan ni Jesus. Impakpakaasida kenkuana a sagidenna ti bulsek.

²³Kinibin ni Jesus ti bulsek ket inturongna iti ruar ti barrio. Kalpasan ti panangtuprana kadagiti mata ti bulsek, impatayna dagiti imana kenkuana sana sinaludsod, “Adda makitam?”

²⁴Kimmita ti lalaki iti aglawlawna. “Wen, makitak dagiti tattao,” kinunana, “ngem kasda la kayo a magmagna.”

²⁵Sinagid manen ni Jesus dagiti mata ti lalaki. Nagmulagat a naimbag ti lalaki ket naimbaganen dagiti matana. Nalawagen ti panagkitana iti amin.

²⁶Idi pagawiden ni Jesus ti lalaki, imbilinna, “Dika dumagdagasen iti barrio.”

²⁷Napan ni Jesus agraman dagiti adalanna kadagiti purpurok iti Cesarea Filipos. Idi magmagnada, sinaludsodna kadakuada, “Ibagayo man kaniak, siasinoak kano iti panagkuna dagiti tattao?”

²⁸“Sikaⓘ kano ni Juan a Mammuniag,”[21] insungbatda. “Adda met dagiti agkuna a sika ni Elias. Adda pay mangibaga a maysaka kadagiti profeta.”

²⁹“Ketⓙ dakayo met,” sinaludsodna, “siasinoak iti panagkunayo?” “Sika ti Cristo,” insungbat ni Pedro.

³⁰Imbilin ni Jesus kadakuada nga awan pangibagbagaanda iti kinasiasinona.

³¹Kalpasanna, rinugian ni Jesus nga insuro dagiti adalanna: “Masapul nga agsagabanto iti napalalo ti Anak ti Tao. Laksidento dagiti panglakayen, dagiti panguloen a papadi ken dagiti mamaestro iti Linteg. Mapapatayto, ngem agungar met laeng kalpasan ti tallo nga aldaw.”

³²Nalawag ti panangibagana kadakuada iti daytoy. Isut' gapuna nga inyadayo bassit ni Pedro ni Jesus sana binabalaw.

³³Ngem timmallikud ni Jesus, kinitana dagiti adalanna ket inungtanna ni Pedro. “Adaywannak, Satanas,” kinunana, “ta saan nga agtaud iti Dios ti pampanunotem no di ket agtaud iti tao.”

³⁴Pinaasidegⓚ ni Jesus dagiti tattao ken dagiti adalanna. “Ti agtarigagay a sumurot kaniak,” kinunana, “masapul a tallikudanna ti bagina, ibaklayna ti krusna ket surotennak.

³⁵Taⓛ ti siasinoman a mangipatpateg iti biagna, mapukawnanto; ngem ti mangyawat iti biagna gapu kaniak ken iti ebanghelio, maisalakannanto.

³⁶Adda aya magunggona ti tao no matagikuana ti entero a lubong ngem mapukawna met ti biagna? Awan!

³⁷Awan ti mabalin nga ited ti tao a pangsubbot iti biagna.

³⁸Ngarud, ti mangibain kaniak ken dagiti saok iti daytoy managbasol ken awanan pammati a kaputotan, ibainto met ti Anak ti Tao inton umay iti dayag ni Amana a kuyogen dagiti nasantoan nga angheles.”