San Mateo 12:1-50 RIPV1996 - Bible AI

¹Itiⓢ saan a nabayag, iti maysa nga Aldaw a Panaginana, magmagna ni Jesus iti kataltalonan a namulaan iti trigo. Aldaw a Panaginana idi. Gapu ta mabisin dagiti adalanna, nagrurosda kadagiti dawa ti trigo ket kinnanda.

²Idi makita dagiti Fariseo daytoy, kinunada ken ni Jesus, “Kitaem, iparit ti Lintegtayo ti ar-aramiden dagiti adalam iti Aldaw a Panaginana.”

³“Saanyoⓣ kadi a nabasa ti inaramid ni David idi isu ken dagiti tattaona nagbisinda?” insungbat ni Jesus.

⁴“Simrekⓤ ni David ken dagiti kaduana iti balay ti Dios ket kinnanda ti tinapay a naidaton iti Dios. Maisalungasing iti linteg ti inaramidda ta dagiti laeng papadi ti mapalubosan a mangan iti dayta a tinapay.

⁵Wennoⓥ diyo aya nabasa iti Linteg ni Moises nga iti Aldaw a Panaginana saan a makabasol dagiti papadi iti uneg ti Templo nupay salungasingenda ti Linteg ti Panaginana?

⁶Ibagak kadakayo nga adda ditoy ti maysa a nangnangruna ngem ti Templo.

⁷Kunaⓦ ti Nasantoan a Surat, ‘Asi ti kalikagumak—saan a daton a mapuoran.’ No agpayso nga ammoyo ti kaipapanan daytoy, diyo koma ukomen dagiti awan basolna

⁸agsipud ta ti Anak ti Tao isu ti Apo ti Aldaw a Panaginana.”

⁹Pimmanaw ni Jesus iti dayta a lugar ket napan iti sinagoga.

¹⁰Adda lalaki sadiay a paralitiko ti maysa nga imana. Ket gapu ta kayat ti sumagmamano a tattao sadiay nga idarum ni Jesus, sinaludsodda, “Iparit aya ti Lintegtayo ti panangagas iti Aldaw a Panaginana?”

¹¹Kinunaⓧ ni Jesus kadakuada, “Kas pangarigan, iti Aldaw a Panaginana, ti karnero ti maysa kadakayo matnag iti abut, dina aya alaen ken aonen?

¹²Napatpateg nga adayo ti tao ngem ti karnero! Isut' gapuna nga ipalubos ti Linteg ti panagaramid iti naimbag iti Aldaw a Panaginana.”

¹³Kinuna ngarud ni Jesus iti lalaki, “Unnatem ta imam.” Inunnat ti lalaki ti imana ket immimbag a kas iti maysa nga imana.

¹⁴Pimmanaw dagiti Fariseo tapno tulagenda no kasano ti panangpapatayda ken ni Jesus.

¹⁵Idi naammoan ni Jesus ti gandat dagiti Fariseo, pimmanaw sadiay. Simmurot kenkuana dagiti adu a tattao. Inagasanna amin dagiti masakit.

¹⁶Binilinna ida nga awan pangibagbagaanda iti maipapan kenkuana

¹⁷tapno matungpal ti kinuna ti Dios babaen ken ni profeta Isaias:

¹⁸“Adtoyⓨ ti adipenko a pinilik, Ti ay-ayatek ken pakaay-ayoak unay. Itedkonto ti Espirituk kenkuana, Ket ipakaammonanto kadagiti amin a tattao ti yaay ti tiempo ti hustisia.

¹⁹Ngem dinto makisuppiat wenno agpukkaw kadagiti kalkalsada; Ket dinto makatitileng ti timekna.

²⁰Dinanto tukkolen ti naparpar a runo, Wenno iddepen ti agkurkuridemdem a silaw. Saanto nga agsardeng agingga iti dina mapagballigi ti kinalinteg;

²¹Ket mangnamnamanto kenkuana dagiti amin a tattao.”

²²Kalpasanna, impan ti sumagmamano a tattao ken ni Jesus ti maysa a lalaki a bulsek ken umel agsipud ta linuganan ti demonio. Pinaimbag ni Jesus daytoy a lalaki, ket iti kasta, makasao ken makakitan.

²³Nasdaaw amin dagiti tattao iti inaramid ni Jesus. “Saan ngata nga isu daytoy ti Anak ni David?” sinaludsodda.

²⁴Idiⓩ nangngeg daytoy dagiti Fariseo kinunada, “Paksiatenna dagiti demonio gapu laeng iti pannakabalin nga inted kenkuana ni Beelzebub[24] a prinsipe dagiti demonio.”

²⁵Ammo ni Jesus ti pampanunotenda ket kinunana kadakuada, “Saan nga agbayag ti pagarian a mabingaybingay ken aggiginnubat met laeng. Aniaman nga ili wenno familia a mabingaybingay ken aggiginnura, dinto agpaut.

²⁶No agbibinnusor dagiti pasurot ni Satanas, kasano a mataginayon ti pagarianna?

²⁷Kunayo a paksiatek dagiti demonio gapu ta ikkannak ni Beelzebub iti pannakabalin a mangaramid iti kasta. Sinno ngarud ti mangted kadagiti pasurotyo iti pannakabalin a mangpaksiat kadagiti demonio?

²⁸Kinapudnona, ti Espiritu ti Dios ti mangted kaniak iti pannakabalin a mangpaksiat kadagiti demonio. Daytoy ti mangpaneknek nga addan kadakayo ti Pagarian ti Dios.

²⁹“Awan ti makastrek iti balay ti napigsa a tao tapno alaenna dagiti kukuana. Reppetenna pay nga umuna ti napigsa a tao sa agsamsam iti uneg ti balay.

³⁰“Tiⓐ saan a makikadua kaniak, busorennak. Ti saan a tumulong kaniak nga agurnong, agiwara.

³¹Daytoy ti gapuna nga ibagak kadakayo: mapakawan ti siasinoman a makabasol wenno agsao iti kinadakes,[25] ngem dinto mapakawan ti agsao iti maibusor iti Espiritu Santo.

³²Mapakawanⓑ ti agsao iti maikontra iti Anak ti Tao, ngem saan a mapakawan ti agsao iti maibusor iti Espiritu Santo—iti daytoy a biag wenno iti masakbayan.”

³³“Noⓒ nasayaat ti kayo, agbunga iti nasayaat. No saan a nasayaat ti kayo, saan a nasayaat ti bungana. Ta mailasin ti kayo gapu iti bungana.

³⁴Dakayoⓓ a kaputotan ti uleg, kasano ti panagsaoyo iti naimbag idinto a dakeskayo? Ta isawang ti ngiwat ti linaon ti puso.

³⁵Iruar ti naimbag a tao dagiti naimbag nga iduldulinna. Iruar ti dakes a tao dagiti dakes nga iduldulinna.

³⁶“Ibagak kadakayo nga inton Aldaw a Panangukom, sungbatanto ti tunggal maysa dagiti awan serserbina nga insawangna.

³⁷Ta dagitinto saom ti pakaukomam met laeng—no nakabasolka wenno saan.”

³⁸Nagsaoⓔ ti sumagmamano a mamaestro iti Linteg ken sumagmamano a Fariseo. “Maestro,” kinunada, “ipakitaannakami man iti milagro.”

³⁹“Anianⓕ a nagdakes dagiti tattao kadagitoy nga aldaw! Awan pammatida iti Dios,” insungbat ni Jesus. “Agdawatkayo iti milagro? Awan ti maipakita kadakayo no di laeng ti milagro ni profeta Jonas.

⁴⁰Kasⓖ iti panagyan ni Jonas iti tian ti dakkel nga ikan iti las-ud ti tallo nga aldaw ken rabii, kastanto met ti panagyan ti Anak ti Tao iti uneg ti daga.

⁴¹Intonⓗ Aldaw a Panangukom, tumakderto dagiti taga-Nineve a mangpabasol kadakayo, ta nagbabawida kadagiti basbasolda idi nangngegda ti panangaskasaba ni Jonas. Ibagak kadakayo nga adda ditoy ti maysa a natantan-ok ngem ni Jonas.

⁴²Intonⓘ Aldaw a Panangukom, tumakderto ti Reyna a taga-Abagatan a mangidarum kadakayo agsipud ta nagdaliasat iti adayo a lugar tapno umayna laeng denggen ti nainsiriban a pannursuro ni Solomon. Ibagak kadakayo nga adda ditoy ti maysa a natantan-ok ngem ni Solomon.”

⁴³“No rummuar ti dakes nga espiritu iti maysa a tao, mapan agsursor kadagiti luglugar a namaga nga agsapul iti paginanaanna. No awan ti masapulanna,

⁴⁴kunana iti nakemna, ‘Agsubliak iti balayko.’ Agsubli ngarud ket masarakanna ti balay nga awan nagyanna, nadalus ken natarimaan.

⁴⁵Iti kasta, rummuar ket mangisangpet iti pito nga espiritu a dakdakes pay ngem isu, ket kaduana ida nga agnaed sadiay. Ngarud, dakdakesto ti kasasaad dayta a tao ngem iti immuna. Kastoyto met ti pagbanagan dagiti dakes a tattao iti daytoy a kaputotan.”

⁴⁶Madama pay laeng nga agsasao ni Jesus kadagiti tattao idi sumangpet ni inana ken dagiti kakabsatna a lallaki. Nagyanda iti ruar ket kayatda ti makisao ken ni Jesus.[26]

⁴⁸Ngem insungbatna iti tao a nangibaga kenkuana, “Siasino kadi ti inak? Siasino kadi dagiti kakabsatko?”

⁴⁹Ket intudo ni Jesus dagiti adalanna sana kinuna, “Kitaenyo! Daytoy ti inak ken dagiti kakabsatko!

⁵⁰Ti siasinoman nga agaramid iti pagayatan ni Amak sadi langit, isu ti kabsatko ken ti inak.”