San Marcos 9:1-50 RIPV1996 - Bible AI

¹Kinunana pay, “Laglagipenyo daytoy! Adda sumagmamano kadakayo ditoy a saanto pay a matay agingga a makitada ti yaay ti Pagarian ti Dios agraman ti amin a pannakabalin.”

²Kalpasanⓜ ti innem nga aldaw, inkuyog ni Jesus da Pedro, Santiago ken Juan ket simmang-atda iti nangato a bantay. Sadiay, nagbalbaliw ti langa ni Jesus iti imatangda.

³Makapurar ti pudaw dagiti pagan-anayna ket awan ti siasinoman ditoy lubong a makapapudaw kas iti kapudawda.

⁴Pagammoan, nakita dagiti tallo nga adalan da Elias ken Moises a makisasao ken ni Jesus.

⁵Nagsao ni Pedro ket kinunana ken ni Jesus: “Maestro, nagsayaaten ti kaaddatayo ditoy! Mangbangonkami ketdi iti tallo a kalapaw: maysa ti para kenka, maysa ti para ken ni Moises, ket ti maysa para ken ni Elias.”

⁶Kasta unay ngamin ti buteng dagiti adalan ket saan nga ammo ni Pedro ti tumutop a sawenna.

⁷Nagparangⓝ ti ulep a nanglinong kadakuada ket adda nangngegda a timek a naggapu iti ulep. Kinunana, “Daytoy ti Anakko a dungdungngoek. Dumngegkayo kenkuana.”

⁸Dinagdagusda nga inwaras ti panagkitada, ngem awanen sabali a nakitada no di laeng ni Jesus.

⁹Idi sumalsalogda iti bantay, imbilin ni Jesus kadakuada, “Awan pangibagbagaanyo iti naimatanganyo. Ibagayonto laeng daytoy kalpasan ti panagungar ti Anak ti Tao.”

¹⁰Tinungpalda dayta a bilin, nupay nagsisinnaludsodda, “Ania ti kayat a sawen ti ‘panagungar kadagiti natay’?”

¹¹Inimtuoddaⓞ kenkuana, “Apay a kuna dagiti mamaestro iti Linteg a masapul nga umay nga umuna ni Elias?”

¹²Insungbat ni Jesus, “Pudno nga umay nga umuna ni Elias tapno tarimaanenna amin a banag. Ngem apay a nailanad iti Nasantoan a Surat nga agsagaba iti napalalo ti Anak ti Tao ket maumsinto?

¹³Ibagak kadakayo nga immayen ni Elias, ket inaramid dagiti tattao ti amin a kinaykayatda kenkuana, kas naisurat maipapan kenkuana.”

¹⁴Idi agsublida iti ayan dagiti dadduma nga adalan, nakitada ti nakaad-adu a tattao iti likmutda ken sumagmamano a mamaestro iti Linteg a makisinsinnuppiat kadakuada.

¹⁵Apaman a nakita dagiti tattao a sumungad ni Jesus, naragsakanda ket nagtatarayda a kimmablaaw kenkuana.

¹⁶“Ania ti pagsusuppiatanyo?” sinaludsod ni Jesus.

¹⁷“Maestro,” kinuna ti maysa kadagiti tattao, “inyegko kenka ti anakko a lalaki ta linuganan ti dakes nga espiritu ket saan a makasao.

¹⁸No sumro ti dakes nga espiritu, itublakna ti ubing. Aglabutab ti ngiwatna, agngariet ken sumkil ti entero a bagina. Kiniddawko kadagiti adalam a paksiatenda ti dakes nga espiritu, ngem dida nabaelan.”

¹⁹Kinuna ni Jesus kadakuada, “Tattao nga awanan pammati! Kasano pay kabayag ti kaaddak iti dennayo? Kasano pay kabayag ti panaganusko kadakayo? Yegyo man kaniak ta ubing.”

²⁰Inyasidegda kenkuana ti ubing. Apaman a nakita ti dakes nga espiritu ni Jesus, pinagkuyegyegna ti ubing. Napasag ti ubing iti daga, naggulgulagol nga aglablabutab ti ngiwatna.

²¹“Kaano pay a kastoy ti maar-aramid kenkuana?” inimtuod ni Jesus iti ama ti ubing. “Manipud pay idi ubing,” insungbat ti amana.

²²“Masansan nga isebba ti dakes nga espiritu iti apuy wenno ilemmesna iti danum tapno patayenna. No kabaelam, pangngaasim ta tulongannakami!”

²³“Apay a kunam ‘No kabaelam’? Amin a banag kabaelan ti tao nga adda pammatina,” kinuna ni Jesus.

²⁴“Adda pammatik ngem saan a naan-anay,” dagus nga inyikkis ti ama. “Punnoam ti pagkurangan ti pammatik.”

²⁵Nadlaw ni Jesus dagiti tattao nga agdidinnuron nga umasideg kenkuana. Binilinna ti dakes nga espiritu, “Sika a tuleng ken umel nga espiritu, pumanawka itoy nga ubing ket dimo subsublianen.”

²⁶Nagikkis ti dakes nga espiritu, pinagkissiwna ti ubing sa pimmanaw. Kasla bangkayen ti ubing ket adu ti nagkuna: “Natayen!”

²⁷Ngem iniggaman ni Jesus ti ima ti ubing sana binangon. Timmakder ti ubing.

²⁸Idi nakastreken ni Jesus iti balay, sinaludsod a sililimed dagiti adalanna, “Apay a dimi napaksiat ti espiritu?”

²⁹“Kararag[22] laeng ti makapaksiat iti dayta a kita ti espiritu,” insungbat ni Jesus, “ket awanen sabali.”

³⁰Pimmanawda iti dayta a lugar ket limmasatda idiay Galilea. Kayat ni Jesus a saan a maammoan dagiti tattao ti ayanna

³¹agsipud ta isursurona daytoy kadagiti adalanna:

³¹“Mayawatto ti Anak ti Tao kadagiti mangpapatayto kenkuana. Ngem agungarto iti maikatlo nga aldaw.”

³²Ngem saan a maawatan dagiti adalanna ti kaipapanan daytoy a pannursurona ket nagamakda nga agsaludsod kenkuana.

³³Dimtengda idiay Capernaum ket idi addadan iti balay, sinaludsod ni Jesus kadakuada, “Ania ti nagsusuppiatanyo iti dalan?”

³⁴Ngemⓟ nagulimekda, ta iti dalan nagsusuppiatanda no siasino kadakuada ti kangrunaan.

³⁵Nagtugawⓠ ni Jesus. Inayabanna dagiti sangapulo ket dua nga adalan sana kinuna kadakuada, “Ti agtarigagay nga isu ti umuna, masapul nga agpaudi, ket agserbi iti amin.”

³⁶Nangala iti maysa nga ubing ket pinagtakderna iti sangoananda. Kalpasanna, sinaklotna sana kinuna,

³⁷“Tiⓡ umawat iti maysa kadagiti kakastoy nga ubbing gapu kaniak, siak ti awatenna. Ket ti umawat kaniak, saan laeng a siak ti awatenna no di pay ket ti nangibaon kaniak.”

³⁸“Maestro,” kinuna ni Juan ken ni Jesus, “nakitami ti maysa a tao a mangpakpaksiat kadagiti demonio babaen iti panangaramatna iti naganmo. Pinaritanmi gapu ta ditay met kadua.”

³⁹Imbaga ni Jesus kadakuada, “Diyo parparitan, ta awan ti agaramid iti milagro babaen iti panangaramatna iti naganko sa kalpasanna agsao kadagiti dakes a banag maipapan kaniak.

⁴⁰Taⓢ kaduatayo ti siasinoman a di bumusor kadatayo.

⁴¹Laglagipenyoⓣ a ti siasinoman a mangpainum kadakayo iti sangabaso a danum gapu ta taonakayo ni Cristo, awatennanto nga awaten ti gunggonana.”

⁴²“Ti siasinoman a pakaigapuan ti panagbasol ti maysa kadagitoy nga ubbing a mamati kaniak, nasaysayaat koma no maigalut ti dakkel a gilingan a bato iti tengngedna sa maitappuak iti taaw.

⁴³Ngarud,ⓤ no ti imam ti pakaigapuan ti panagbasolmo, putdem. Nasaysayaat a pukolka a sumrek iti biag nga agnanayon ngem ti addaanka iti dua nga ima ket mapanka idiay infierno nga ayan ti apuy a di maiddep.[23]

⁴⁵No ti sakam ti pakaigapuan ti panagbasolmo, putdem. Nasaysayaat a maymaysa ti sakam a sumrek iti biag nga agnanayon ngem ti addaanka iti dua a saka ket maitappuakka idiay infierno.[24]

⁴⁷Noⓥ ti matam ti pakaigapuan ti panagbasolmo, suatem. Nasaysayaat a buldingka a sumrek idiay Pagarian ti Dios ngem ti addaanka iti dua a mata ket maitappuakka idiay infierno.

⁴⁸Sadiay,ⓦ ‘saan a matay dagiti igges nga agkaan kadakuada ket ti apuy di met maiddep.’

⁴⁹“Ta ti tunggal maysa magugoranto iti apuy.

⁵⁰Nasayaatⓧ ti asin; ngem no awanen ti apgadna, kasano ti panangpaapgadyo manen? Maaddaankayo koma iti asin ti pannakigayyem, ket agkakappiakayo.”